କୋରେଇ,୪ା୫(ଡି.ଏନ.ଏ.): ଗଛ ଡାଳରେ ଝୁଲୁଛି ପିଜୁଳି, ସପେଟା, ଆମ୍ବ ଏବଂ ସେଓ। ଧୀର ପବନରେ ଝୁଲିଝୁଲି ସତେ ଯେପରି ଆନନ୍ଦରେ ନାଚୁଛି ସେଓ ପେନ୍ଥା। ଏହା କଶ୍ମୀର କିମ୍ବା ଅନ୍ୟ କୌଣସି ରାଜ୍ୟର ଦୃଶ୍ୟ ନୁହେଁ। ଏହା ହେଉଛି ଯାଜପୁର ଜିଲା କୋରେଇ ବ୍ଲକ ଅନ୍ତର୍ଗତ ବନ୍ଦାଳୋ ପଞ୍ଚାୟତରେ ଥିବା ଫଳ ବଗିଚାର ଦୃଶ୍ୟ। ଏଭଳି ଫଳ ଚାଷ କରି ଅସମ୍ଭବକୁ ସମ୍ଭବ କରି ଦେଖାଇଛନ୍ତି ବନ୍ଦାଳୋ ପଞ୍ଚାୟତର ରବୀନ୍ଦ୍ର ନାୟକ(୫୫)। ଯାଜପୁର ମାଟିରେ ସେଓ ଚାଷ କରି ଅନେକ ଚାଷୀଙ୍କ ପାଇଁ ସେ ଉଦାହରଣ ସୃଷ୍ଟି କରିଛନ୍ତି। ରବୀନ୍ଦ୍ରଙ୍କୁ କୌଣସି ସରକାରୀ ସାହାଯ୍ୟ ମିଳି ନ ଥିଲେ ମଧ୍ୟ ସେ ପଛଘୁଞ୍ଚା ନ ଦେଇ ନିଜ କର୍ମକ୍ଷେତ୍ରରେ ଆଗେଇ ଚାଲିଛନ୍ତି। ନିଜ ବାଡ଼ିରେ ବିଭିନ୍ନ ପ୍ରକାରର ଆମ୍ବ, ପିଜୁଳି, ସପେଟା, ଅମୃତଭଣ୍ଡା ଆଦି ଚାଷ କରିବା ସହ ଏବେ ସେଓ ଚାଷ କରି ଅନେକ ଲୋକଙ୍କ ପାଇଁ ରୋଜଗାର ସୃଷ୍ଟି କରିଛନ୍ତି।
ରବୀନ୍ଦ୍ର ପ୍ରଥମେ ପନିପରିବା ଚାଷ ସହ ଆମ୍ବ, ପିଜୁଳି ଚାଷ କରୁଥିଲେ। ପରେ ସେ ଓଡ଼ିଶା ବାହାରର ଏକ ସେଓ ବଗିଚାକୁ ଯାଇ ସେଠାରୁ ସେଓ ଚାଷ ଦେଖିଥିଲେ। ଏଣୁ ସେ ନିଜେ ସେଓ ଚାଷ କରିବାର ଚିନ୍ତା କରି ବହୁ ଆଶାଆଶଙ୍କା ମଧ୍ୟରେ ଏକ ବର୍ଷ ପୂର୍ବେ ପରୀକ୍ଷାମୂଳକ ଭାବେ ୬୦ ସେଓ ଗଛ ଆଣି ଲଗାଇଥିଲେ। ଏହାଦେଖି ଗ୍ରାମବାସୀ ରବୀନ୍ଦ୍ରଙ୍କୁ ସମାଲୋଚନା କରିବା ସହ ଯାଜପୁରରେ ସେଓ ଫଳାଇବା ଅସମ୍ଭବ ବୋଲି କହିଥିଲେ। ଏହାକୁ ଭ୍ରୂକ୍ଷେପ ନ କରି ରବୀନ୍ଦ୍ର ପ୍ରାୟ ଏକ ବର୍ଷ ମୁଣ୍ଡ ଝାଳ ତୁଣ୍ଡରେ ମାରି ପରିଶ୍ରମ କରିବା ପରେ ଶେଷରେ ଚଳିତବର୍ଷ ଗଛରେ ସେଓ ଫଳିଛି। ସେଓ ଗଛରେ ପ୍ରଚୁର ପରିମାଣର ସେଓ ଫଳିବା ଯୋଗୁ ଗଛ ପ୍ରତି ବିପଦ ଆଶଙ୍କା କରି ରବୀନ୍ଦ୍ର ଅଳ୍ପ ସେଓ ରଖି ବାକି ସବୁକୁ ତୋଳି ଦେଉଛନ୍ତି।
ଏହି ସେଓ ଚାଷ ବିଷୟରେ ଜାଣିବା ପରେ ଯାଜପୁର ଜିଲାର ବିଭିନ୍ନ ଅଞ୍ଚଳ ସହ ଅନେକ ଜିଲାରୁ ଚାଷୀ ଆସି ରବୀନ୍ଦ୍ରଙ୍କ ସେଓ ବଗିଚା ବୁଲି ଦେଖିବା ସହ ବେଶ୍ ପ୍ରଶଂସା କରୁଛନ୍ତି। ଚଳିତ ବର୍ଷ ପ୍ରଥମ କରି ସେଓ ଫଳିଥିବାବେଳେ ସେଓକୁ ଛାଡ଼ି ଅନ୍ୟ ସମସ୍ତ ଫଳ ଚାଷରୁ ଖର୍ଚ୍ଚ ଯିବା ପରେ ବର୍ଷକୁ ପ୍ରାୟ ୫ ଲକ୍ଷ ଟଙ୍କା ଆୟ କରୁଥିବା ସେ ପ୍ରକାଶ କରିଛନ୍ତି। ଶୀତଳଭଣ୍ଡାର ଏବଂ ବଜାର ସମସ୍ୟାର ଅଭାବ ଥିବାରୁ ଅନେକ ଚାଷୀ ଚାଷ ଛାଡୁଥିବାବେଳେ ରବୀନ୍ଦ୍ର ଏବଂ ତାଙ୍କ ଭାଇ ପରିଶ୍ରମ କରି ସଫଳ ହୋଇଛନ୍ତି। ରବୀନ୍ଦ୍ର ନିଜ ଫଳ ବଗିଚାରେ ୪ ଜଣଙ୍କୁ ରୋଜଗାର ମଧ୍ୟ ଦେଇଛନ୍ତି। ଆଗକୁ ବିଭିନ୍ନ ପ୍ରକାର ଫଳଗଛ ଲଗାଇ ଏକ ନର୍ସରି ଆରମ୍ଭ କରିବାକୁ ସେ ଲକ୍ଷ୍ୟ ରଖିଛନ୍ତି ବୋଲି କହିଛନ୍ତି। ବର୍ତ୍ତମାନ ଯୁବପିଢ଼ି ବେକାରି ସମସ୍ୟା ନେଇ ଚିନ୍ତିତ ଥିବାବେଳେ ଚାକିରି ଖୋଜିବାରେ ସମୟ ନଷ୍ଟ ନ କରି ଚାଷ କରି ଭଲ ରୋଜଗାର କରିବାକୁ ରବୀନ୍ଦ୍ର ପରାମର୍ଶ ଦେଇଛନ୍ତି। ଅନ୍ୟପକ୍ଷରେ ସରକାରୀ ପ୍ରୋତ୍ସାହନ ଅଭାବରୁ ଚାଷୀମାନେ ଚାଷ ପାଇଁ ମନ ବଳାଉନାହାନ୍ତି। ଜିଲା ପ୍ରଶାସନ ଚାଷୀଙ୍କୁ ପ୍ରୋତ୍ସାହନ ଯୋଗାଇଦେଲେ ରବୀନ୍ଦ୍ରଙ୍କ ପରି ଅନେକ ଚାଷୀ ସୃଷ୍ଟି ହୋଇପାରନ୍ତେ ବୋଲି ମତପ୍ରକାଶ ପାଇଛି।
