ପୁରୁଷୋତ୍ତମପୁର,୨୮ା୮(ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଅଞ୍ଚଳରେ ଶାନ୍ତି ବଜାୟ ରଖିବା ଲାଗି ପୂଜା, ପାର୍ବଣକୁ ଗୁରୁତ୍ୱ ଦେଇ ପୁରୁଷୋତ୍ତମପୁର ପୋଲିସ କଡ଼ା ପଦକ୍ଷେପ ନେଇଛି। ଯେପରି ଅସାମାଜିକ କାର୍ଯ୍ୟକଳାପକୁ ଦମନ କରାଯିବା ସହ ଚୋରି ଡକାୟତି ରାହାଜାନିକୁ ଦୃଷ୍ଟିରେ ରଖି ଜନସାଧାରଣକୁ ସତର୍କ କରାଇ ପୁରୁଣା ଅପରାଧୀଙ୍କ ତାଲିକା ପ୍ରସ୍ତୁତ କରି ସେମାନଙ୍କ ଉପରେ ତୀକ୍ଷ୍ଣ ନଜର ଦଆଯାଇଛି। ଗଞ୍ଜାମ ପୋଲିସ ଜିଲାରେ ଜାରି ହୋଇଥିବା ୩୦ ଧାରାକୁ ଗୁରୁତ୍ୱ ଦେଇ ଆସନ୍ତା ଗଣେଶ ପୂଜା, ବିଶ୍ବକର୍ମା ପୂଜା, ଦୁର୍ଗାପୂଜା, ଦଶହରା, ଗଜଲକ୍ଷ୍ମୀ ପୂଜା ସମେତ ସଭାସମିତି, ଶୋଭାଯାତ୍ରା ଲାଗି କଟକଣା ଜାରି କରାଯାଇଛି। ଏହିସବୁ ଲାଗି ପୋଲିସ ପ୍ରଶାସନ ଓ ଜିଲା ପ୍ରଶାସନପଠାରୁ ଆଗୁଆ ଅନୁମତି ନେବା ବାଧ୍ୟତାମୂଳକ କରାଯାଇଛି। ଏହାକୁ ଖିଲାପ କଲେ ସମ୍ପୃକ୍ତ ବ୍ୟକ୍ତି ଓ ଅନୁଷ୍ଠାନ ବିରୋଧରେ ପୋଲିସ ପକ୍ଷରୁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ସ୍ପଷ୍ଟ ଭାବରେ ଜଣାଇ ଦିଆଯାଇଛି। ବିଶେଷକରି ଆସନ୍ତା ୧୪ ତାରିଖରେ ଗଣେଶ ପୂଜା ରହିଥିବାରୁ ବହୁସଂଖ୍ୟାରେ ପୂଜା ଓ ମେଢ଼ମାନ କରାଯାଉଛି। ଏହାସହ ମନଇଚ୍ଛା ଭାବରେ କିଏ କେତେବେଳେ ଭସାଣି କରୁଛନ୍ତି, ଯାହାଦ୍ବାରା ଶବ୍ଦ ପ୍ରଦୂଷଣ ସାଙ୍ଗକୁ ବିଶୃଙ୍ଖଳା ଦେଖାଦେଉଥିବା ନେଇ ପୋଲିସ ପକ୍ଷରୁ ଏଥିରେ କିଛିଟା ପରିବର୍ତ୍ତନ କରାଯାଇଛି। ପୂଜାମଣ୍ଡପ ଓ ଅନୁଷ୍ଠାନ ପୂଜାର ୭ ଦିନ ପୂର୍ବରୁ ଅନୁମତି ଲାଗି ଥାନାରେ ଆବେଦନ କରିବେ। ମନଇଚ୍ଛା ଭସାଣି ନ କରି ଏକ ସ୍ବତନ୍ତ୍ର ନିର୍ଦ୍ଧାରିତ ଦିବସ ପ୍ରକାରେ ସମସ୍ତ ପୂଜାମଣ୍ଡପର ମେଢ଼ଗୁଡ଼ିକ ଗୋଟିଏ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଭସାଣି କରାଯିବାର ବ୍ୟବସ୍ଥା କରାଯାଇଛି। ପୂଜାମଣ୍ଡପ ଓ ଅନୁଷ୍ଠାନ ପକ୍ଷରୁ ଅନୁମତି ଲାଗି ଆବେଦନ ଆସିବା ପରେ ତାହାକୁ ଦେଖି ସମସ୍ତଙ୍କୁ ନେଇ ଏକ ବୈଠକ କରି ଭସାଣି ଦିବସ ଓ ସମୟ ଧାର୍ଯ୍ୟ କରାଯିବା ନେଇ ଆଇଆଇସି କୁଳମଣି ସେଠୀ କହିଛନ୍ତି। ଏଥିଲାଗି ଅଞ୍ଚଳବାସୀ ପୋଲିସକୁ ସହଯୋଗ କରିବାକୁ ଅନୁରୋଧ କରିଛନ୍ତି।
