ଆବୁ ଧାବି,୨୦।୯: ସ୍ଥାନୀୟ ଆବୁଧାବି ଅନ୍ତର୍ଜାତୀୟ ଷ୍ଟାଡିୟମରେ ସୋମବାର ଖେଳାଯାଇଥିବା କୋଲକାତା ନାଇଟ୍ ରାଇଡର୍ସ (କେକେଆର୍) ବିପକ୍ଷ ଆଇପିଏଲ ମ୍ୟାଚ୍ରେ ମାତ୍ର ୯୨ ରନ୍ରେ ଅଲଆଉଟ୍ ହୋଇଯାଇଛି ରୟାଲ ଚ୍ୟାଲେଞ୍ଜର୍ସ ବାଙ୍ଗଲୋର (ଆର୍ସିବି)। ଆଇପିଏଲ ଇତିହାସରେ ୬ଷ୍ଠ ଥର ପାଇଁ ବାଙ୍ଗଲୋର ୧୦୦ ରନ୍ ଭିତରେ ସୀମିତ ରହିଛି। ଉଲ୍ଲେଖଯୋଗ୍ୟ, ସର୍ବାଧିକ ଥର ୧୦୦ ଭିତରେ ଅଲଆଉଟ୍ ହେବାର ରେକର୍ଡ ରହିଛି ଦିଲ୍ଲୀ କ୍ୟାପିଟାଲ୍ସ (ଡେୟାରଡେଭିଲ୍ସ) ନାମରେ। ଏହି ଦଳ ୧୦ ଥର ୧୦୦ ଭିତରେ ଅଲଆଉଟ୍ ହୋଇଛି।
ତେବେ ଆର୍ସିବି ୨୦୧୯ରେ ୭୦ (ସିଏସ୍କେ ବିପକ୍ଷରେ), ୨୦୧୭ରେ ୪୯ (କେକେଆର), ୨୦୧୪ରେ ୭୦ (ଆର୍ଆର୍), ୨୦୦୯ରେ ୮୭ (ସିଏସ୍କେ) ଓ ୨୦୦୮ରେ ୮୨ (କେକେଆର୍) ରନ୍ରେ ଅଲଆଉଟ୍ ହୋଇଥିଲା। କୌତୂହଳର କଥା ହେଲା, କୋଲକାତା ବିପକ୍ଷରେ ୩ୟ ଥର ପାଇଁ ଆର୍ସିବି ୧୦୦ ରନ୍ ଭିତରେ ଆତ୍ମସମର୍ପଣ କରିଛି। ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ବିପକ୍ଷରେ କୋହଲିଙ୍କ ନେତୃତ୍ୱାଧୀନ ଦଳ ଦୁଇ ଥର ୧୦୦ ଭିତରେ ସୀମିତ ରହିଛି।
