ଚେନ୍ନାଇ,୧୭।୪: ଓସ୍କାର ବିଜେତା ସଙ୍ଗୀତକାର ଏ.ଆର. ରହମାନ ଚେନ୍ନାଇ ସୁପର କିଙ୍ଗ୍ସ ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ୨୦୦୧ର ଫିଲ୍ମ ‘ଲଗାନ’ର ଲୋକପ୍ରିୟ ଗୀତ ‘ଚଲେ ଚଲୋ’ ଗୀତ ଉତ୍ସର୍ଗ କରିଛନ୍ତି। ସେହିପରି ଚେନ୍ନାଇର ତାରକା ବ୍ୟାଟ୍ସମ୍ୟାନ ସୁରେଶ ରାଇନାଙ୍କୁ ୧୯୯୫ର ବଲିଉଡ ସିନେମା ‘ରଙ୍ଗିଲା’ର ହିଟ୍ ଗୀତ ‘ମାଙ୍ଗତା ହେ କ୍ୟା’ ଉତ୍ସର୍ଗ କରିଛନ୍ତି। ଏହି ଦୁଇଟି ଫିଲ୍ମରେ ରହମାନ ସଙ୍ଗୀତ ନିର୍ଦ୍ଦେଶନା ଦେଇଥିଲେ। ଏକାଠି ଖେଳିବା ପାଇଁ ଓ ଚେନ୍ନାଇର ଖେଳାଳିଙ୍କୁ ଉତ୍ସାହିତ କରିବା ପାଇଁ ରହମାନ ଏହି ଦୁଇଟି ଗୀତ ଦୁଇ ତାରକା ଖେଳାଳିଙ୍କୁ ଉତ୍ସର୍ଗ କରିଛନ୍ତି ବୋଲି କହିଛନ୍ତି। ବାଙ୍ଗାଲୋର ଯେତେବେଳେ ଯାଇଥାଏ ସେଠାରେ ଲୋକେ ରଙ୍ଗିଲାର ଗୀତ ଶୁଣିଥିବାର ଲକ୍ଷ୍ୟ କରିଛି ବୋଲି ରହମାନ କହିଛନ୍ତି।
ଏହାପୂର୍ବରୁ ଧୋନୀ ୪ କିମ୍ବା ୫ ନମ୍ବରରେ ବ୍ୟାଟିଂ କରିବା ଉଚିତ ବୋଲି ପୂର୍ବତନ କ୍ରିକେଟର ଗୌତମ ଗମ୍ଭୀର କହିଛନ୍ତି। ଏହାପରେ ଧୋନୀ ବ୍ୟାଟିଂ କଲେ କୌଣସି ଫାଇଦା ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଧୋନୀ ସାଧାରଣତଃ ୭ ନମ୍ବରରେ ବ୍ୟାଟିଂ କରିବାକୁ ଆସିଥାନ୍ତି। ପ୍ରଥମ ମ୍ୟାଚ୍ରେ ଦିଲ୍ଲୀ ବିପକ୍ଷରେ ସେ ୨ଟି ବଲ୍ ଖେଳି ଖାତା ଖୋଲିପାରି ନ ଥିଲେ। ୧୮୯ ରନ ସଂଗ୍ରହ କରିଥିଲେ ମଧ୍ୟ ଚେନ୍ନାଇ ଏହି ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସଠାରୁ ପରାସ୍ତ ହୋଇଥିଲା। ଧୋନୀ ମଧ୍ୟ ନିଜ ସ୍ବାଭାବିକ ଢଙ୍ଗରେ ଆକ୍ରମଣାତ୍ମକ ବ୍ୟାଟିଂ କରିବା ଉପରେ ଧ୍ୟାନ ଦେବା ଉଚିତ ବୋଲି ଗମ୍ଭୀର କହିଛନ୍ତି।
