ମସ୍କୋ,୧୯।୩ : ଅନ୍ତର୍ଜାତୀୟ ଅପରାଧିକ କୋର୍ଟ (ଆଇସିସି) ଦ୍ୱାରା ଗିରଫ ପରୱାନା ଜାରି ହେବା ପରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ପ୍ରଥମ ଥର ପାଇଁ ଲୋକ ଲୋଚନକୁ ଆସିଛନ୍ତି। ରବିବାର ପୁଟିନ ରୁଷିଆ ସେନା ଦ୍ୱାରା ଅଧିକୃତ ସହର ୟୁକ୍ରେନର ମାରିଆପୋଲ ପରିଦର୍ଶନ କରିଛନ୍ତି।
ମାରିଆପୋଲ ୟୁକ୍ରେନ୍ର ଡୋନେଟସ୍କ ଅଞ୍ଚଳରେ ଅବସ୍ଥିତ, ଯାହା ଗତ ବର୍ଷ ମେ ମାସଠାରୁ ମସ୍କୋ ସୈନ୍ୟବାହିନୀ ଦଖଲରେ ରହିଛି। ଟାସ ଏଜେନ୍ସି ରିପୋର୍ଟ କରିଛି ଯେ ପୁଟିନ ହେଲିକପ୍ଟର ଯୋଗେ ମାରିଅପୋଲକୁ ଯାଇଛନ୍ତି। ଏଜେନ୍ସି ଅନୁଯାୟୀ ପୁଟିନ କାର ଚଳାଇ ସହରର ବିଭିନ୍ନ ଅଞ୍ଚଳକୁ ଯାଇ ବାସିନ୍ଦାଙ୍କ ସହ କଥା ହୋଇଥିଲେ।
ମାରିଆପୋଲରେ ପୁଟିନ ତାଙ୍କର ସାମରିକ ଅପରେଶନର ଟପ କମାଣ୍ଡଙ୍କୁ ମଧ୍ୟ ଭେଟିଛନ୍ତି ବୋଲି ରଏଟର୍ସ ରିପୋର୍ଟ କରିଛି। ୟୁକ୍ରେନରେ ରୁଷିଆର ଆକ୍ରମଣର ଦାୟିତ୍ୱରେ ଥିବା ଜେନେରାଲ ଷ୍ଟାଫ ଭାଲେରୀ ଜେରାସିମୋଭଙ୍କୁ ସେ ମଧ୍ୟ ଭେଟିଥିଲେ।
ଏହାପୂର୍ବରୁ ମାର୍ଚ୍ଚ ୧୮ ରେ ପୁଟିନ ହଠାତ କ୍ରିମିୟାରେ ପହଞ୍ଚିଥିଲେ। ଏନେଇ ୟୁକ୍ରେନର ଆଭ୍ୟନ୍ତରୀଣ ବ୍ୟାପାର ମନ୍ତ୍ରୀଙ୍କ ପରାମର୍ଶଦାତା ଆଣ୍ଟୋନ ଗେର୍ଶେଙ୍କୋ ମଧ୍ୟ ପୁଟିନଙ୍କ ଏକ ଭିଡିଓ ସୋସିଆଲ ମିଡିଆରେ ଶେୟାର କରିଛନ୍ତି। ଭିଡିଓରେ ପୁଟିନ ତାଙ୍କ ସହାୟକମାନଙ୍କ ସହ ବୁଲୁଥିବାର ନଜର ଆସିଛନ୍ତି।
