ଇସଲାମାବାଦ,୫ ।୩: ପାକିସ୍ତାନରେ ଭାରତର ଆଉ ଜଣେ ଶତ୍ରୁଙ୍କ ନିଧନ ହୋଇଛି । ଅଞ୍ଜାତ ବନ୍ଧୁକଧାରୀ ଖେବର ପଖତୁନୱାରେ ଆତଙ୍କବାଦୀ କମାଣ୍ଡର ସୈୟଦ ନୁର ଶାଲେବାରଙ୍କୁ ଦିନ ଦ୍ୱିପ୍ରହରରେ ଗୁଳି କରି ହତ୍ୟା କରିଛନ୍ତି । ଏହା ପୂର୍ବରୁ ଖାଲିଦ ରଜା ଓ ବଶିର ଅହମଦଙ୍କୁ ବି ପାକିସ୍ତାନରେ ହତ୍ୟା କରାଯାଇଛି । ଏହି ୩ ଜଣ ହିଁ ଭାରତରେ ଘଟିଥିବା ଆତଙ୍କବାଦୀ ଆକ୍ରମଣର ମାଷ୍ଟର ମାଇଣ୍ଡ ଥିଲେ ।
ଏହାପରେ ପାକିସ୍ତାନରେ ଲୁଚି ରହିଥିବା ଭାରତର କେତେଜଣ ଶତ୍ରୁ ଭୟଭୀତ ହୋଇଯାଇଛନ୍ତି । କାରଣ ଆତଙ୍କବାଦୀ ସଲାହୁଦ୍ଦିନଙ୍କୁ ପାକିସ୍ତାନ ସେନା ସୁରକ୍ଷା ପାଇଁ ବୁଲେଟ ପ୍ରୁଫ କାର ବି ଦେଇଛି । ରିପୋର୍ଟ ଅନୁଯାୟୀ, ଦେବାଳିଆ ପାକିସ୍ତାନରେ ଏହି ଆତଙ୍କବାଦୀଙ୍କୁ ମାରିବାକୁ ନେଇ ନିଜକୁ ଦାୟୀ କରିଛି ସିନ୍ଧୁ ଦେଶ ରିଭୋଲ୍ୟୁସନାରୀ ଆର୍ମି ।
ସିନ୍ଧୁ ଦେଶ ରିଭୋଲ୍ୟୁସନାରୀ ଆର୍ମି ଏବେ ପାକିସ୍ତାନରେ ଅସ୍ତ୍ରଶସ୍ତ୍ର ବଳରେ ସ୍ୱାଧିନତା ହାସଲ କରିବାକୁ ଶପଥ ନେଇଛି । ଏହି କାରଣ ପାଇଁ ପାକିସ୍ତାନ ତା’ର ପାଳିତ ଆତଙ୍କବାଦୀଙ୍କ ହତ୍ୟାକୁ ନେଇ ଚିନ୍ତାରେ ପଡିଯାଇଛି । ଏହା ପୂର୍ବରୁ ସିନ୍ଧୁ ଦେଶ ରିଭୋଲ୍ୟୁସନାରୀ ଆର୍ମିର ଚର୍ଚ୍ଚା ସେବେ ହୋଇଥିଲା ଯେତେବେଳେ ସେପ୍ଟେମ୍ବର ୨୦୨୨ରେ କରାଚିରେ ଏକ ଚାଇନା ଡେଣ୍ଟାଲ କ୍ଲିନିକ ଉପରେ ଆକ୍ରମଣ ହୋଇଥିଲା । ସେହି ଆକ୍ରମଣରେ ରୋନାଲ୍ଡ ରେମଣ୍ଡ ଚାଉ ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଥିଲା ଓ ଡାକ୍ତର ରିଚାର୍ଡ ହୁ ଓ ତାଙ୍କ ପତ୍ନୀ ଫ୍ୟାନ ଟେୟିନ ଗୁରୁତର ଆହତ ହୋଇଥିଲେ । ଅନ୍ତର୍ଜାତୀୟ ସ୍ତରରେ ଏହା ଚର୍ଚ୍ଚାର ବିଷୟ ହୋଇଥିଲା ।
