ମାଡ୍ରିଡ୍,୧୭।୭(ଏପି): ରିୟଲ ମାଡ୍ରିଡ୍ ଆଉଏକ ବଡ଼ ସଫଳତା ହାସଲ କରିଛି। ମାଡ୍ରିଡ୍ ଏଥର ଜଣାଶୁଣା ସ୍ପାନିଶ ଲିଗ୍ ଲା ଲିଗା ଟାଇଟଲ ହାସଲ କରିଛି। ଗୁରୁବାର ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ମାଡ୍ରିଡ୍ ୨-୧ ଗୋଲରେ ଭିଲାରିୟଲକୁ ପରାସ୍ତ କରିଛି। ଫଳରେ ଆଉ ଗୋଟଏ ମ୍ୟାଚ୍ ବାକିଥାଇ ଚାମ୍ପିୟନ ହେବାର ଗୌରବ ଅର୍ଜନ କରିଛି। ଏଥିସହିତ ମାଡ୍ରିଡ୍ ତା’ର ୩୪ତମ ସ୍ପାନିଶ ଲଗ୍ ଟାଇଟଲ ଜିତିଛି। ତେବେ ଗତ ୩ ବର୍ଷ ମଧ୍ୟ ମାଡ୍ରିଡ୍ ପ୍ରଥମଥର ପାଇଁ ଏହି ଟାଇଟଲ ଜିତିଛି। ପୂର୍ବରୁ ଶେଷଥର ପାଇଁ ମାଡ୍ରିଡ୍ ୨୦୧୭ରେ ଏହି ଟାଇଟଲ ଜିତିଥିଲା। ସେହପରି ଅନ୍ୟଏକ ଗୁରୁତ୍ୱପୂର୍ଣ୍ଣ ମୁକାବିଲାରେ ବାର୍ସିଲୋନା ଓସାଉସୁନାଠାରୁ ୨-୧ ଗୋଲରେ ପରାସ୍ତ ହୋଇଛି। ଫଳରେ ବାର୍ସିଲେନାର ଟାଇଟଲ ଆଶା ଧୂଳିସାତ୍ ହୋଇଛି। ଆଉ ଗୋଟିଏ ରାଉଣ୍ଡ ମ୍ୟାଚ୍ ବାକିଥିଲେ ମଧ୍ୟ ୭ ପଏଣ୍ଟ ବ୍ୟବଧାନରେ ମାଡ୍ରିଡ୍କୁ ବିଜୟ ମୁକୁଟ ମିଳିଛି।
ମାଡ୍ରିଡ୍ ଏପର୍ଯ୍ୟନ୍ତ ୩୭ଟି ମ୍ୟାଚ୍ ଖେଳି ୨୬ ବିଜୟ, ୮ ଡ୍ର ଓ ୩ ପରାଜୟ ସହ ୮୬ ପଏଣ୍ଟ ପାଇ ତାଲିକାର ଶୀର୍ଷରେ ରହିଛି। ଅନ୍ୟପଟେ ବାର୍ସିଲୋନା ୩୭ ମ୍ୟାଚ୍ ଖେଳି ୨୪ ବିଜୟ, ୭ ଡ୍ର ଓ ୬ ପରାଜୟ ସହ ୭୯ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛି। ସେହିପରି ଆଟଲେଟିକୋ ମାଡ୍ରିଡ୍ ସମାନ ସଂଖ୍ୟକ ମ୍ୟାଚ୍ ଖେଳି ୧୮ ବିଜୟ, ୧୫ ଡ୍ର ଓ ୪ ପରାଜୟ ସହ ୬୯ ପଏଣ୍ଟ ହାସଲ କରି ତୃତୀୟ ସ୍ଥାନରେ ରହିଛି। ଏହି ନିର୍ଣ୍ଣାୟକ ମ୍ୟାଚ୍ରେ ମାଡ୍ରିଡ୍ ତରଫରୁ କରିମ୍ ବେଞ୍ଜେମା ଦୁଇଟି ଗୋଲ ସ୍କୋର କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ସେ ୨୯ତମ ମିନିଟ୍ରେ ପ୍ରଥମ ଗୋଲ ସ୍କୋର କରିଥିଲେ। ଏହାପରେ ୭୭ ମିନିଟ୍ରେ ପେନାଲ୍ଟି ଜରିଆରେ ସେ ଦ୍ୱିତୀୟ ଗୋଲ ପ୍ରଦାନ କରିଥିଲେ। ଅପରପକ୍ଷରେ ଭିଲରିୟଶ ତରଫରୁ ଭିସେଣ୍ଟ ଇବୋରା ଗୋଟିଏ ଗୋଲ ସ୍କୋର କରିଥିଲେ। ଏହି ସଫଳତା ପାଇଁ ମାଡ୍ରିଡ୍କୁ ବାର୍ସିଲୋନ ତରଫରୁ ଅଭିନନ୍ଦନ ଜ୍ଞାପନ କରାଯାଇଛି।
ମାଡ୍ରିଡ୍ର ଏହି ବିଜୟ କୋଚ୍ ତତା ପୂର୍ବତନ ଫ୍ରାନ୍ସ ଫୁଟବଲର ଜିନେଡିନ ଜିଡାନଙ୍କ ପାଇଁ ବିଶେଷ ମହତ୍ତ୍ୱ ରଖୁଛି। ଚାମ୍ପୟନ୍ସ ଲିଗ୍ଠାରୁ ଏହି ବିଜୟ ଅଧିକ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି। ସାରା ସେସନରେ ଖେଳଳିମାନେ ଉଚ୍ଚକୋଟୀର ପ୍ରଦର୍ଶନ କରିଛନ୍ତି। ଏହା ନଶ୍ଚିତ ଭାବେ ପ୍ରଶଂସନୀୟ ଓ ମାଡ୍ରିଡ୍ ବିଜୟର ହକ୍ଦାର। ଏହା ମୋ ପେସାଦାର ଜୀବନର ଶ୍ରେଷ୍ଠ ଦିବସ ବୋଲି ସେ କହିଛନ୍ତି। ପୂର୍ବରୁ ଜଣେ ଖେଳାଳି ଭାବେ ଜିଡାନ ଚାମ୍ପିୟନ୍ସ ଲିଗ୍ ଓ ବିଶ୍ୱକପ୍ ଜିତିବାର ଗୌରବ ଅର୍ଜନ କରିଛନ୍ତି। ଖ୍ରୀଷ୍ଟିଆନୋ ରୋନାଲ୍ଡୋ ଦଳ ଛାଡି ଜୁଭେଣ୍ଟସ୍ରେ ଯୋଗ ଦେବା ପରେ ପ୍ରଥମଥର ପାଇଁ ମାଡ୍ରିଡ ଏହି ଟାଇଟଲ ଜିତିଛି।
