ପୁରୀ ଅଫିସ,୨୩ା୧୦: ଚାରିଧାମ ମଧ୍ୟରୁ ଅନ୍ୟତମ ହେଉଛି ପୁରୀ। ତେଣୁ ପୁରୀକୁ ସ୍ବଚ୍ଛ ଐତିହ୍ୟ ଧାମ ଭାବେ ଗଢି ତୋଳିବାକୁ ଜିଲା ପ୍ରଶାସନ ପକ୍ଷରୁ ‘ମୋ ଧାମ, ମୋ ଗର୍ବ ଅଭିଯାନ’ ଆରମ୍ଭ ହୋଇଛି। ଏହାର ରୂପରେଖ କ’ଣ ରହିବ ଓ ଏହାକୁ କିପରି ସଫଳ କରାଯିବ ସେ ନେଇ ଗୁରୁବାର ଟାଉନ ହଲ୍ରେ ଜିଲାପାଳ ବଲୱନ୍ତ ସିଂଙ୍କ ଅଧ୍ୟକ୍ଷତାରେ ଶିକ୍ଷୟିତ୍ରୀ ଶିକ୍ଷକ, ବିଭିନ୍ନ ଶିକ୍ଷାନୁଷ୍ଠାନ ମୁଖ୍ୟ, ସରକାରୀ ଅଧିକାରୀ ଏବଂ ବିଭିନ୍ନ ବିଭାଗର ଅଧିକାରୀଙ୍କୁ ନେଇ ପୃଥକ୍ ପୃଥକ୍ ବୈଠକ ଅନୁଷ୍ଠିତ ହୋଇଯାଇଛି। ଫନୀ ବିଧ୍ୱସ୍ତ ପୁରୀ ସହରକୁ ଠିଆ କରାଇବା, ମୋ ବିଚ୍ ଅଭିଯାନ ଏବଂ ସ୍ବର୍ଣ୍ଣାଭ ବେଳାଭୂମିକୁ ବ୍ଲୁ ଫ୍ଲାଗ୍ ବିଚ୍ ମାନ୍ୟତା ମିଳିବା ନେଇ ସହରବାସୀ ଯେଉଁ ସହଯୋଗ କରିଥିଲେ ସେଥିପାଇଁ ଜିଲାପାଳ ସମସ୍ତଙ୍କୁ ସାଧୁବାଦ ଜଣାଇଥିଲେ। ଏଥିସହ ପୁରୀକୁ ସ୍ବଚ୍ଛ ଐତିହ୍ୟ ଧାମ କରିବା ଲାଗି ସମସ୍ତଙ୍କ ସହଯୋଗ ଲୋଡ଼ିଥିଲେ। ପୁରୀବାସୀଙ୍କୁ ଏହି ଅଭିଯାନରେ ସାମିଲ ହେବାକୁ ଜିଲାପାଳ ଆହ୍ବାନ ଦେଇଥିଲେ।
‘ମୋ ଧାମ, ମୋ ଗର୍ବ ଅଭିଯାନ’ ନଭେମ୍ବର ପହିଲାରୁ ଏକ ସପ୍ତାହ ଧରି ଚାଲିବ। ଏଥିରେ ଛାତ୍ରୀଛାତ୍ରଙ୍କ ସମେତ ସବୁବର୍ଗର ଲୋକ ସାମିଲ ହେବେ। ପ୍ରତି ୱାର୍ଡରେ ସଚେତନତାଧର୍ମୀ କାର୍ଯ୍ୟକ୍ରମ କରାଯିବ। ପ୍ରତ୍ୟେକ ବ୍ୟକ୍ତି ଦସ୍ତଖତ ଅଭିଯାନ ମାଧ୍ୟମରେ ସହରକୁ ସ୍ବଚ୍ଛ ରଖିବାକୁ ଶପଥ ନେବେ। ଏହି ଅଭିଯାନ ଛାତ୍ରୀଛାତ୍ରଙ୍କୁ ନିଜ ଘର ଓ ଚାରିପାଖ ଆବର୍ଜନାମୁକ୍ତ ରଖିବାକୁ ପରାମର୍ଶ ଦେବ। ପ୍ରତ୍ୟେକ ଛାତ୍ରୀଛାତ୍ର ନିଜ ଅଭିଭାବକଙ୍କ ସହ ମିଶି ଆବର୍ଜନାମୁକ୍ତ ଅଭିଯାନରେ ସାମିଲ ଥିବା ନେଇ ମୋବାଇଲ ଫୋନ୍ରେ ଭିଡିିଓ ପ୍ରସ୍ତୁତ କରିପାରିବେ। ପ୍ରତି ଘରେ ଓଦା ଆବର୍ଜନା ପାଇଁ ସବୁଜ ରଙ୍ଗର ଡଷ୍ଟବିନ, ଶୁଖିଲା ପାଇଁ ନୀଳ, ସଂକ୍ରମିତ ଆବର୍ଜନା ପାଇଁ ନାଲି ଓ ହାନିକାରକ ଆବର୍ଜନା ଲାଗି କଳା ରଙ୍ଗର ଡଷ୍ଟବିନ ରଖିବେ। ଦୀପାବଳି ପୂର୍ବରୁ ସମସ୍ତ ୧୦ଟି ମାଇକ୍ରୋ କମ୍ପୋଷ୍ଟିଂ ସେଣ୍ଟର କାର୍ଯ୍ୟକ୍ଷମ କରାଯିବ। ସରକାରୀ କାର୍ଯ୍ୟାଳୟଗୁଡ଼ିକୁ ଆବର୍ଜନାମୁକ୍ତ ଓ ପରିଷ୍କାର ରଖାଯିବା ନେଇ ବିଭାଗୀୟ ମୁଖ୍ୟ ଦାୟିତ୍ୱ ନେବେ। ଆବର୍ଜନାମୁକ୍ତ ଓ ପରିଚ୍ଛନ୍ନ ଥିବା ସର୍ବୋତ୍କୃଷ୍ଟ ୩ଟି ଅଫିସକୁ ଦୀପାବଳି ପୂର୍ବରୁ ପୁରସ୍କୃତ କରାଯିବା ସହ ପ୍ରୋତ୍ସାହିତ ପାଇଁ ରାଜ୍ୟସ୍ତରକୁ ସୁପାରିସ କରାଯିବ। ନିଜ ଅନୁଷ୍ଠାନ ଓ କାର୍ଯ୍ୟାଳୟକୁ ପରିଛନ୍ନ ରଖିବା କ୍ଷେତ୍ରରେ ବିଫଳ ହେଲେ ସମ୍ପୃକ୍ତ ଅଧିକାରୀଙ୍କ ଦରମା ବନ୍ଦ ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏହି ଅଭିଯାନ ନେଇ ବିଭିନ୍ନ ଅନୁଷ୍ଠାନ କର୍ମକର୍ତ୍ତାଙ୍କ ସହଯୋଗ ଲୋଡ଼ାଯିବ। ବୈଠକରେ ନୂଆଦିଲ୍ଲୀସ୍ଥିତ ଫିଡ୍ ବ୍ୟାକ ଫାଉଣ୍ଡେଶନର ଜ୍ୟୋତି ପ୍ରକାଶ ଉକ୍ତ ଅଭିଯାନର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ ସୂଚନା ଦେଇଥିଲେ। ପୌରସଂସ୍ଥା ନିର୍ବାହୀ ଅଧିକାରୀ ବିଜୟ ଦାଶ, ସିଡିଏମ୍ଓ ଡା. ସୁଜାତା ମିଶ୍ର ପ୍ରମୁଖ ଉପସ୍ଥିତ ଥିଲେ।
