ହରିପାଦ, ୧୮।୯ : ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସର ଭାରତ ଯୋଡ ଯାତ୍ରା ରବିବାର କେରଳର ହରିପାଦରୁ ଆରମ୍ଭ ହୋଇଛି। ଏଥିରେ ଶତାଧିକ ଦଳର କର୍ମୀ ଏବଂ ନେତା ଯୋଗ ଦେଇଛନ୍ତି। ଯାତ୍ରା ଏକାଦଶ ଦିନରେ ପ୍ରବେଶ କରିଛି। ଏହି ସମୟରେ ସୋସିଆଲ ମିଡିଆରେ ରାହୁଲଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି ଯେଉଁଥିରେ ସେ ଜଣେ ବାଳିକାକୁ ସାଣ୍ଡାଲ ପିନ୍ଧିବାରେ ସାହାଯ୍ୟ କରୁଥିବା ନଜର ଆସିଛନ୍ତି।
କୁହାଯାଉଛି ଯେ ଏହି ଭିଡିଓ ଆଲାପୁଜା ଜିଲାର ଅମ୍ବାଲାପୁଜା ସହରର। ରାହୁଲ ଦଳର ଅନ୍ୟ ନେତାଙ୍କ ସହ ରାସ୍ତାରେ ପଦଯାତ୍ରା କରୁଥିବା ସମୟରେ ଜଣେ ଲୋକ ଛୋଟ ଝିଅର ହାତ ଧରି ଯାଉଥିଲେ। ରାହୁଲ ତାଙ୍କୁ ଡାକି ଅଟକାଇ ଝିଅର ସାଣ୍ଡାଲ ଖୋଲା ଥିବା ସୂଚନା ଦେଇଛନ୍ତି। ଏହା ପରେ ସେ ନିଜେ ବାଳିକାଙ୍କୁ ସାଣ୍ଡାଲ ପିନ୍ଧାଇବା ଆରମ୍ଭ କରିଥିବାର ଦେଖିବାକୁ ମିଳୁଛି। ସୋସିଆଲ ମିଡିଆ ୟୁଜରମାନେ ରାହୁଲଙ୍କ ଏହି ସାହାଯ୍ୟକୁ ବହୁତ ପ୍ରଶଂସା କରିଛନ୍ତି।
ରାସ୍ତାର ଉଭୟ ପାର୍ଶ୍ୱରେ ଅପେକ୍ଷା କରିଥିବା ଲୋକଙ୍କୁ ଭେଟିବା ପାଇଁ ରାହୁଲ ସୁରକ୍ଷା କର୍ଡନ ଭାଙ୍ଗିଥିବାର ନଜର ଆସିଛନ୍ତି। ଏକ ଘଣ୍ଟାରୁ ଅଧିକ ଚାଲିବା ପରେ ସେ ରାସ୍ତାରେ ଥିବା ଏକ ହୋଟେଲରେ ଚା ’ପାଇଁ ଅଟକି ଥିଲେ।
