ମୁମ୍ବାଇ,୧।୧ : ଶିବସେନା ନେତା ସଞ୍ଜୟ ରାଉତ ରବିବାର ଦାବି କରିଛନ୍ତି ଯେ ଗତ ୨୦୨୨ ବର୍ଷ କଂଗ୍ରେସ ଏମ୍ପି ରାହୁଲ ଗାନ୍ଧୀଙ୍କ ନେତୃତ୍ୱକୁ ଏକ ନୂଆ ମୋଡ଼ ଦେଇଛି। ଯଦି ୨୦୨୩ରେ ମଧ୍ୟ ଏହି ଧାରା ଅବ୍ୟାହତ ରହେ, ତେବେ ଆଗାମୀ ଲୋକସଭା ନିର୍ବାଚନରେ ରାହୁଲଙ୍କ ଯୋଗୁ ଦେଶରେ ଏକ ବଡ ରାଜନୈତିକ ପରିବର୍ତ୍ତନ ହେବାର ସମ୍ଭାବନା ରହିଛି।
ଶିବସେନା ମୁଖପତ୍ର ସାମନାରେ ତାଙ୍କର ସାପ୍ତାହିକ ସ୍ତମ୍ଭ ରୋକଠୋକରେ ରାଉତ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଲୋକଙ୍କ ମଧ୍ୟରେ ଘୃଣା ଏବଂ ବିଭାଜନ ବୁଣିବା ଉଚିତ ନୁହେଁ। ସେ କହିଛନ୍ତି, ରାମ ମନ୍ଦିର ପ୍ରସଙ୍ଗ ବର୍ତ୍ତମାନ ସମାଧାନ ହୋଇଛି, ତେଣୁ ବର୍ତ୍ତମାନ ଏହି ପ୍ରସଙ୍ଗରେ ଆଉ ଭୋଟ ମଗା ଯାଇପାରିବ ନାହିଁ। ସେଥିପାଇଁ ଲଭ ଜିହାଦକୁ ଅସ୍ତ୍ର କରାଯାଉଛି ଏବଂ ହିନ୍ଦୁମାନଙ୍କ ମନରେ ଭୟ ସୃଷ୍ଟି କରିବାକୁ ଚେଷ୍ଟା କରାଯାଉଛି। ହିନ୍ଦୁମାନଙ୍କୁ ଜାଗ୍ରତ କରିବା ହେଉଛି ଭାଜପାର ଏଜେଣ୍ଡା। କିନ୍ତୁ ଏହାର ଅର୍ଥ ସମାଜରେ ଘୃଣା ଏବଂ ବିଭାଜନ ସୃଷ୍ଟି କରିବା ନୁହେଁ।
ସଞ୍ଜୟ ରାଉତ କହିଛନ୍ତି ଯେ ଶ୍ରଦ୍ଧା ୱାକର ଏବଂ ତୁନିଶା ଶର୍ମାଙ୍କ ମୃତ୍ୟୁ ଲଭ୍ ଜିହାଦ ନୁହେଁ। ତେବେ ସେ ଏହା ମଧ୍ୟ କହିଛନ୍ତି ଯେ କୌଣସି ସମ୍ପ୍ରଦାୟର ମହିଳାମାନେ ସେମାନଙ୍କ ପ୍ରତି ହେଉଥିବା ଅତ୍ୟାଚାରକୁ ବରଦାସ୍ତ କରିବା ଉଚିତ ନୁହେଁ। ରାଉତ କହିଛନ୍ତି, ଯାହା ଘଟୁଛି ତାହା ହେଉଛି କ୍ଷମତା ରାଜନୀତି। ଆଶା କରୁଛି ରାହୁଲ ଗାନ୍ଧୀଙ୍କ ଯାତ୍ରା ସଫଳ ହେବ ଏବଂ ଏହାର ଲକ୍ଷ୍ୟ ହାସଲ କରିବ ଏବଂ ଦେଶ ୨୦୨୩ ରେ ଭୟମୁକ୍ତ ହେବ।
ରାଉତ କହିଛନ୍ତି, ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଆମକୁ ସଂକୀର୍ଣ୍ଣ ମାନସିକତାଠାରୁ ଦୂରେଇ ରହିବା ଆବଶ୍ୟକ, କିନ୍ତୁ ପ୍ରକୃତ କଥା ହେଉଛି ଭାଜପା ଶାସନରେ ଏଭଳି ମନୋଭାବ ବୃଦ୍ଧି ପାଇଛି। ସେ କହିଛନ୍ତି, ବିରୋଧୀ ଦଳର ଅସ୍ତିତ୍ୱ ଏବଂ ଅଧିକାରକୁ ବର୍ତ୍ତମାନର ସରକାର ଗ୍ରହଣ କରିବାକୁ ଚାହୁଁନାହାଁନ୍ତି।
