ନୂଆଦିଲ୍ଲୀ, ୩ା୭ (ପି.ଟି.)-ଭାରତୀୟ ମହିଳା ସନ୍ତରଣକାରୀ ମାନା ପଟେଲ ଟୋକିଓ ଅଲିମ୍ପିକ୍ସରେ ଭାଗ ନେବେ। ‘ୟୁନିଭର୍ସାଲିଟି କୋଟା’ ଜରିଆରେ ସେ ଯୋଗ୍ୟତା ହାସଲ କରିଥିବା ସୁଇମିଂ ଫେଡେରେଶନ ଅଫ୍ ଇଣ୍ଡିଆ (ଏସ୍ଏଫ୍ଆଇ) ପ୍ରକାଶ କରିଛି। ମାନା ଟୋକିଓ ଗେମ୍ସରେ ୧୦୦ ମିଟର ବ୍ୟାକଷ୍ଟ୍ରୋକ୍ରେ ଅଂଶଗ୍ରହଣ କରିବେ। ସେ ତୃତୀୟ ଭାରତୀୟ ସନ୍ତରଣକାରୀ ଭାବେ ଅଲିମ୍ପିକ ଯୋଗ୍ୟତା ହାସଲ କରିଛନ୍ତି। ପୂର୍ବରୁ ଶ୍ରୀହରି ନଟରାଜନ ଓ ସଜନ ପ୍ରକାଶ ଉଭୟେ ‘ଏ’ କ୍ୱାଲିଫିକେଶନ ଟାଇମିଂ ସହ ଟୋକିଓ ଗେମ୍ସ ଟିକେଟ ହାସଲ କରିଛନ୍ତି। ୨୦୧୯ରେ ୨୧ ବର୍ଷୀୟା ମାନାଙ୍କ ଗୋଇଠି ଆଘାତପ୍ରାପ୍ତ ହୋଇଥିଲା। ଚଳିତ ବର୍ଷ ପ୍ରାରମ୍ଭରେ ସେ ସନ୍ତରଣକୁ ପ୍ରତ୍ୟାବର୍ତ୍ତନ କରିଛନ୍ତି। ଚଳିତବର୍ଷ ତାଙ୍କର ପ୍ରଥମ ଇଭେଣ୍ଟ ଥିଲା ଏପ୍ରିଲରେ ଉଜ୍ବେକିସ୍ତାନ ଓପନ ସୁଇମିଂ ଚାମ୍ପିୟନଶିପ୍। ସେ ୧୦୦ମିଟର ବ୍ୟାକଷ୍ଟ୍ରୋକ୍ରେ ୧:୦୪.୪୭ ସେକେଣ୍ଡ ଟାଇମିଂ ସହ ସ୍ବର୍ଣ୍ଣ ପଦକ ଲାଭ କରିଥିଲେ। ଟୋକିଓ ଗେମ୍ସ ପ୍ରସ୍ତୁତି ଲାଗି ସେ ନିକଟରେ ସର୍ବିୟା ଓ ଇଟାଲୀରେ ବିଭିନ୍ନ ଇଭେଣ୍ଟରେ ଭାଗ ନେଇଥିଲେ। ବେଲଗ୍ରେଡ୍ ଇଭେଣ୍ଟରେ ସେ ୧୦୦ ମିଟର ବ୍ୟାକ୍ଷ୍ଟ୍ରୋକ୍ରେ ନିଜ ଜାତୀୟ ରେକର୍ଡକୁ ଭଙ୍ଗ କରିଥିଲେ।
