କାବୁଲ,୧୭।୩: ପାକିସ୍ତାନ ପୁଣି ଥରେ ଆଫଗାନିସ୍ତାନ ଉପରେ ବିମାନ ଆକ୍ରମଣ କରିଛି। ଏହି ବିମାନ ଆକ୍ରମଣ ମାଧ୍ୟମରେ ପାକିସ୍ତାନ ଆଫଗାନିସ୍ତାନର କାବୁଲରେ ଧ୍ୱଂସଲୀଳା ସୃଷ୍ଟି କରିଛି। ଏହି ଆକ୍ରମଣରେ ପ୍ରାୟ ୪୦୦ ଆଫଗାନ ପ୍ରାଣ ହରାଇଛନ୍ତି। ଏହି ବିମାନ ଆକ୍ରମଣ ଫଳରେ ଆଫଗାନିସ୍ତାନକୁ ବହୁତ କ୍ଷତି ସହିବାକୁ ପଡିଛି। ପାକିସ୍ତାନର ଏହି ଆକ୍ରମଣ ପରେ, ଆଫଗାନିସ୍ତାନ ସ୍ପିନର ରଶିଦ ଖାନଙ୍କ ସମେତ ଅନେକ ଖେଳାଳି ସେମାନଙ୍କର ଦୁଃଖ ପ୍ରକାଶ କରିଛନ୍ତି। ସେମାନେ ଦାବି କରିଛନ୍ତି ଯେ, ଏହି ବିମାନ ଆକ୍ରମଣ କରି ପାକିସ୍ତାନ ନିରୀହ ସାଧାରଣ ଲୋକଙ୍କ ଜୀବନ ନେଇଛି।
ରଶିଦ ଖାନ ବିମାନ ଆକ୍ରମଣ ଖବର ଶୁଣି ସ୍ପଷ୍ଟ ଭାବରେ ବ୍ୟଥିତ ଦେଖାଯାଉଥିଲେ। ସେ ପ୍ରାଣ ହରାଇଥିବା ଲୋକଙ୍କ ପ୍ରତି ସମବେଦନା ପ୍ରକାଶ କରିଥିଲେ। ଏକ୍ସରେ ସେ ଲେଖିଛନ୍ତି, ପାକିସ୍ତାନ ବିମାନ ଆକ୍ରମଣ ଫଳରେ କାବୁଲରେ ସାଧାରଣ ଲୋକଙ୍କ ଜୀବନହାନୀରେ ମୁଁ ଗଭୀର ଦୁଃଖିତ। ଜାଣିଶୁଣି କିମ୍ବା ଅଜାଣତରେ ଲୋକଙ୍କ ଘର, ସ୍କୁଲ ଏବଂ ହସ୍ପିଟାଲକୁ ଟାର୍ଗେଟ କରିବା ଅତ୍ୟନ୍ତ ଭୁଲ। ପବିତ୍ର ରମଜାନ ମାସରେ ଏପରି କାର୍ଯ୍ୟ ବିଶେଷ ଭାବରେ ଦୁଃଖଦାୟକ।
ଆଫଗାନିସ୍ତାନ ସ୍ପିନର ଆହୁରି ଲେଖିଛନ୍ତି ଯେ, ଏହି ସଂଘର୍ଷ କେବଳ ଘୃଣାକୁ ପ୍ରୋତ୍ସାହିତ କରିବ। ମୁଁ ଜାତିସଂଘ ଏବଂ ମାନବାଧିକାର ସଂଗଠନଗୁଡ଼ିକୁ ଏହି ଘଟଣାର ତଦନ୍ତ କରିବାକୁ ଏବଂ ଅପରାଧୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରୁଛି। ଏହି କଷ୍ଟକର ସମୟରେ ମୁଁ ମୋର ସାଥୀ ଆଫଗାନିସ୍ତାନମାନଙ୍କ ସହିତ ଏକତାରେ ଠିଆ ହୋଇଛି। ଆମେ ଏହି ଦୁଃଖର ସମୟରୁ ବାହାରି ଆସିବୁ ଏବଂ ଏକ ରାଷ୍ଟ୍ର ଭାବରେ ପୁଣି ଥରେ ଆଗକୁ ବଢ଼ିବୁ। ଆମେ ସବୁବେଳେ କରିଛୁ।
ରଶିଦ ଖାନଙ୍କ ବ୍ୟତୀତ ଅନ୍ୟ ଆଫଗାନିସ୍ତାନ କ୍ରିକେଟରମାନେ ମଧ୍ୟ ଏହି ପାକିସ୍ତାନୀ ବିମାନ ଆକ୍ରମଣ ଉପରେ ଦୁଃଖ ପ୍ରକାଶ କରିଛନ୍ତି। ଏକ୍ସରେ ପୋଷ୍ଟ କରି, ମହମ୍ମଦ ନବି ପାକିସ୍ତାନର ବିମାନ ଆକ୍ରମଣକୁ ନିନ୍ଦା କରିଛନ୍ତି।
ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ବହୁତ ସମୟ ଧରି ଏକ ଉତ୍ତେଜନାପୂର୍ଣ୍ଣ ପରିସ୍ଥିତି ଜାରି ରହିଛି। ଗତ କିଛି ଦିନ ଧରି ଆକ୍ରମଣର ଏକ ଚକ୍ର ଆରମ୍ଭ ହୋଇଛି – କେତେବେଳେ ଆଫଗାନିସ୍ତାନ ପାକିସ୍ତାନ ଉପରେ ଆକ୍ରମଣ କରୁଛି ତ ଆଉ କେତେବେଳେ ପାକିସ୍ତାନ ଆଫଗାନିସ୍ତାନ ଉପରେ ଆକ୍ରମଣ କରୁଛି। ଏହା ଦୁଇ ଦେଶ ମଧ୍ୟରେ ଯୁଦ୍ଧ ପରି ପରିସ୍ଥିତି ସୃଷ୍ଟି କରିଛି।
Dharitri – Odisha’s No.1 Odia Daily
