ଜୋହାନ୍ସବର୍ଗ,୪।୧:ଭାରତୀୟ କ୍ରିକେଟର୍ ଚେତେଶ୍ୱର ପୂଜାରାଙ୍କ କ୍ୟାରିୟର୍ ଏବେ ବିପଦଳରେ ରହିଛି। ଲଗାତାର ସେ ବ୍ୟାଟିଂ ଫ୍ଲପ୍ ସାବ୍ୟସ୍ତ ହୋଇଛନ୍ତି। ସୋସିଆଲ ମିଡିଆରେ ଲୋକମାନେ ତାଙ୍କୁ ଦଳରୁ ହଟାଇବାକୁ ଦାବି କରୁଛନ୍ତି। ପୂଜାରା ଦୀର୍ଘ ଦିନ ହେବ ଏକ ଶତକ ସ୍କୋର କରିନାହାଁନ୍ତି । ୨୦୨୧ ମସିହାରେ ମଧ୍ୟ ତାଙ୍କ ଚାଲି ନ ଥିଲା। ଏହା ସତ୍ତ୍ୱେ ସେ ଗତ ବର୍ଷ ବିଶ୍ୱର ଶ୍ରେଷ୍ଠ ପାଞ୍ଚ ରନ ସ୍କୋରର୍ ମଧ୍ୟରେ ରହିଥିଲେ।
୨୦୨୧ ମସିହାରେ, ପୂଜାରା ହାରାହାରି ୨୮.୦୮ରେ ୧୪ଟି ଟେଷ୍ଟରେ ୭୦୨ ରନ ସ୍କୋର କରିଥିଲେ। ସେ ୬ଟି ଅର୍ଦ୍ଧଶତକ ହାସଲ କରିଥିଲେ, କିନ୍ତୁ ତାଙ୍କ ଷ୍ଟ୍ରାଇକ ହାର ୩୪.୧୭ ଥିଲା। ତାଙ୍କର ମନ୍ଥର ଇନିଂସ ପାଇଁ ସେ ଅନେକ ଥର ସମାଲୋଚନାର ସମ୍ମୁଖୀନ ହୋଇଥିଲେ। ଦକ୍ଷିଣ ଆଫ୍ରିକା ବିପକ୍ଷ ଶେଷ ଟେଷ୍ଟରେ ପୂଜାରା ପ୍ରଥମ ଇନିଂସରେ ଶୂନ ଏବଂ ଦ୍ୱିତୀୟ ଇନିଂସରେ ୧୬ ରନ୍ ସ୍କୋର କରିଥିଲେ। ଏଥି ସହିତ ଜୋହାନ୍ସବର୍ଗର ଦ୍ୱିତୀୟ ଟେଷ୍ଟରେ ସେ ମାତ୍ର ତିନି ରନ ସ୍କୋର କରିପାରିଛନ୍ତି।
ଗତ ୧୦୦ ବର୍ଷ ମଧ୍ୟରେ ଏହା ଦ୍ୱିତୀୟ ଥର ପାଇଁ ଜଣେ ଖେଳାଳି ହାରାହାରି ୩୦ରୁ କମ ରନ ସ୍କୋର କରି ମଧ୍ୟ ବର୍ଷର ଟପ -୫ ସ୍କୋରରେ ହୋଇଛନ୍ତି। ପୂଜାରାଙ୍କ ପୂର୍ବରୁ ଅଷ୍ଟ୍ରେଲିଆର ପୂର୍ବତନ ବ୍ୟାଟ୍ସମ୍ୟାନ ନିଲ ହାର୍ଭେ ୧୯୫୬ରେ ଏହା କରିଥିଲେ। ୧୯୫୬ ମସିହାରେ ହାର୍ଭେ ହାରାହାରି ୨୮.୫୦ରେ ୪୫୬ ରନ ସ୍କୋର କରିଥିଲେ। ଏହା ସତ୍ତ୍ୱେ ସେ ସେହି ବର୍ଷ ଚତୁର୍ଥ ସର୍ବାଧିକ ରନ ସଂଗ୍ରହକାରୀ ହୋଇଥିଲେ।
