ନୂଆଦିଲ୍ଲୀ, ୬।୮ : ଶୁକ୍ରବାର ଦରଦାମ ବୃଦ୍ଧି, ବେକାରୀ ଏବଂ ଜିଏସଟି ବିରୋଧରେ କଂଗ୍ରେସ ପକ୍ଷରୁ ପ୍ରଦର୍ଶନ କରାଯାଇଥିଲା। ଏହା ପରେ ଦଳର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଏବଂ ରାଷ୍ଟ୍ରୀୟ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ବହୁ ନେତାଙ୍କୁ ଗିରଫ କରାଯାଇଥିଲା। ଦଳର ପ୍ରଦର୍ଶନରେ ଅଂଶଗ୍ରହଣ କରିଥିବା ନେତାମାନେ କଳା ପୋଷାକ ପିନ୍ଧିଥିଲେ। ରାହୁଲ ପୋଲିସ ବିରୋଧରେ ଅଭିଯୋଗ ଆଣି କହିଥିଲେ ସେମାନେ କେତେକ ଏମ୍ପିଙ୍କ ସହିତ ହାତାହାତି ହୋଇଥିଲେ। ଏହାକୁ ନେଇ ଭାଜପା ପକ୍ଷରୁ ଶନିବାର ରାହୁଲ ଏବଂ ପ୍ରିୟଙ୍କାଙ୍କୁ ନାଟକ ରାଜନୀତି କରିଥିବା ଅଭିଯୋଗ କରାଯାଇଛି।
ଭାଜପା ଆଇଟି ୱିଙ୍ଗ ଦାୟିତ୍ୱରେ ଥିବା ଅମିତ ମାଲବ୍ୟ କଂଗ୍ରେସର ପ୍ରଦର୍ଶନର ଏକ ଫଟୋ ଟୁଇଟର ଶେୟାର କରିଛନ୍ତି। ଯେଉଁଥିରେ ରାହୁଲ ଗାନ୍ଧୀ ଏବଂ ଦୀପେନ୍ଦର ହୁଡ୍ଡା ଦିଲ୍ଲୀ ପୋଲିସ କର୍ମଚାରୀଙ୍କ ସହ ଧସ୍ତାଧସ୍ତି ହେଉଥିବା ଦେଖିବାକୁ ମିଳିଛି। ମାଲବ୍ୟ ତାଙ୍କ ଟୁଇଟରେ ଲେଖିଛନ୍ତି ଯେ କଂଗ୍ରେସ ନେତା ରାହୁଲ ତାଙ୍କ ସହକର୍ମୀ ଦୀପେନ୍ଦରଙ୍କ ଶର୍ଟ ଚିରି ଦେଇଛନ୍ତି। ଯାହାଦ୍ୱାରା ଏକ ଭଲ ଫଟୋ ପ୍ରସ୍ତୁତ ହୋଇ ପାରିବ। ମାତ୍ର ସେ ଏଥିପାଇଁ ଦିଲ୍ଲୀ ପୋଲିସକୁ ଦାୟୀ କରିଛନ୍ତି।
ଏହାପୂର୍ବରୁ ଅନ୍ୟ ଏକ ଟୁଇଟରେ ମାଲବ୍ୟ ଦାବି କରିଛନ୍ତି ଯେ ବିରୋଧ ସମୟରେ କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଡ୍ୟୁଟିରେ ଥିବା ପୋଲିସଙ୍କରର ହାତ ମୋଡ଼ିବା ସହିତ ତାଙ୍କୁ ଗୋଇଠା ମାରିଥିଲେ। ସେପଟେ କଂଗ୍ରେସର ବିରୋଧ ପ୍ରଦର୍ଶନକୁ ନେଇ ଦିଲ୍ଲୀ ପୋଲିସ ତୁଗଲକ ରୋଡ ପୋଲିସ ଷ୍ଟେଶନରେ ମାମଲା ରୁଜୁ କରିଛି। ଅଧିକାରୀମାନେ ଏ ସମ୍ପର୍କରେ ସୂଚନା ପ୍ରଦାନ କରିଛନ୍ତି।
ନୂଆଦିଲ୍ଲୀ ଡେପୁଟି କମିଶନର ଅଫ ପୋଲିସ ଅମୃତା ଗୁଗୁଲୋଥ କହିଛନ୍ତି ଯେ ଭାରତୀୟ ଦଣ୍ଡବିଧି ସଂହିତା (ଆଇପିସି) ର ଧାରା ୧୮୬ (ସରକାରୀ କର୍ମଚାରୀଙ୍କୁ ସରକାରୀ କାର୍ଯ୍ୟରୁ ନିବୃତ୍ତ କରିବା), ୧୮୮ (ସରକାରୀ କର୍ମଚାରୀଙ୍କ ଆଦେଶକୁ ଅବମାନନା), ୩୩୨ (ସରକାରୀ କର୍ମଚାରୀ ତାଙ୍କ କାର୍ଯ୍ୟ କରିବାରୁ ରୋକିବା) ଏବଂ ଧାରା ୩୪ (ଉଦ୍ଦେଶ୍ୟମୂଳକ ଭାବେ ସରକାରୀ କର୍ମଚାରୀଙ୍କ କାର୍ଯ୍ୟରେ ବାଧା) ଅନୁଯାୟୀ ଏକ ମାମଲା ରୁଜୁ ହୋଇଛି।
ନୂଆଦିଲ୍ଲୀ ଜିଲାରେ ନିଷେଧାଦେଶ ଲାଗୁ ହୋଇଥିବାରୁ ଜାତୀୟ ରାଜଧାନୀରେ ବିକ୍ଷୋଭ ପ୍ରଦର୍ଶନ କରିବାକୁ କଂଗ୍ରେସକୁ ଅନୁମତି ଦେବାକୁ ଦିଲ୍ଲୀ ପୋଲିସ ମନା କରିଦେଇଥିଲା। ଶୁକ୍ରବାର ଦିଲ୍ଲୀର ଲୁଟିୟନ୍ସରୁ ୬୫ ଏମ୍ପିଙ୍କ ସମେତ ୩୦୦ ରୁ ଅଧିକ ପ୍ରଦର୍ଶନକାରୀଙ୍କୁ ପୋଲିସ ଗିରଫ କରିଥିଲା।
