ନୂଆଦିଲ୍ଲୀ,୨୪।୮: ୨୦୧୯ ଲୋକ ସଭା ନିର୍ବାଚନ ପରଠାରୁ କଂଗ୍ରେସ ଦଳର ପୂର୍ଣ୍ଣକାଳୀନ ସଭାପତି କିଏ ହେବ ସେନେଇ ଚର୍ଚ୍ଚା ଜାରି ରହିଛି। ସୋନିଆ ଗାନ୍ଧୀ କଂଗ୍ରେସର ସଭାପତି ରହିବେ ନା ଗାନ୍ଧୀ ପରିବାର ବାହାରେ ଥିବା କୌଣସି କଂଗ୍ରେସ ନେତା ଏହି ଦାୟିତ୍ୱ ଗ୍ରହଣ କରିବେ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ସୋନିଆ ଗାନ୍ଧୀ ଚିକିତ୍ସା ପାଇଁ ବିଦେଶ ଯିବା ପୂର୍ବରୁ କଂଗ୍ରେସର ବରିଷ୍ଠ ନେତା ତଥା ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କୁ ଡାକି କଂଗ୍ରେସ ସଭାପତି ହେବାକୁ ଅନୁରୋଧ କରିଥିବା ମଧ୍ୟ ଅନୁମାନ କରାଯାଉଛି।
କଂଗ୍ରେସ ସଭାପତି ହେବା ଚର୍ଚ୍ଚାକୁ ନେଇ ଗେହଲୋଟ କହିଛନ୍ତି, ଅଗଷ୍ଟ ୨୮ରେ ସିଡବ୍ଲ୍ୟୁସିର ବୈଠକ ଅନୁଷ୍ଠିତ ହେବାକୁ ଯାଉଛି। ଏଥିରେ କଂଗ୍ରେସ ସଭାପତି ପଦବୀ ଉପରେ ଆଲୋଚନା ହେବ।ପ୍ରତ୍ୟେକ କଂଗ୍ରେସ କର୍ମୀ ଚାହୁଁଛନ୍ତି ରାହୁଲ ଗାନ୍ଧୀ କଂଗ୍ରେସର ଦାୟିତ୍ୱ ନିଅନ୍ତୁ। କିନ୍ତୁ ସେ ଏହାକୁ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି।
ସୋନିଆ ଗାନ୍ଧୀଙ୍କୁ କାହିଁକି ଭେଟିବାକୁ ଯାଇଥିଲେ ପ୍ରଶ୍ନରେ ଗେହଲୋଟ ଥଟ୍ଟା କରି କହିଛନ୍ତି ଯେ, ଯଦି ସେ ସୋନିଆ ଜୀଙ୍କୁ ଭେଟିବେ ନାହିଁ, ତେବେ ସେ କ’ଣ ଭାଜପା ଅଧ୍ୟକ୍ଷ ଜେପି ନଡାଙ୍କୁ ଭେଟିବି। ସୋନିଆ ଜୀ ଆମ ଦଳର ସଭାପତି। ତେଣୁ ସ୍ବାଭାବିକ ଯେ ମୁଁ ତାଙ୍କୁ କେବଳ ଭେଟିବି।
