ନୂଆଦିଲ୍ଲୀ, ୧୬।୧୨: ଦେଶର ପ୍ରାୟ ସମସ୍ତ ପ୍ରମୁଖ ରାଜନୈତିକ ଦଳ ସହ କାମ କରିଥିବା ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର (ପିକେ) ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସହ କାମ କରିବାକୁ ଇଚ୍ଛା ପ୍ରକାଶ କରିଛନ୍ତି। ବର୍ତ୍ତମାନ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପାଇଁ କାର୍ଯ୍ୟ କରୁଥିବା ପ୍ରଶାନ୍ତ କିଶୋର ଏକ ନ୍ୟୁଜ ଚ୍ୟାନେଲକୁ ଦେଇଥିବା ସାକ୍ଷାତକାରରେ ଖୋଲାଖୋଲି ଭାବେ ନିଜର ମତ ପ୍ରକାଶ କରିଛନ୍ତି ।
ତେବେ କଂଗ୍ରେସକୁ ଲଗାତାର ଟାର୍ଗେଟ୍ କରୁଥିବା ପିକେଙକ୍କ କଥା ଏବେ ଦଳିଯାଇଛି। ସେ କହିଛନ୍ତି ଯେ, କଂଗ୍ରେସ ବିନା ଦୃଢ଼ ବିରୋଧର ସମ୍ଭାବନା କମ। ଏକ ପ୍ରଶ୍ନର ଉତ୍ତରରେ ପିକେ ଏହା ମଧ୍ୟ କହିଛନ୍ତି ଯେ ୨୦୧୭ ତୁଳନାରେ ୨୦୨୨ ମସିହାରେ ଭାଜପା ଉତ୍ତରପ୍ରଦେଶରେ ଅଧିକ ଆସନ ଆଣିପାରେ।
ଟାଇମ୍ସ ନାଓ’ର ଫ୍ରାଙ୍କଲି ସ୍ପିକିଙ୍ଗ ଶୋ’ର ରାପିଡ୍ ଫାୟାର ରାଉଣ୍ଡରେ ପ୍ରଶାନ୍ତ କିଶୋରଙ୍କୁ ଅନେକ ପ୍ରଶ୍ନ ପଚରାଯାଇଥିଲା, ଯାହା ସେ ନିଜ ଅନୁଯାୟୀ ଉତ୍ତର ଦେଇଥିଲେ। ଏହି ସମୟରେ ଯେତେବେଳେ ତାଙ୍କୁ ପଚରାଗଲା ଯେ ସେ କେଉଁ ନେତା ଯାହାଙ୍କ ସହ ସେ ପୁଣି କାମ କରିବାକୁ ଚାହୁଁଛନ୍ତି, ସେତେବେଳେ ସେ ନୀତୀଶ କୁମାରଙ୍କ ନାମ ନେଇଥିଲେ। ସେହିପରି ତାଙ୍କୁ ପଚରାଗଲା ଯେ ନୀତୀଶଙ୍କ ସହ ତାଙ୍କର କଥାବାର୍ତ୍ତା ଅଛି କି ନାହିଁ, ସେତେବେଳେ ତାଙ୍କର ଉତ୍ତର ଥିଲା, ତାଙ୍କ ସହିତ ବାର୍ତ୍ତାଳାପ ମୋର ପ୍ରାୟ ହୋଇଥାଏ।
ଏହା ବ୍ୟତୀତ ପ୍ରଶାନ୍ତ କିଶୋରଙ୍କୁ ମଧ୍ୟ ପଚରାଯାଇଥିଲା ଯେ ସେ କେଉଁ ନେତାଙ୍କ ସହ କାମ କରିବାକୁ ଚାହାଁନ୍ତି ନାହିଁ। ଏହି ପ୍ରଶ୍ନ ପାଇଁ ତାଙ୍କୁ ରାହୁଲ ଗାନ୍ଧୀ, ଅମରିନ୍ଦର ସିଂ, ନୀତୀଶ କୁମାର ଏବଂ ମମତା ବାନାର୍ଜୀଙ୍କ ନାମ ମଧ୍ୟରେ ଚୟନ କରିବାର ଥିଲା। ଉତ୍ତରରେ ପ୍ରଶାନ୍ତ କିଶୋର ଅମରିନ୍ଦର ସିଂଙ୍କ ନାମ ନେଇଥିଲେ।
ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ହୋଇପାରିବେ କି ନାହିଁ ପ୍ରଶ୍ନ ଉପରେ କିଶୋର ଉତ୍ତର ଦେଇଛନ୍ତି ଯେ ସେ ପ୍ରଧାନମନ୍ତ୍ରୀ ହୋଇପାରିବେ।
ଏଥିସହ ସେ କହିଛନ୍ତି ଯେ ଗାନ୍ଧୀ ପରିବାର ବିନା କଂଗ୍ରେସ ଦଳ ଚାଲିପାରିବ। ପ୍ରଶାନ୍ତ କିଶୋରଙ୍କୁ ମଧ୍ୟ ପଚରାଯାଇଥିଲା ଯେ ଗାନ୍ଧୀ ପରିବାର ଜଣେ ଅଣ-ଗାନ୍ଧୀ ନେତାଙ୍କ ନେତୃତ୍ୱରେ କଂଗ୍ରେସକୁ ଚାଲିବାକୁ ଅନୁମତି ଦେବେ କି ନାହିଁ। ସେ ଏହାର ଉତ୍ତର ହଁରେ ଦେଇଥିଲେ। ଏଥିସହ ସେ ତାଙ୍କ ଉତ୍ତରରେ ଆହୁରି ମଧ୍ୟ କହିଛନ୍ତି ଯେ ଯଦି କଂଗ୍ରେସର ବାକି ନେତାମାନେ ଚାହାଁନ୍ତି ତେବେ ଏହା ହୋଇପାରେ।
ଏଥି ସହ ରାହୁଲ ଏବଂ ପ୍ରିୟଙ୍କା ଗାନ୍ଧୀଙ୍କ ମଧ୍ୟରେ କଂଗ୍ରେସର ମୁଖ୍ୟ ଭାବରେ ଚୟନ କରିବା ପ୍ରଶ୍ନରେ ସେ କହିଛନ୍ତି ଯେ ରାହୁଲ ଗାନ୍ଧୀଙ୍କୁ ଏହାର ନେତା ଭାବରେ କଂଗ୍ରେସ ବାଛିଛି। ତେବେ ଶେଷରେ ଯେତେବେଳେ କିଶୋରଙ୍କୁ ପଚରାଯାଇଥିଲା ଯେ ସେ ଭବିଷ୍ୟତରେ କେଉଁ ରାଜନୈତିକ ଦଳରେ ଯୋଗ ଦେଇ ପାରିବେ। ସେ ମଜାଳିଆ ଢ଼ଙ୍ଗରେ କହିଛନ୍ତି ଯେ କୌଣସି ଦଳକୁ ଯିବା ଜରୁରୀ ନୁହେଁ, ସେ ମଧ୍ୟ ନିଜ ଦଳ ଆରମ୍ଭ କରିପାରିବେ।
