ନୂଆଦିଲ୍ଲୀ,୬।୮: ମହାନ ଅଲରାଉଣ୍ଡର ତଥା ପୂର୍ବତନ ଭାରତୀୟ ଅଧିନାୟକ କପିଳ ଦେବଙ୍କ କ୍ଲବରେ ରବୀନ୍ଦ୍ର ଜାଡେଜା ସାମିଲ ହୋଇଛନ୍ତି। ଟ୍ରେଣ୍ଟ ବ୍ରିଜଠାରେ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟର ପ୍ରଥମ ଇନିଂସରେ ଅପରାଜିତ ୨୬ ରନ୍ର ଇନିଂସ ଖେଳିବା ଅବସରରେ କ୍ରିକେଟ ଲମ୍ବା ଫର୍ମାଟରେ ୨ ହଜାର ରନ୍ ପୂରଣ କରିଛନ୍ତି ଜାଡେଜା। ଏଥିସହ ଟେଷ୍ଟ ଫର୍ମାଟରେ ଦୁଇ ହଜାରରୁ ଅଧିକ ରନ୍ ଓ ଦୁଇ ଶହରୁ ଅଧିକ ଉଇକେଟ ନେଇଥିବା ଭାରତୀୟ ଅଲରାଉଣ୍ଡରଙ୍କ ତାଲିକାରେ ସ୍ଥାନ ପାଇଛନ୍ତି।
କ୍ୟାରିୟରର ୫୩ ତମ ଟେଷ୍ଟରେ ଦୁଇ ହଜାର ରନ୍ ଅତିକ୍ରମ କରିଥିବା ଜାଡେଜାଙ୍କ ନାମରେ ରହିଛି ୨୨୧ଟି ଉଇକେଟ। ଭାରତୀୟ କ୍ରିକେଟ ଇତିହାସରେ ଶ୍ରେଷ୍ଠ ଅଲରାଉଣ୍ଡର କୁହାଯାଉଥିବା କପିଳ ଦେବ ୧୩୧ ଟେଷ୍ଟରେ ୪୩୪ ଉଇକେଟ ନେବା ସହ ୫,୨୪୮ ରନ୍ କରିଥିଲେ। ଏହି ତାଲିକାରେ ଦ୍ୱିତୀୟ ସ୍ଥାନରେ ରହିଛନ୍ତି ରବିଚନ୍ଦ୍ରନ ଅଶ୍ୱିନ। ଏପର୍ଯ୍ୟନ୍ତ ୭୯ ଟେଷ୍ଟରେ ୪୧୩ ଉଇକେଟ ନେଇଥିବା ୩୪ ବର୍ଷୀୟ ଅଶ୍ୱିନ ୨,୬୫୬ ରନ୍ କରିଛନ୍ତି। ହରଭଜନ ସିଂଙ୍କ ନାମରେ ମଧ୍ୟ ୨,୨୨୪ ରନ୍ ଓ ୪୧୭ ଉଇକେଟ ରହିଛି।
