ବଇଣ୍ଡା, ୨୬ା୯ (ଡି.ଏନ.ଏ.): ପାଖେଇ ଆସୁଛି ଦଶହରା ପର୍ବ। ଏଥିପାଇଁ ଶେଷ ହୋଇଆସୁଛି ପ୍ରସ୍ତୁତି। ମୂର୍ତ୍ତି, ମେଢ଼ ଓ ତୋରଣ ନିର୍ମାଣ ମଧ୍ୟ ଅନ୍ତିମ ପର୍ଯ୍ୟାୟରେ। ମଣ୍ଡପ ନିକଟରେ ଅସ୍ଥାୟୀ ଦୋକାନ ବଜାର ପଡ଼ିବା ଆରମ୍ଭ ହୋଇଥିବା ବେଳେ ସାଂସ୍କୃତିକ କାର୍ଯ୍ୟକ୍ରମ ପାଇଁ ବନ୍ଧାଯାଉଛି ଟେଣ୍ଟ। ଗତ ୨ ବର୍ଷ ହେଲା ଧୁମ୍ଧାମରେ ପୂଜା ହୋଇ ନ ଥିବାରୁ ଏଥର ଏହାକୁ ଅଧିକ ଆକର୍ଷଣୀୟ କରିବାକୁ ଲକ୍ଷ୍ୟ ରଖିଛି ଅନୁଗୋଳ ଜିଲା କିଶୋରନଗର ବ୍ଲକର ବାମୁର ପୂଜା କମିଟି। ଚଳିତବର୍ଷ ୫୫ବର୍ଷରେ ପଦାର୍ପଣ କରିବାକୁ ଯାଉଥିବା ଏହି କମିଟି ୧୦ ଲକ୍ଷ ଟଙ୍କାର ବଜେଟ୍ ରଖିଛି। ଚିତ୍ତାକର୍ଷକ ରାବଣ ପୋଡ଼ି ପାଇଁ ୪୦ ଫୁଟ ଉଚ୍ଚତାର ରାବଣ ପିତୁଳା ପ୍ରସ୍ତୁତ କରାଯାଉଛି। ଏହା ହିଁ ପୂଜାର ପ୍ରମୁଖ ଆକର୍ଷଣ ହେବ ବୋଲି କମିଟି ପକ୍ଷରୁ କୁହାଯାଇଛି।
କମିଟି କର୍ମକର୍ତ୍ତାମାନଙ୍କ କହିବା ଅନୁଯାୟୀ, ୧୯୬୭ ମସିହାରେ ଗ୍ରାମରେ ପ୍ରଥମ କରି ଦୁର୍ଗାପୂଜା ଆରମ୍ଭ ହୋଇଥିଲା। ଗ୍ରାମର କରୁଣାକର ପ୍ରଧାନ, ପ୍ରସାଦି ପ୍ରଧାନ, ବାଶିଷ୍ଠ ପ୍ରଧାନ, ଜିତ ପ୍ରଧାନ, ଯତୀନ୍ଦ୍ର ନାଥ ପ୍ରଧାନ ଏକ ମାଟି ଘରେ ମା’ ଦୁର୍ଗାଙ୍କ ଫଟୋ ରଖି ପୂଜା କରିଥିଲେ। ଏଥିପାଇଁ ଖର୍ଚ୍ଚ ହୋଇଥିଲା ୧୨୦ ଟଙ୍କା। ଗ୍ରାମବାସୀଙ୍କ ଠାରୁ ଆଦାୟ ହୋଇଥିବା ଧାନ ଓ ଚାଉଳ ମାଧ୍ୟମରେ ଏହି ଅର୍ଥ ସଂଗ୍ରହ କରାଯାଇଥିଲା। ହେଲେ ସମୟ ଅନୁସାରେ ପୂଜା ଆୟୋଜନରେ ଅନେକ ପରିବର୍ତ୍ତନ ଆସିଛି। ବିଶେଷକରି ସାଜସଜ୍ଜା ଉପରେ ଅଧିକ ଗୁରୁତ୍ୱ ଦିଆଯାଉଥିବାରୁ ପ୍ରତିବର୍ଷ ଖର୍ଚ୍ଚ ବଢ଼ି ବଢ଼ି ଚାଲିଛି। କରୋନା ପାଇଁ ଗତ ୨ ବର୍ଷ ଧରି ପୂଜା ନିରାଡ଼ମ୍ବର ରହିଥିଲା। ଦର୍ଶକମାନେ ମଧ୍ୟ ପୂଜା ବୁଲି ମଜା ଉଠାଇପାରି ନ ଥିଲେ। ତେଣୁ ଏବର୍ଷ ପୂଜାକୁ ବ୍ଲକ ଅଞ୍ଚଳବାସୀ ଚାହିଁ ବସିଛନ୍ତି। ସେମାନଙ୍କ ଆଗ୍ରହକୁ ଦୃଷ୍ଟିରେ ରଖି ଚଳିତ ବର୍ଷ ମୂର୍ତ୍ତି ଓ ମେଢ଼ ସାଜସଜ୍ଜାକୁ ଆକର୍ଷଣୀୟ କରିବାକୁ ସମସ୍ତ ବ୍ୟବସ୍ଥା ହୋଇଛି। ବଇଣ୍ଡା ଅଞ୍ଚଳର ମୂର୍ତ୍ତି କାରିଗର ମୁରଲୀ ଶଙ୍ଖାରିଙ୍କ ଦ୍ୱାରା ସାଢେ ୭ ଫୁଟ ଉଚ୍ଚତାର ମୂର୍ତ୍ତି ନିର୍ମାଣ କରାଯାଉଛି। ୧୨ ଫୁଟ ଉଚ୍ଚତାର ମେଢ଼ କଟକ ଠାରେ ପ୍ରସ୍ତୁତ କରାଯାଉଛି। ସେହିପରି ପୂଜା ବେଳେ ଲୋକଙ୍କ ମନୋରଞ୍ଜନ ପାଇଁ ଯାତ୍ରା ପରିବେଷଣ କରାଯିବାକୁ କମିଟି ପକ୍ଷରୁ ନିଷ୍ପତ୍ତି ନିଆଯାଇଛି। ପ୍ରତ୍ୟେକ ଦିନ ୧ ହଜାର ଲୋକଙ୍କ ପାଇଁ ଅନ୍ନ ପ୍ରସାଦର ବ୍ୟବସ୍ଥା କରିବାକୁ ସ୍ଥିର କରାଯାଇଛି। ରାବଣ ପୋଡ଼ି ବାମୁର ପୂଜା ମଣ୍ଡପର ପ୍ରମୁଖ ଆକର୍ଷଣ ହୋଇଥିବାରୁ ଏଥିପାଇଁ ଜୋର୍ଦାର ପ୍ରସ୍ତୁତି ଚାଲିଛି। ୪୦ ଫୁଟ ଉଚ୍ଚତାର ରାବଣ ନିର୍ମାଣ ସହ ଆତସବାଜି ପ୍ରଦର୍ଶନ କରାଯିବ। ସେହିପରି ଭସାଣି ଉସବରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ କରାଯିବ। ବାମୁର ଗ୍ରାମବାସୀ, ମାହେଶ୍ୱରୀ ଅଟୋ ମାଲିକ ସଂଘ, ଟ୍ରକ୍ ମାଲିକ ସଂଘ କର୍ମକର୍ତ୍ତାମାନେ ପୂଜା ଆୟୋଜନରେ ଲାଗିପଡିଛନ୍ତି।
