ନୂଆଦିଲ୍ଲୀ, ୧୭।୮: ଶ୍ରୀଲଙ୍କା ବିପକ୍ଷରେ ଗଲ୍ରେ ଖେଳାଯାଉଥିବା ପ୍ରଥମ ଟେଷ୍ଟ ମ୍ୟାଚରେ ଭାରତୀୟ ସ୍ପିନ ଅଲରାଉଣ୍ଡର ରବୀନ୍ଦ୍ର ଜାଡେଜା ନିଜ ନାମରେ ଏକ ବଡ଼ ରେକର୍ଡ କରିଛନ୍ତି। ଜାଡେଜା ପ୍ରଥମ ଇନିଂସରେ ଟେଷ୍ଟ କ୍ରିକେଟରେ ୩୫୦ ଉଇକେଟ୍ ପୂରଣ କରିଛନ୍ତି। ଏହା ସହିତ ସେ ଟେଷ୍ଟରେ ୪,୦୦୦ରୁ ଅଧିକ ରନ ଏବଂ ୩୫୦ରୁ ଅଧିକ ଉଇକେଟ୍ ନେଇଥିବା ଭାରତର ଦ୍ୱିତୀୟ ଖେଳାଳି ହୋଇଛନ୍ତି। ତାଙ୍କ ପୂର୍ବରୁ କିମ୍ବଦନ୍ତୀ କପିଲ ଦେବ ଏହି କାରନାମା କରିଥିଲେ।
ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟର ପ୍ରଥମ ଇନିଂସରେ ରବୀନ୍ଦ୍ର ଜାଡେଜା ୩ଟି ଉଇକେଟ୍ ନେଇଥିଲେ। ଏହା ପରେ ଟେଷ୍ଟ କ୍ରିକେଟରେ ତାଙ୍କ ନାମରେ ମୋଟ ୩୫୧ ଉଇକେଟ୍ ହୋଇଛି। ସେହିପରି ଜାଡେଜା ଏପର୍ଯ୍ୟନ୍ତ ୪,୧୦୮ ରନ ମଧ୍ୟ କରିଛନ୍ତି। ଏହା ସହିତ ଜାଡେଜା ସେହି ବିଶେଷ ରେକର୍ଡ ତାଲିକାରେ ସାମିଲ ହୋଇଛନ୍ତି, ଯେଉଁଥିରେ ବିଶ୍ୱର ମାତ୍ର ୪ ଜଣ କ୍ରିକେଟର ରହିଛନ୍ତି।
ପୂର୍ବତନ ଭାରତୀୟ କିମ୍ବଦନ୍ତୀ କପିଲ ଦେବ ଟେଷ୍ଟରେ ୫,୨୪୮ ରନ ଏବଂ ୪୩୪ ଉଇକେଟ୍ ନେଇଛନ୍ତି। ଇଂଲଣ୍ଡର ପୂର୍ବତନ ମହାନ ଅଲରାଉଣ୍ଡର ଇଆନ ବୋଥାମଙ୍କ ନାମରେ ୫,୨୦୦ ରନ ଏବଂ ୩୮୩ ଉଇକେଟ୍ ରହିଛି। ସେହିପରି ନ୍ୟୁଜିଲାଣ୍ଡର ଡାନିଏଲ ଭିଟୋରି ୩୬୨ ଉଇକେଟ୍ ନେବା ସହ ୪,୫୩୧ ରନ କରିଛନ୍ତି।
