ଚଣ୍ଡିଗଡ଼,୩ ।୭: ପଞ୍ଜାବର ଆମ ଆଦମୀ ପାର୍ଟି(ଏଏପି)ସରକାର ସୋମବାର ତା’ର ମନ୍ତ୍ରିମଣ୍ଡଳର ବିସ୍ତାର କରିବ ବୋଲି ଅନୁମାନ କରାଯାଉଛି । ଏହି ମନ୍ତ୍ରିମଣ୍ଡଳରେ ଜଣେ ମହିଳା ସମେତ ଅତିକମରେ ୫ ଜଣ ବିଧାୟକଙ୍କୁ ମନ୍ତ୍ରୀପଦ ଦିଆଯାଇପାରେ ବୋଲି କୁହାଯାଉଛି । ଏହି ୫ ବିଧାୟକଙ୍କୁ ମୁଖ୍ୟମନ୍ତ୍ରୀ ଭଗୱନ୍ତ ମାନଙ୍କ ମନ୍ତ୍ରଣାଳୟରେ ସାମିଲ କରାଯାଇପାରେ । ଏହାପରେ ମୋଟ ମନ୍ତ୍ରୀଙ୍କ ସଂଖ୍ୟା ୧୫ ହୋଇଯିବ । ମିଳିଥିବା ସୂଚନା ଅନୁଯାୟୀ, ପଞ୍ଜାବର ରାଜ୍ୟପାଳ ବନୱାରି ଲାଲ ପୁରୋହିତଙ୍କୁ ପତ୍ର ଲେଖି ସୋମବାର ସନ୍ଧ୍ୟାରେ ଶପଥଗ୍ରହଣ ସମାରୋହ ପାଇଁ ସମୟ ମଗାଯାଇଛି ।
ତେବେ ମନ୍ତ୍ରିମଣ୍ଡଳ ସଂମ୍ପ୍ରସାରଣ ପୂର୍ବରୁ ଦିଲ୍ଲୀରେ ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ ଓ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଏଏପିର ସଂଯୋଜକ ଅରବିନ୍ଦ କେଜରିୱାଲଙ୍କ ମଧ୍ୟରେ ବୈଠକ ହୋଇଥିଲା । ୩ ଘଣ୍ଟାଧରି ଚାଲିଥିବା ଏହି ବୈଠକରେ ଯେଉଁ ବିଧାୟକଙ୍କୁ ମନ୍ତ୍ରିମଣ୍ଡଳରେ ସାମିଲ କରାଯିବ ସେମାନଙ୍କ ନାମକୁ ନେଇ ମନ୍ଥନ ହୋଇଥିଲା ।
