ଚଣ୍ଡିଗଡ଼, ୧୫।୨ : ଫେବୃୟାରୀ ୨୦ରେ ପଞ୍ଜାବର ୧୧୭ଟି ବିଧାନସଭା ଆସନରେ ମତଦାନ ଅନୁଷ୍ଠିତ ହେବାକୁ ଯାଉଛି। ନିର୍ବାଚନରେ ୧୩୦୪ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସେଥିମଧ୍ୟରୁ ଲୁଧିଆନାର ୧୪ ଆସନରେ ସର୍ବାଧିକ ୧୭୫ ପ୍ରାର୍ଥୀ ଚିର୍ବାଚନ ମଇଦାନରେ ରହିଛନ୍ତି। ସେହିପରି ଅମୃତସରର ୧୧ ଆସନରେ ୧୧୭ ଜଣ ପ୍ରାର୍ଥୀ ନିର୍ବାଚନ ଲଢୁଛନ୍ତି। ପଟିଆଲାର ୮ ଆସନରେ ୧୦୩ ଜଣ ପ୍ରାର୍ଥୀ ଅଛନ୍ତି।
ପ୍ରାର୍ଥୀ ମାନଙ୍କ ମଧ୍ୟରୁ ୩୧୫ ଜଣଙ୍କ ବିରୋଧରେ ବଳାତ୍କାର,ହତ୍ୟା ଅଭିଯୋଗ ଆଦି ରହିଛି। ସେଥିମଧ୍ୟରୁ ୨୧୮ ଜଣଙ୍କ ବିରୋଧରେ ଗୁରୁତର ଅଭିଯୋଗ ରହିଛି। ଶିରୋମଣୀ ଅକାଳୀ ଦଳର ସର୍ବାଧିକ ୬୮ ପ୍ରତିଶତ ପ୍ରାର୍ଥୀଙ୍କ ବିରୋଧ ଅପରାଧିକ ମାମଲା ରହିଛି। ଏହାପରେ ଆମ୍ ଆଦ୍ମୀ ପାର୍ଟିର ୫୦ ପ୍ରତିଶତ ପ୍ରାର୍ଥୀଙ୍କ ବିରୋଧରେ ବିଭିନ୍ନ ମାମଲା ରହିଛି। ଏହି ମାମଲାରେ
ତାଲିକାର ତୃତୀୟ ସ୍ଥାନରେ ଭାଜପା ରହିଛି। ଭାଜପାର ୩୮ ପ୍ରତିଶତ ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି। ଶିରୋମଣୀ ଅକାଳୀ ଦଳ(ସଂୟୁକ୍ତ)ର ୨୯ ପ୍ରତିଶତ ପ୍ରାର୍ଥୀଙ୍କ ବିରୋଧରେ ବିଭିନ୍ନ ମାମଲାର ରହିଥିବା ସେମାନେ ନାମାଙ୍କନ ପତ୍ର ଦାଖଲ ସମୟରେ କରିଥିବା ସତ୍ୟପାଠରୁ ଜଣାପଡ଼ିଛି। ବିଏସ୍ପିର ୧୫ ପ୍ରତିଶତ ଏବଂ କଂଗ୍ରେସର ୧୪ ପ୍ରତିଶତ ପ୍ରାର୍ଥୀଙ୍କ ବିରୋଧରେ ଅପରାଧିକ ମାମଲା ରହିଛି।
୨୦୧୭ ତୁଳନାରେ ୨୦୨୨ରେ ଅପରାଧିକ ପୃଷ୍ଠ ଭୂମିଥିବା ପ୍ରାର୍ଥୀଙ୍କ ସଂଖ୍ୟାରେ ବୃଦ୍ଧି ଘଟିଛି। ୨୦୧୭ରେ ଏହା ୯ ପ୍ରତିଶତ ଥିବାବେଳେ ୨୦୨୨୨ରେ ଏହା ୨୫ ପ୍ରତିଶତକୁ ବୃଦ୍ଧି ପାଇଛି।
