ଲକ୍ଷ୍ନୌ,୨୬ ।୨: ଉତ୍ତର ପ୍ରଦେଶ ବିଧାନସଭାର ପଞ୍ଚମ ପର୍ଯ୍ୟାୟ ଭୋଟଗ୍ରହଣରେ ପ୍ରତାପଗଡର କୁଣ୍ଡା ଆସନ ଏବେ ହଟ ସିଟ୍ ପାଲଟି ଯାଇଛି । କାରଣ ଏଠାରୁ ବାହୁବଳୀ ନେତା ରଘୁରାଜ ପ୍ରସାଦ ସିଂ ଓରଫ ରାଜା ଭ୍ରେୟା ଜନସତ୍ତା ପାର୍ଟି ପକ୍ଷରୁ ନିର୍ବାଚନ ମଇଦାନରେ ଅଛନ୍ତି । ଏପଟେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ କୁଣ୍ଡାକୁ ନେଇ ଯେଉଁ ଟିପ୍ପଣି ଦେଇଥିଲେ ତା’ର ଉତ୍ତର ରଖିଛନ୍ତି ରାଜା ଭୈୟା । ଏକ ସ୍ୱତନ୍ତ୍ର ସାକ୍ଷାତକାରରେ ସେ କହିଛନ୍ତି ଅଖିଳେଶ ଯାଦବ କୁଣ୍ଡାର ଜନତାଙ୍କ ପାଇଁ ଅପଶବ୍ଦ ବ୍ୟବହାର କରିଛନ୍ତି ।
କୁଣ୍ଡାରୁ କିଛିଥର ନିର୍ଦ୍ଦଳୀୟ ବିଧାୟକ ରହିଥିବା ରଘୁରାଜ ପ୍ରସାଦ ସିଂହ କହିଛନ୍ତି କୁଣ୍ଡା ଦେଶ ବିଦେଶରେ ପ୍ରସିଦ୍ଧ । କାରଣ ଏଠାକାର ଜନତା ଆମକୁ ବହୁତ ଭଲ ପାଆନ୍ତି । ହେଲେ ଅଖିଳେଶ ଯାଦବ କୁଣ୍ଡାକୁ ନେଇ ଯେଉଁ ଟିପ୍ପଣି ଦେଇଛନ୍ତି ‘କୁଣ୍ଡାର କୁଣ୍ଡାଇହେବା ବନ୍ଦକରି ଦେବେ, ଏହାକୁ ନେଇ ସେ ଅଖିଳେଶକୁ ଏତିକି କହିବାକୁ ଚାହିଁଛନ୍ତି କି କୁଣ୍ଡାର କୁଣ୍ଡାଇହେବା ବନ୍ଦ ହେବ ନାହିଁ । ଅଖିଳେଶ ଯାଦବ କାହିଁକି ଅସନ୍ତୁଷ୍ଟ ତାହା ମୋତେ ଜଣାନାହିଁ ବୋଲି ରାଜା ଭୈୟା କରିଛନ୍ତି । ହେଲେ ମୁଁ କାହା ସମ୍ପର୍କରେ ଅପଶବ୍ଦ ବ୍ୟବହାର କରୁନାହିଁ ବୋଲି ସେ କହିଛନ୍ତି । ଅନ୍ୟପଟେ ନିଜର ବିଜୟକୁ ନେଇ ସେ ସୁନିଶ୍ଚିତ ଥିବା ପ୍ରକାଶ କରିଛନ୍ତି ।
