ନୂଆଦିଲ୍ଲୀ,୧୫।୪: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୧ର ଷଷ୍ଠ ମ୍ୟାଚ୍ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯାଇଛି। ଏହି ରୋମାଞ୍ଚକର ମ୍ୟାଚ୍ରେ ଆର୍ସିବି ବାଜିମାତ କରିଥିଲା। ମ୍ୟାଚ୍ ଶେଷରେ ‘ମ୍ୟାନ୍ ଅଫ୍ ଦ ମ୍ୟାଚ୍’ ଭାବେ ଅର୍ଦ୍ଧଶତକୀୟ ପାଳି ଖେଳିଥିବା ଗ୍ଲେନ୍ ମ୍ୟାକ୍ସଓ୍ବେଲଙ୍କୁ ଚୟନ କରାଯାଇଥିଲା। ହେଲେ ମ୍ୟାଚ୍ର ଅସଲ ହିରୋ ପାଲଟିଥିଲେ ୨୬ ବର୍ଷୀୟ ଶାହବାଜ ଅହମ୍ମଦ। କାରଣ ସେ ଗୋଟିଏ ଓଭରରେ ମ୍ୟାଚ୍ର କାୟା ପଲଟାଇ ଦେଇଥିଲେ।
ମ୍ୟାକ୍ସଓ୍ବେଲଙ୍କ ୪୧ ବଲ୍ରେ ୫୯ରନ୍ ଯୋଗୁ ପ୍ରଥମେ ବ୍ୟାଟିଂ କରିଥିବା ଆର୍ସିବି ଆଠ ଉଇକେଟ ହରାଇ ୧୪୯ରନ୍ କରିଥିଲା। ଜବାବରେ ସନରାଇଜର୍ସ ଟିମ୍ ୧୪ ଓଭରରେ ଗୋଟିଏ ଉଇକେଟ ହରାଇ ୯୬ରନ୍ କରିଥିଲେ। ହେଲେ ପରେ ୨୦ ଓଭର ବେଳକୁ ଦଳ ୯ ଉଇକେଟ ହରାଇ ୧୪୩ ରନ୍ କରିବାରେ ସକ୍ଷମ ହୋଇଥିଲା।
ହାଇଦ୍ରାବାଦ ଟିମ୍କୁ ଜିତିବା ଲାଗି ୨୪ ବଲ୍ରେ ୩୫ରନ୍ର ଆବଶ୍ୟକତା ଥିଲା। ଜନି ବେୟାରଷ୍ଟୋ ପଡ଼ିଆରେ ଥିଲେ। ପରେ ସ୍ପିନର ଶାହବାଜ ୧୭ତମ ଓଭରରେ ବୋଲିଂ କରିବାକୁ ଆସି ବେୟାରଷ୍ଟୋ ସମେତ ଅନ୍ୟ ତିନୋଟି ଉଇକେଟ ନେଇ ଆର୍ସିବିକୁ ମଜଭୂତ ସ୍ଥିତିକୁ ନେଇଥିଲେ। କହିବାକୁ ଗଲେ ସେ ଗୋଟିଏ ଓଭରରେ ମ୍ୟାଚ୍ର ମୋଡ ବଦଳାଇଦେଇତିଲେ। ଏହାପରେ ସନରାଇଜର୍ସର ଜିତିବା ଅସମ୍ଭବ ହୋଇଯାଇଥିଲା।
କିଏ ଏହି ଶାହବାଜ:
ବାମହାତୀ ଶାହବାଜ ହରିୟାଣାର ଏକ ଛୋଟ ସହର ମେବାତର ବାସିନ୍ଦା। ୧୯୯୪ରେ ତାଙ୍କର ଜନ୍ମ। ସାଧାରଣ ପରିବାରରୁ ଆସିଥିବା ଶାହବାଜ ପିଲାଟିବେଳୁ କ୍ରିକେଟ ଖେଳିବାକୁ ଭଲ ପାଉଥିଲେ। ପ୍ରଥମେ ବାପା ଏବଂ ମାମୁଙ୍କଠାରୁ ସେ କ୍ରିକେଟ ଖେଳିବା ଶିଖିଥିଲେ। ଧିରେ ଧିରେ ଏହି ସଉକ ବଢ଼ିଥିଲା। ଆଜିଯାଏ ମେବାତର ଗୋଟିଏ ପିଲା ରଣଜୀ ମ୍ୟାଚ୍ ଖେଳି ନ ଥିବା ବେଳେ ଜଣେ ଖେଳାଳି ଭାବେ ଆଇପିଏଲ୍ରେ ଖେଳିବା ଜିଲାପାଇଁ ଗର୍ବ ବୋଲି ସେ କହିଥିଲେ।
ଭାରତୀୟ ଅଲ୍ରାଉଣ୍ଡର ରବିନ୍ଦ୍ର ଜାଡେଜା ତାଙ୍କର ଆଦର୍ଶ। ଉଭୟଙ୍କ ଖେଳିବା ଶୈଳି ଏକାଭଳି। କାରଣ ଉଭୟ ବାମହାତୀ ସ୍ପିନର ଏବଂ ବ୍ୟାଟ୍ସମ୍ୟାନ୍। ସେହିଭଳି ବିଶ୍ୱ କ୍ରିକେଟରେ ସେ ଇଂଲଣ୍ଡର ଦିଗ୍ଗଜ ଅଲରାଉଣ୍ଡର ବେନ ଷ୍ଟୋକ୍ସଙ୍କୁ ଆଦର୍ଶ ବୋଲି ଭାବନ୍ତି ବୋଲି କହିଛନ୍ତି।
