ଭଦ୍ରକ ଅଫିସ/ବାସୁଦେବପୁର,୧୯।୩(ଡି.ଏନ୍.ଏ.): ପଶ୍ଚିମା ଝଡ଼ ପ୍ରଭାବରେ ଭଦ୍ରକ ଜିଲାରେ ଘଡ଼ଘଡ଼ି ସହ ବର୍ଷା ସାଙ୍ଗକୁ କେତେକ ସ୍ଥାନରେ କୁଆପଥର ମାଡ଼ ହୋଇଛି। ବର୍ଷା ପାଣି କ୍ଷେତରେ ଜମି ରହିବାରୁ ସୂର୍ଯ୍ୟମୁଖୀ, ବିରି, ମୁଗ ଓ ପରିବା ଚାଷ କ୍ଷତିଗ୍ରସ୍ତ ହେବା ଆଶଙ୍କା ସୃଷ୍ଟି ହୋଇଛି। ରବିବାର ସକାଳୁ ଚାଷୀମାନେ କ୍ଷେତରୁ ପାଣି ଶୁଖାଇବାରେ ଲାଗିପଡ଼ିଥିବା ଦେଖିବାକୁ ମିଳିଛି।
ବନ୍ତ ବ୍ଲକ ଗୋପାଳପୁର ଓ ଗଣ୍ଡକୁରା ଅଞ୍ଚଳରେ ୫ ଏକରରୁ ଊର୍ଦ୍ଧ୍ୱ ଜମିରେ ସୂର୍ଯ୍ୟମୁଖୀ ଚାଷ ହୋଇଥିବା ବେଳେ ୨୫ରୁ ୩୦ ଏକର ଜମିରେ ବିରି, ମୁଗ ଏବଂ ୫୦ ଏକରରୁ ଊର୍ଦ୍ଧ୍ୱ ଜମିରେ ପନିପରିବା ଚାଷ ହୋଇଥିଲା। ବର୍ଷାରେ ପରିବା କ୍ଷେତରେ ପାଣି ଜମି ରହିଥିବାରୁ ପରିବା ନଷ୍ଟ ହେବାର ଆଶଙ୍କା ରହିଛି ବୋଲି ଗୋପାଳପୁରର ଚାଷୀ ରାଜକିଶୋର ଗିରି କହିଛନ୍ତି। ସେହିପରି ବାସୁଦେବପୁର ବ୍ଲକ ଓ ପୌରପାଳିକା ଅଞ୍ଚଳରେ ହୋଇଥିବା ବର୍ଷା ଓ କୁଆପଥର ପଡ଼ିବା ଫଳରେ ପନିପରିବା ଚାଷୀମାନେ କ୍ଷତିରେ ପଡ଼ିଛନ୍ତି। ବିଲ ଓ ଖାଲୁଆ ଜମିରେ ଚାଷ କରିଥିବା ଚାଷୀମାନେ ଆର୍ଥିକ କ୍ଷତିରେ ପଡ଼ିବା ସହ ସେମାନଙ୍କ ପରିବା କ୍ଷେତ ଉଜୁଡ଼ିଯିବାର ଆଶଙ୍କା ସୃଷ୍ଟି ହୋଇଛି। କ୍ଷେତରେ ବର୍ଷାପାଣି ଜମିରହିବା ଫଳରେ ପନିପରିବା ଗଛଗୁଡ଼ିକ ମରିଯିବା ଆଶଙ୍କା ଦେଖାଦେଇଛି। କେତେକ ଚାଷୀ ମଞ୍ଜି ବ୍ୟବସାୟ ପାଇଁ ଚାରା ରୋପଣ କରିଥିବା ବେଳେ ଚାରାତଳି ମଧ୍ୟ ନଷ୍ଟ ହୋଇଯାଇଛି।
