୫୪ ଦେଶର ୫୦୦ ସ୍ଥାନରେ ବିକ୍ଷୋଭ
7:40 amSeptember 16, 2023September 16, 2023 / 02

ବ୍ରସେଲ୍ସ,୧୬ା୯: ପୃଥିବୀକୁ ଉତ୍ତପ୍ତ କରୁଥିବା ଜୀବାଶ୍ମ ଇନ୍ଧନକୁ ପର୍ଯ୍ୟାୟକ୍ରମେ ହ୍ରାସ କରିବା ଦାବିରେ ୫୪ ଦେଶରେ ଜଳବାୟୁ ବିକ୍ଷୋଭକାରୀମାନେ ଶୁକ୍ରବାର ରାସ୍ତାକୁ ଓହ୍ଲାଇଛନ୍ତି। ରବିବାର ପର୍ଯ୍ୟନ୍ତ ଚାଲିବାକୁ ଥିବା ଏହି ସପ୍ତାହାନ୍ତ ବିକ୍ଷୋଭରେ ସେମାନେ ସାମିଲ ହୋଇଛନ୍ତି। ରବିବାର ନ୍ୟୁୟର୍କରେ ହେବାକୁ ଥିବା ଶୋଭାଯାତ୍ରାରେ ୧୫,୦୦୦ ବିକ୍ଷୋଭକାରୀ ଯୋଗଦେଇପାରନ୍ତି। ବିକ୍ଷୋଭକାରୀଙ୍କ ଉଦ୍ଦେଶ୍ୟ ହେଉଛି ସରକାରମାନଙ୍କ ଉପରେ ଚାପସୃଷ୍ଟି କରିବା। ବନ୍ୟା, ବନାଗ୍ନି ଓ ମରୁଡ଼ି ଆଦି ବିପର୍ଯ୍ୟୟରେ ମୃତ୍ୟୁସଂଖ୍ୟା ବଢ଼ିଚାଲିଥିବାବେଳେ ଅର୍ଥନୀତି ମଧ୍ୟ ଘୋର ପ୍ରଭାବିତ ହେଉଛି। ଏଥିପାଇଁ ସେମାନେ ପାକିସ୍ତାନଠୁ ନେଇ ନାଇଜେରିଆ ଏବଂ ଜାତିସଂଘ ପର୍ଯ୍ୟନ୍ତ ୫୦୦ ସ୍ଥାନରେ ବିକ୍ଷୋଭ ପ୍ରଦର୍ଶନ ଲାଗି ଯୋଜନା କରିଛନ୍ତି। ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍‌ଏଫ୍‌)ର ଆକଳନ ଅନୁସାରେ ଗତବର୍ଷ ସରକାରମାନେ ତୈଳ, ଗ୍ୟାସ୍‌ ଓ କୋଇଲା ସବ୍‌ସିଡି ବାବଦରେ ରେକର୍ଡ ପରିମାଣର ୭ ଟ୍ରିଲିୟନ୍‌ ଡଲାର ଖର୍ଚ୍ଚ କରିଛନ୍ତି। କିନ୍ତୁ ସୌରଶକ୍ତି ଭଳି ନବୀକରଣୀୟ ଉତ୍ସକୁ ବିଶେଷ ଗୁରୁତ୍ୱ ଦେଇନାହାନ୍ତି। ଜାତିସଂଘର ବିଶ୍ୱତାପନର ଭୟାବହ ପରିଣାମ ଉପରେ ସତର୍କ କରାଇଛି।