ନୂଆଦିଲ୍ଲୀ,୩୦।୫: କଂଗ୍ରେସ ସୋମବାର ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କ ସହ ଦଳ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଏବଂ କଂଗ୍ରେସ ନେତା ରାହୁଲ ଗାନ୍ଧୀଙ୍କ ମାରାଥନ ବୈଠକ କରିଛନ୍ତି। ବୈଠକ ପରେ କଂଗ୍ରେସ କହିଛି, ଆସନ୍ତା ବିଧାନସଭା ନିର୍ବାଚନର ମିଳିତ ଭାବେ ଲଢିବାକୁ ଦୁଇ ନେତା ସହମତ ହୋଇଛନ୍ତି।
ଦଳର ସଂଗଠନର ସାଧାରଣ ସମ୍ପାଦକ କେ.ସି ଭେଣୁଗୋପାଲ କହିଛନ୍ତି, ଦଳର ପ୍ରସ୍ତାବରେ ଗେହଲଟ ଏବଂ ପାଇଲଟ ରାଜି ହୋଇଛନ୍ତି। ତେବେ କ’ଣ ସହମତ ହୋଇଛି ସେ ସମ୍ପର୍କରେ ସେ କୌଣସି ବିବରଣୀ ଦେଇନାହାଁନ୍ତି। ଖାର୍ଗେଙ୍କ ବାସଭବନରେ ଅନୁଷ୍ଠିତ ପ୍ରାୟ ଚାରି ଘଣ୍ଟିଆ ବୈଠକ ପାଇଁ ଗେହଲଟ ଏବଂ ପାଇଲଟ ଅଲଗା ଅଲଗା ସମୟରେ ପହଞ୍ଚିଥିଲେ। ଗେହଲଟ ସନ୍ଧ୍ୟା ପ୍ରାୟ ୬ଟା ବେଳେ ଖାର୍ଗେଙ୍କ ବାସଭବନକୁ ଆସିଥିଲେ ଏବଂ ପାଇଲଟ ପ୍ରାୟ ଦୁଇ ଘଣ୍ଟା ପରେ ସେଠାରେ ପହଞ୍ଚିଥିଲେ। କଂଗ୍ରେସ ସଂଗଠନର ସାଧାରଣ ସଚିବଙ୍କ ସହ ଗେହଲଟ ଏବଂ ପାଇଲଟ ଗଣମାଧ୍ୟମକୁ ସମ୍ବୋଧିତ କରିଥିଲେ। ଦୀର୍ଘ ସମୟ ପରେ ଉଭୟ ନେତା ଗଣମାଧ୍ୟମ ସମ୍ମୁଖରେ ଏକାଠି ହୋଇଥିଲେ।
ବୈଠକ ପରେ ଭେଣୁଗୋପାଲ ଗଣମାଧ୍ୟମକୁ କହିଛନ୍ତି, ରାଜସ୍ଥାନ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ନେତା ରାହୁଲ ଗାନ୍ଧୀ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ ସଚିନ ପାଇଲଟଙ୍କ ସହ ମିତ୍ରତା କରିଛନ୍ତି। ଆମେ ନିଷ୍ପତ୍ତି ନେଇଛୁ ଯେ କଂଗ୍ରେସ ଏହି ନିର୍ବାଚନରେ ମିଳିତ ଭାବେ ଲଢିବେ। ଉଭୟ(ଗେହଲଟ ଏବଂ ପାଇଲଟ) ରାଜି ହୋଇଥିବା ଜଣାପଡିଛି।
