ନୂଆଦିଲ୍ଲୀ,୧୧।୫: ଦିଲ୍ଲୀର କୁତବ୍ମିନାର ନାଁ ବଦଳାଇ ବିଷ୍ଣୁ ସ୍ତମ୍ଭ ରଖିବା ଦାବିରେ ମଙ୍ଗଳବାର ହିନ୍ଦୁ ସଂଗଠନ ଆନ୍ଦୋଳନକୁ ଓହ୍ଲାଇଛି। ୟୁନେସ୍କୋ ଦ୍ୱାରା ବିଶ୍ୱ ଐତିହ୍ୟ ସ୍ଥଳ ଭାବେ ସ୍ବୀକୃତି ପାଇଥିବା କୁତବ ମିନାରରେ ବ୍ୟାପକ ପୋଲିସ ମୁତୟନ କରାଯାଇଥିଲା। ଏହା ସତ୍ତ୍ୱେ ମହାକାଳ ମାନବ ସେବା ଓ ଅନ୍ୟ ହିନ୍ଦୁ ସଂଗଠନର କର୍ମୀମାନେ ସେଠାରେ ପ୍ଲାକାର୍ଡ ଧରି ବିକ୍ଷୋଭ କରିଥିଲେ। ସେମାନେ ସେଠାରେ ହନୁମାନ ଚାଳିଶା ଜପ କରିଥିଲେ। ମୋଗଲ ଶାସକଙ୍କ ଦ୍ୱାରା ନାମିତ ଦିଲ୍ଲୀର ଆକବର ରୋଡ୍, ହୁମାୟୁନ୍ ରୋଡ୍, ଆଉରଙ୍ଗଜେବ୍ ଲେନ୍, ତୋଗଲକ ଲେନ୍ ଆଦିର ନାମ ପରିବର୍ତ୍ତନ ଲାଗି ଇତିମଧ୍ୟରେ ଦିଲ୍ଲୀ ଭାଜପା ପକ୍ଷରୁ ଦାବି କରାଯାଇଛି। ଉତ୍ତର ଦିଲ୍ଲୀ ମ୍ୟୁନିସିପାଲ କର୍ପୋରେଶନର ଅଧ୍ୟକ୍ଷଙ୍କୁ ପତ୍ର ଲେଖି ଦିଲ୍ଲୀ ଭାଜପା ସଭାପତି ଆଦେଶ ଗୁପ୍ତା ଉକ୍ତ ରାସ୍ତାଗୁଡ଼ିକର ନାମ ମହାରାଣା ପ୍ରତାପ, ଗୁରୁ ଗୋବିନ୍ଦ ସିଂ, ମହର୍ଷି ବାଲ୍ମୀକି ଏବଂ ଜେନେରାଲ ବିପିନ ରାଓ୍ବତ ରଖିବାକୁ ପ୍ରସ୍ତାବ ଦେଇଛନ୍ତି।
