ଢାକା,୧୭ା୨: ବାଂଲାଦେଶରେ ମଙ୍ଗଳବାର ବିଏନ୍ପି (ବାଂଲାଦେଶ ନ୍ୟାଶନାଲିଷ୍ଟ ପାର୍ଟି) ସରକାର ଶପଥ ନେବ। ଦଳୀୟ ଅଧ୍ୟକ୍ଷ ତାରିକ୍ ରହମାନ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବା ସହିତ ତାଙ୍କ ମନ୍ତ୍ରିମଣ୍ଡଳର ଅନ୍ୟ ସଦସ୍ୟମାନେ ମଧ୍ୟ ଶପଥ ନେବେ। ଏଥିପାଇଁ ସରକାରୀ ସ୍ତରରେ ବିଜ୍ଞପ୍ତି ଜାରି କରାଯାଇଛି। ରହମାନଙ୍କ ମନ୍ତ୍ରିମଣ୍ଡଳରେ ହିନ୍ଦୁ ଏମ୍ପି ଗୋଏଶ୍ୱର ଚନ୍ଦ୍ର ରୟ ସ୍ଥାନ ପାଇବାକୁ ଯାଉଛନ୍ତି ବୋଲି ଚର୍ଚ୍ଚା ଆରମ୍ଭ ହୋଇଛି। ଏହି ନିର୍ବାଚନରେ ବିଏନ୍ପିର ୩ ହିନ୍ଦୁ ପ୍ରାର୍ଥୀ ବିଜୟୀ ହୋଇଥିଲେ। ସେମାନଙ୍କ ମଧ୍ୟରୁ ଗୋଏଶ୍ୱର ଢାକା-୩ ଆସନରୁ ଏମ୍ପି ହୋଇଥିଲେ। ଗୋଏଶ୍ୱର ଖାଲିଦା ଜିଆଙ୍କ ସରକାର ସମୟରେ ମନ୍ତ୍ରୀ ରହିଥିଲା ବେଳେ ଏବେ ବିଏନ୍ପିରେ ତାଙ୍କର ପ୍ରଭାବ ରହିଛି। ବିଏନ୍ପି ସରକାର ଶପଥ ନେବା ପୂର୍ବରୁ ସୋମବାର ଅନ୍ତରୀଣ ସରକାର ମୁଖ୍ୟ ମହମ୍ମଦ ୟୁନୁସ୍ ତାଙ୍କ ପଦରୁ ଇସ୍ତଫା ଦେଇଛନ୍ତି।
