ନୂଆପଡ଼ା ଅଫିସ,୬।୧୨: ନୂଆପଡା ଜିଲାରେ ଚାଷୀ ସୁବିଧାରେ ଧାନ ବିକ୍ରୟ କରି ଉଚିତ ପାଉଣା ପାଇବା ପାଇଁ ନଭେମ୍ବର ୩୦ରୁ ଖରିଫ ଧାନ ସଂଗ୍ରହ ପାଇଁ ମଣ୍ଡି ଖୋଲାଯାଇଛି। ଜିଲାରେ ୨୬ଟି ପ୍ରାଥମିକ କୃଷି ସମବାୟ ସମିତିରୁ ୫୭ଟି ଓ ସ୍ବୟଂ ସହାୟକ ମହିଳା ଗୋଷ୍ଠି ମାଧ୍ୟମରେ ୧୫ଟି ମୋଟ ୭୨ଟି ମଣ୍ଡି ଖୋଲାଯାଇ ଖରିଫ ଧାନ କ୍ରୟ କରାଯାଉଛି। ହେଲେ ଜିଲାର କିଛି ମଣ୍ଡିରେ ୩ ରୁ ୫ କିଲୋଗ୍ରାମ ଧାନ କଟନୀ ଛଟନୀ କରୁଥିବା ଅଭିଯୋଗ ହେଉଛି। କୋମନା ବ୍ଲ ତରବୋଡ ମଣ୍ଡିରେ ୨ ରୁ ୩ କିଲୋଗ୍ରାମ ଧାନ କଟନୀ ଛଟନୀ ହେଉଥିବା ବେଳେ କାଣ୍ଡେତରା ମଣ୍ଡିରେ ୩ରୁ ୫ କିଲୋଗ୍ରାମ ଧାନ କଟନୀ ଛଟନୀ କରୁଛନ୍ତି। ଏହାକୁ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଉଛି। ବିନା କଟନୀ ଛଟନୀରେ ମିଲର୍ସ ଧାନ ନ ଉଠାଇବାରୁ ଚାଷୀ ବାଧ୍ୟ ହୋଇ ୩ କିଲୋଗ୍ରାମ ଧାନ କାଟିବା ପାଇଁ ମିଲର୍ସ ସହିତ ଚୁକ୍ତି କରିବା ପରେ କାଣ୍ଡେତରା ମଣ୍ଡିରୁ ଧାନ ଉଠାଣ ହେଉଛି। ମିଲର୍ସ ଚାଷୀଙ୍କୁ ଗନିବେଗ ଦେବାର ନିୟମ ରହିଥିଲେ ମଧ୍ୟ ତାହା ଦେଇନାହାନ୍ତି। ଚାଷୀ ବେଗ ପ୍ରତି ୩୫ ରୁ ୪୦ ଟଙ୍କାରେ କ୍ରୟ କରୁଛି। କୁଇଣ୍ଟଲ ପ୍ରତି ଦୁଇଟି ବେଗ ଓ ୩ କିଲୋଗ୍ରାମ ଧାନ ଚାଷୀ ଠାରୁ ମିଲର୍ସ ନେଉଛି। ଚାଷୀଙ୍କୁ ମିଲର୍ସ ଶୋଷଣ କରି ଚାଲିଛି। କୁଇଣ୍ଟାଲ ପ୍ରତି ଚାଷୀ ୧୩୦ରୁ ୧୪୦ ଟଙ୍କା କ୍ଷତି ସହୁଛି। ମିଲର୍ସମାନେ ବିନା କଟନୀ ଛଟନୀରେ ଚାଷୀମାନଙ୍କଠାରୁ ମଣ୍ଡିରୁ ଧାନ ଉଠାଇବେ। ଯେଉଁ ମିଲ ମାଲିକମାନେ ଚାଷୀଙ୍କ ଧାନରୁ କଟନୀ ଛଟନୀ କରୁଛନ୍ତି, ସେମାନଙ୍କୁ ତୁରନ୍ତ ଗିରଫ କରାଯିବ। ସେଥିରେ ସମ୍ପୃକ୍ତ ଅଧିକାରୀ କିମ୍ବା କର୍ମଚାରୀ ମଧ୍ୟ ବାଦ ପଡିବେନି ବୋଲି ରାଜ୍ୟ ସରକାର ଘୋଷଣା କରିଛନ୍ତି। ସରକାରଙ୍କ ଘୋଷଣା ପାଣିଗାର କି କାର୍ଯ୍ୟକାରୀ ହେଉଛି ଦେଖାଯାଉ ବୋଲି ଚାଷୀ ମହଲରେ ଚର୍ଚ୍ଚା ହେଉଛି।
