ଯାଜପୁର ଅଫିସ/ରସୁଲପୁର/ଯାଜପୁର ଟାଉନ(ଡି.ଏନ.ଏ.),୬।୨: ଭୁବନେଶ୍ୱର ରମାଦେବୀ ମହିଳା ବିଶ୍ୱବିଦ୍ୟାଳୟ ଛାତ୍ରୀ ଝରାଫୁଲ ନାୟକ (୨୧)ଙ୍କ ସନ୍ଦେହଜନକ ମୃତ୍ୟୁ ମାମଲା ଦିନକୁ ଦିନ ଭିନ୍ନମୋଡ ନେଉଛି। ଘଟଣାର ୧୦ ଦିନ ଅତିକ୍ରାନ୍ତ ହୋଇ ସାରିଥିଲେ ହେଁ ପୋଲିସ ମୃତ୍ୟୁର କାରଣ ଖୋଜିବାରେ ବିଫଳ ହୋଇଛି। ୩ ଦିନିଆ ରିମାଣ୍ଡ ଅବଧି ସରିବା ପରେ ଶୁକ୍ରବାର କୁଆଖିଆ ଥାନା ପୋଲିସ ଗିରଫ ମୁଖ୍ୟ ଅଭିଯୁକ୍ତ ରାକେଶ ସ୍ବାଇଁଙ୍କୁ ଜିଲା ଦୌରାଜଜ୍ଙ୍କ କୋର୍ଟରେ ହାଜର କରାଇଥିଲା। କୋର୍ଟ ରାକେଶଙ୍କୁ ଆସନ୍ତା ୧୨ ତାରିଖ ପର୍ଯ୍ୟନ୍ତ ଯାଜପୁର ଟାଉନ ଉପ କାରାଗାରକୁ ପଠାଇ ଦେଇଛନ୍ତି। ତେବେ ରାକେଶଙ୍କୁ ନେଇ ଭୁବନେଶ୍ୱର ସୁନ୍ଦରପଦାସ୍ଥିତ ତାଙ୍କ ଘରକୁ ଖାନତଲାସି କରିବା ସମୟରେ ତାଙ୍କ ମୋବାଇଲ ଫୋନ ପୋଲିସ ହାତରେ ଲାଗିଛି। ତାହାକୁ ଟ୍ରାକ୍ କରି ଘଟଣାର ରହସ୍ୟ ଖୋଲିବ ବୋଲି ପୋଲିସ ଆଶା ରଖିଛି। ଅନ୍ୟପକ୍ଷରେ ପ୍ରମାଣ ନଷ୍ଟ କରିବାକୁ ଯାଇ ରାକେଶ ମୋବାଇଲରୁ ବହୁ ତଥ୍ୟ ନଷ୍ଟ କରି ଦେଇଥିବା ପୋଲିସ ଆଶଙ୍କା କରୁଛି। ତେଣୁ ମୋବାଇଲର ଡାଟାଗୁଡ଼ିକୁ ରିକୋଭରି ପାଇଁ ଲ୍ୟାବ୍କୁ ପଠାଯାଇଛି ବୋଲି ପୋଲିସ ସୂତ୍ରରୁ ଜଣାପଡିଛି। ଅନ୍ୟପକ୍ଷରେ ଝରାଫୁଲଙ୍କ ମୋବାଇଲ ଫୋନ ମିଳୁ ନ ଥିବାରୁ ଉଭୟଙ୍କ ମଧ୍ୟରେ ହୋଇଥିବା ବାର୍ତ୍ତାଳାପ, ଚାର୍ଟିଂ, ଭିଡିଓ କଲିଂ, ଫଟୋ ଆଦି ସମ୍ପର୍କରେ ଅବଗତ ହେବା ପାଇଁ ପୋଲିସକୁ ରାକେଶଙ୍କ ମୋବାଇଲ ସହାୟକ ହେବ ବୋଲି କୁହାଯାଉଛି। ଅପରପକ୍ଷରେ ଗ୍ରାଉଣ୍ଡ ତଦନ୍ତ ଶେଷ ହେବା ପରେ ଭିସେରା ରିପୋର୍ଟକୁ ପୋଲିସ ଅପେକ୍ଷା ରହିଛି। ରାକେଶଙ୍କ ସହଯୋଗୀ ଶକ୍ତି ପ୍ରସାଦ ସ୍ବାଇଁକୁ ପୋଲିସ ଧରିବାକୁ ତନାଘନା ଚଳାଇଥିଲେ ହେଁ ତାହା ସଫଳ ହୋଇ ପାରିନାହିଁ। ଏହାଛଡ଼ା ପୋଲିସ ଜେରା ସମୟରେ ରାକେଶ ମିଥ୍ୟା ତଥ୍ୟ ଦେଇଥିବାରୁ ତଦନ୍ତ ବାଟବଣା ହୋଇଥିବା କୁହାଯାଉଛି। ଏପରି କି ଝରାଫୁଲଙ୍କ ଶରୀର ଗୁରୁତର ଆଘାତପ୍ରାପ୍ତ ହୋଇଥିବା ଶବବ୍ୟବଚ୍ଛେଦ ରିପୋର୍ଟରେ ଦର୍ଶାଯାଇଥିବା ଶୁଣିବାକୁ ମିଳିଛି। ଏ ସଂକ୍ରାନ୍ତରେ ଯାଜପୁରରୋଡ୍ ଏସ୍ଡିପିଓ ତଥା ତଦନ୍ତ ଅଧିକାରୀ ଚିନ୍ମୟ କୁମାର ନାୟକଙ୍କୁ ପଚାରିବାରେ ସେ କହିଛନ୍ତି, ଦିନେ ଦୁଇଦିନ ଅପେକ୍ଷା କରନ୍ତୁ, ସମସ୍ତ ରହସ୍ୟ ଖୋଲାଯିବ।
