ନୂଆଦିଲ୍ଲୀ,୨୨।୮ : ଜଣେ ନାବାଳିକାଙ୍କୁ ବଳାତ୍କାର କରିବା ଅଭିଯୋଗରେ ୩୨ ବର୍ଷୀୟ ଯୁବକଙ୍କୁ ହତ୍ୟା କରିଛନ୍ତି ପୀଡ଼ିତାଙ୍କ ବାପା। ଗୁରୁବାର ରାତିରେ ଏଭଳି ଘଟଣା ଘଟିଛି ରାଜକୋଟର ସନ୍ତ କବିର ରୋଡ୍ ଅଞ୍ଚଳରେ। ପୋଲିସ ବଳାତ୍କାର ପୀଡ଼ିତାଙ୍କ ବାପା ଓ ତାଙ୍କ ସାଙ୍ଗ ଦୀନେଶଙ୍କୁ ବିଜୟ ମେରଙ୍କ ହତ୍ୟା ମାମଲାରେ ଗିରଫ କରିଛି।
ରାଜକୋଟର କନକ ନଗର ଅଞ୍ଚଳ ବାସୀନ୍ଦା ବିଜୟ କିଛି ଦିନ ତଳେ ଜାମିନରେ ଜେଲରୁ ବାହାରିଥିଲେ। ତାଙ୍କୁ ନାବାଳିକାଙ୍କ ବାପା ଓ ତାଙ୍କ ସାଙ୍ଗ ହତ୍ୟା କରିଥିବା ଅଭିଯୋଗ ଆଣିଥିଲେ ବିଜୟଙ୍କ ବଡ଼ ଭାଇ ଅଶ୍ୱିନ ମେର (୩୫)।
ପୋଲିସରେ କରାଯାଇଥିବା ଅଭିଯୋଗ ଅନୁଯାୟୀ, ହତ୍ୟାକାରୀଙ୍କ ନାବାଳିକା ଝିଅଙ୍କୁ ଗତବର୍ଷ ଅକ୍ଟୋବରରେ ନେଇ ପଳାଇଥିଲେ ବିଜୟ। ପରେ ଝିଅର ବାପା ବିଜୟଙ୍କ ନାମରେ ଅପହରଣ ଅଭିଯୋଗ ଆଣିଥିଲେ। ପୋଲିସ ନାବାଳିକା ଓ ବିଜୟଙ୍କୁ ଗତ ମାର୍ଚ୍ଚରେ ଜୁନାଗଡ଼ରୁ ଉଦ୍ଧାର କରିଥିଲା। ନାବାଳିକାଙ୍କୁ ବଳାତ୍କାର ଓ ପୋକ୍ସୋ ଆଇନରେ ବିଜୟଙ୍କୁ ଗିରଫ କରାଯାଇଥିଲା। ସେବେ ଠାରୁ ସେ ଜେଲରେ ଥିଲେ। କିଛି ସପ୍ତାହ ତଳେ ତାଙ୍କୁ ଜାମିନରେ ଛାଡ଼ି ଦିଆଯାଇଥିଲା।
