ବାସୁଦେବପୁର/ ପଦ୍ମପୁର, ୨୪।୩ (ଡି.ଏନ.ଏ.): ପଞ୍ଚାୟତ ନିର୍ବାଚନରେ ପରାଜୟ ପାଇଁ ବିଜୟୀ ପ୍ରାର୍ଥୀଙ୍କ ଟାହିଟାପରା ସହି ନ ପାରି ବିଷ ପିଇ ଦେଇଥିଲେ ସମିତିସଭ୍ୟ ପ୍ରାର୍ଥତ୍ନୀ ଭଦ୍ରକ ଜିଲା ବାସୁଦେବପୁର ବ୍ଲକ ପଦ୍ମପୁର ପଞ୍ଚାୟତର ସୁମତୀ ପରିଡ଼ା। କଟକ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ମଙ୍ଗଳବାର ତାଙ୍କର ମୃତ୍ୟୁ ଘଟିଛି। ବ୍ୟବଚ୍ଛେଦ ହୋଇ ମୃତଦେହ ଆସିବା ପରେ ଏହି ଘଟଣାକୁ ନେଇ ପଞ୍ଚାୟତରେ ଉତ୍ତେଜନା ଦେଖା ଦେଇଥିଲା। ପଞ୍ଚାୟତର କେତେଜଣ ବ୍ୟକ୍ତି ମଙ୍ଗଳବାର ବିଳମ୍ବିତ ରାତିରେ ସୁମତୀଙ୍କ ମୃତଦେହ ରଖି ବାସୁଦେବପୁର ଥାନା ଥାନା ଘେରାଉ କରିଥିଲେ। ଏହି ଘଟଣା ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବି କରିଥିଲେ। ବିଳମ୍ବିତ ରାତି ପର୍ଯ୍ୟନ୍ତ ଏହି ଥାନା ଘେରାଉ ଜାରି ରହିଥିଲା। ଘଟଣାରେ ପ୍ରତ୍ୟେକ୍ଷ ଓ ପରୋକ୍ଷ ଭାବେ ଦାୟୀ ଥିବା ୬ଜଣଙ୍କ ନଁାରେ ପୋଲିସ ମାମଲା ରୁଜୁ କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା। ଲୋକେ ଧାରଣାରୁ ଓହରିବା ପରେ ଅନ୍ତିମ ସଂସ୍କାର ପାଇଁ ମୃତଦେହ ବଡ଼ଅଗାପୁର ଗ୍ରାମକୁ ନେଇଥିଲେ। ମୃତ ସୁମତୀଙ୍କ ଶ୍ୱଶୁର ରମେଶ ଚନ୍ଦ୍ର ପରିଡ଼ାଙ୍କ ଅଭିଯୋଗ କ୍ରମେ ୬ଜଣଙ୍କ ନଁାରେ ମାମଲା (ନଂ.୧୨୬/୨୨) ରୁଜୁ କରାଯାଇଛି।
ନିର୍ବାଚନ ଫଳାଫଳ ପ୍ରକାଶ ପାଇବାର ୧୭ ଦିନ ପରେ ବିଜୟୀ ପ୍ରାର୍ଥୀଙ୍କ ରାଲି ବେଳେ ପରାଜିତ ପ୍ରାର୍ଥତ୍ନୀ ସୁମତୀଙ୍କ ପରିବାର ଲୋକଙ୍କୁ କମେଣ୍ଟ ମାରିବା ସହ ଦୁର୍ବ୍ୟବହାର କରାଯାଇଥିଲା। ଏଥିରେ ମାନସିକ ଭାରସାମ୍ୟ ହରାଇ ପ୍ରଥମେ ସୁମତୀଙ୍କ ସ୍ବାମୀ ରମାକାନ୍ତ ବେକରେ ରଶି ଲଗାଇ ଦେଇଥିଲେ। ଏହା ଦେଖି ସୁମତୀ ବିଷ ପିଇ ଦେଇଥିଲେ। ରମାକାନ୍ତ ମୃତ୍ୟୁର ୧୦ ଦିନ ପରେ ସୁମତୀଙ୍କ ମୃତ୍ୟୁ ଘଟିଛି। ନିର୍ବାଚନ ଫଳାଫଳ ପ୍ରକାଶର ୧୭ ଦିନ ପରେ ବିଜୟ ଶୋଭାଯାତ୍ରା କରାଯିବା ଘଟଣାର ଅଧିକ ତଦନ୍ତ କରାଯାଉ ବୋଲି ମୃତକଙ୍କ ପରିବାର ପକ୍ଷରୁ ଦାବି ହୋଇଛି।
