ଲଣ୍ଡନ/ନୂଆଦିଲ୍ଲୀ,୫ ।୩: କଂଗ୍ରେସ ଏମପି ରାହୁଲ ଗାନ୍ଧୀ ଶନିବାର ଲଣ୍ଡନରେ ମିଡିଆକୁ ସମ୍ବୋଧନ କରିବା ସମୟରେ ପୁଣିଥରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ତାଙ୍କ ସରକାର ଉପରେ ଖୁବ୍ ବର୍ଷିଛନ୍ତି । ପୂର୍ବତନ କଂଗ୍ରେସ ଅଧ୍ୟକ୍ଷ ଅଭିଯୋଗ କରିଛନ୍ତି, ଯଦି କେହି ପ୍ରଧାନମନ୍ତ୍ରୀ ମୋଦି ଓ ତାଙ୍କ ସରକାର ଉପରେ ପ୍ରଶ୍ନ ଉଠାଉଛି ତେବେ ତାଙ୍କୁ ଆକ୍ରମଣ କରାଯାଉଛି । ସେ ତାଙ୍କର ଏହି ବୟାନ ସପକ୍ଷରେ ବିବିସି ବିରୋଧରେ ଆୟକର ବିଭାଗର ସଦ୍ୟତମ ସର୍ଭେର ଉଦାହରଣ ଦେଇଥିଲେ ଓ କହିଥିଲେ ବ୍ରିଟିଶ ବ୍ରଡକାଷ୍ଟିଂ କର୍ପୋରେଶନ(ବିବିସି) ସହ ମଧ୍ୟ ଏମିତି ହୋଇଛି ।
ରାହୁଲ ଅଭିଯୋଗ କରିଛନ୍ତି, ଯେ ବିବିସି ବିରୋଧରେ ହୋଇଥିବା ସର୍ଭେ କାର୍ଯ୍ୟ ହେଉଛି ‘ଦେଶରେ ସ୍ୱର ଦମନ’ର ଏକ ଉଦାହରଣ । ସେଥିପାଇଁ ସେ ଶାସକ ଭାରତୀୟ ଜନତା ପାର୍ଟି(ଭାଜପା) ଦେଶବାସୀଙ୍କୁ ନିରବ କରିବାକୁ ଉଦ୍ୟମ କରିବା ବିରୋଧରେ ‘ଭାରତ ଯୋଡୋ ଯାତ୍ରା’କୁ ଅଭିବ୍ୟକ୍ତିର ସ୍ୱାଧିନତା ଭାବେ ଗ୍ରହଣ କରିଥିଲେ ।
