ଚଣ୍ଡିଗଡ,୧୪।୩: ପଞ୍ଜାବର ପରବର୍ତ୍ତୀ ମୁଖ୍ୟମନ୍ତ୍ରୀ ହେବା ପୂର୍ବରୁ ଏମ୍ପି ଭଗଓ୍ବନ୍ତ ମାନ ସୋମବାର ଦିଲ୍ଲୀରେ ପହଞ୍ଚି ନିଜ ପଦରୁ ଇସ୍ତଫା ଦେଇଛନ୍ତି। ସେ ନିଜେ କୁ ଯୋଗେ ଏହି ସୂଚନା ଦେଇଛନ୍ତି। ଲୋକସଭାରେ ପହଞ୍ଚିଥିବା ପରେ ମାନ କହିଛନ୍ତି ଯେ, ମୁଁ ଏହି ଗୃହକୁ ମିସ୍ କରିବି। ପଞ୍ଜାବ ମୋତେ ଏକ ବଡ଼ ଦାୟିତ୍ୱ ଦେଇଛି। କିନ୍ତୁ ମୁଁ ସାଙ୍ଗରୁର ଲୋକଙ୍କୁ ପ୍ରତିଶୃତି ଦେଉଛି ଯେ, ଖୁବ୍ଶୀଘ୍ର ଆପଣଙ୍କ ସ୍ବର ଗୃହରେ ପୁଣି ଉଠିବ। ଯେଉଁମାନେ ବିଶ୍ୱାସ କରି ଭୋଟ ଦେଇଥିଲେ ମୁଁ ସେମାନଙ୍କୁ ଧନ୍ୟବାଦ ଦେଉଛି।
ମନ ସୋମବାର ସଂସଦ ଅଧିବେଶନରେ ଯୋଗ ଦେଇ ଲୋକ ସଭା ବାଚସ୍ପତି ଓମ ବିର୍ଲାଙ୍କ ନିକଟରେ ତାଙ୍କ ଇସ୍ତଫା ପତ୍ର ଦାଖଲ କରିଛନ୍ତି। ପଞ୍ଜାବରେ ନିର୍ବାଚନ ପୂର୍ବରୁ ଆମ ଆଦମୀ ପାର୍ଟି ୪୮ ବର୍ଷିୟ ଭଗଓ୍ବନ୍ତ ମାନଙ୍କୁ ରାଜ୍ୟର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ଘୋଷଣା କରିଥିଲା। ସେ ମାର୍ଚ୍ଚ ୧୬ ରେ ମୁଖ୍ୟମନ୍ତ୍ରୀ ଭାବରେ ଶପଥ ଗ୍ରହଣ କରିବେ।
ସୂଚନାଯୋଗ୍ୟ,ପଞ୍ଜାବ ବିଧାନସଭା ନିର୍ବାଚନରେ ଆମ ଆଦମୀ ପାର୍ଟି ୧୧୭ଟି ସିଟ ମଧ୍ୟରୁ ୯୨ଟି ଜିତିଛି। ଧୁରୀ ବିଧାନସଭା ଆସନରୁ ମାନ ଜିତିବାରେ ସଫଳ ହୋଇଥିଲେ। ସେ କଂଗ୍ରେସ ପ୍ରାର୍ଥୀ ଦଲଭୀର ସିଂ ଗୋଲ୍ଡିଙ୍କୁ ୫୮,୨୯୬ ଭୋଟରେ ପରାସ୍ତ କରିଛନ୍ତି। ଭୋଟରଙ୍କୁ କୃତଜ୍ଞତା ଜଣାଇବା ପାଇଁ ଏଏପିର ସିପ୍ରିମୋ ଅରବିନ୍ଦ କେଜ୍ରିୱାଲ ଏବଂ ମାନ ରବିବାର ଅମୃତସରରେ ଏକ ରୋଡ ଶୋ କରିଥିଲେ।
