ଭୁବନେଶ୍ୱର, ୮।୨(ବ୍ୟୁରୋ): ବରିଷ୍ଠ ନାଗରିକଙ୍କୁ ଡିଜିଟାଲ ଭାବେ ସୁରକ୍ଷିତ କରିବା ଉଦ୍ଦେଶ୍ୟରେ Google.org ସହାୟତାରେ ହେଲ୍ପ ଏଜ୍ ଇଣ୍ଡିଆ ଏହାର ଦେଶବ୍ୟାପୀ କାର୍ଯ୍ୟକ୍ରମ ‘ପ୍ରୋଜେକ୍ଟ ସୁରକ୍ଷିତ’ ଆରମ୍ଭ କରିଛି। ଏହା ଅନ୍ତର୍ଗତ ୫୦ହଜାର ବୟସ୍କଙ୍କୁ ତାଲିମ ପ୍ରଦାନ କରାଯିବ। ଏହାଦ୍ୱାରା ସେମାନେ ଅନଲାଇନ୍ ଠକେଇରୁ ନିଜକୁ ରକ୍ଷା କରିପାରିବେ। ମଙ୍ଗଳବାର ‘ସୁରକ୍ଷିତ ଇଣ୍ଟରନେଟ୍ ଦିବସ’ ପାଳନ କରି ହେଲ୍ପଏଜ୍ ଇଣ୍ଡିଆ ୧୬ଟି ରାଜ୍ୟରେ ଡିଜିଟାଲ ସୁରକ୍ଷା କର୍ମଶାଳା ଆରମ୍ଭ କରିଛି। ଏଥିରେ ଏକସଙ୍ଗରେ ୧୦ରୁ ଅଧିକ ବରିଷ୍ଠ ନାଗରିକଙ୍କୁ ପ୍ରଶିକ୍ଷଣ ଦିଆଯିବ। ଏହି କ୍ରମରେ ନୟାପଲ୍ଲୀ ବ୍ରିଟ୍ କଲୋନୀରେ ଅନୁଷ୍ଠାନର ଏକ କର୍ମଶାଳା ଅନୁଷ୍ଠିତ ହୋଇଥିଲା। ଉକ୍ତ କଲୋନୀରେ ବାସ କରୁଥିବା ୩୦ରୁ ଅଧିକ ବରିଷ୍ଠ ନାଗରିକ ଯୋଗଦେଇ ଡିଜିଟାଲ ନିରାପତ୍ତା ଉପରେ ତାଲିମ ନେଇଥିଲେ। ସେମାନଙ୍କୁ ସୁରକ୍ଷିତ ଭାବେ ଇଣ୍ଟରନେଟ୍ ବ୍ୟବହାର କରିବା ଏବଂ ଅନଲାଇନ୍ ଡିଜିଟାଲ ସୁବିଧାର ଲାଭ ପାଇବା ପାଇଁ ତାଲିମ ଦିଆଯାଇଥିଲା। କର୍ମଶାଳାରେ ୭ଟି ମଡ୍ୟୁଲକୁ ଅନ୍ତର୍ଭୁକ୍ତ କରାଯାଇଛି। ଏହା ଅନ୍ତର୍ଗତ ବିଭିନ୍ନ ଅନ୍ଲାଇନ୍ ସୁରକ୍ଷା ବିଷୟ ଯଥା ଏକ ଦୃଢ଼ ପାସ୍ୱାର୍ଡ ସୃଷ୍ଟି କରିବା, ଅନଲାଇନ୍ ବ୍ୟାଙ୍କିଙ୍ଗ୍ ସମୟରେ ସୁରକ୍ଷିତ ରହିବା, ଅନଲାଇନରେ ସୁରକ୍ଷିତ ଭାବେ ୟୁଟିଲିଟି ବିଲ୍ ପୈଠ କରିବା, ଡିଭାଇସ୍କୁ ସୁରକ୍ଷିତ ରଖିବା, ଅନଲାଇନ୍ ସ୍କାମ୍ ଚିହ୍ନଟ କରିବା, ହ୍ାଟ୍ସଆପ୍ରେ ସୁରକ୍ଷିତ ରହିବା ଏବଂ ସୁରକ୍ଷିତ ଭାବେ ଏକ କ୍ୟାବ୍ ବୁକିଂ କରିବା ଆଦି ବିଷୟରେ ମାର୍ଗଦର୍ଶନ କରାଯାଇଛି। ଏନେଇ ଅନୁଷ୍ଠାନର ରାଜ୍ୟ ଶାଖା ମୁଖ୍ୟ ଭାରତୀ ଚକ୍ର କହିଛନ୍ତି, ‘ପ୍ରୋଜେକ୍ଟ ସୁରକ୍ଷିତ’ ଜରିଆରେ ହେଲ୍ପଏଜ୍ ଇଣ୍ଡିଆ ବୟସ୍କଙ୍କ ପାଇଁ ଏକ ସୁରକ୍ଷିତ ବାତାବରଣ ସୃଷ୍ଟି କରିବାକୁ ଚେଷ୍ଟା କରୁଛି। ଏଥିସହ ଡିଜିଟାଲ ବିଭାଜନକୁ ଦୂର କରିବାକୁ ଆଶା ରଖିଛି। ସେହିପରି Google.orgର ଆଡଭୋକେସି ଏବଂ ଏସିଆ ପ୍ୟାସିଫିକ ମୁଖ୍ୟ ଆନି ଲେୱିନ କହିଛନ୍ତି, ବରିଷ୍ଠ ନାଗରିକଙ୍କ ପାଇଁ ସାମାଜିକ ଅଂଶଗ୍ରହଣ ଏବଂ ଅନ୍ତର୍ଭୁକ୍ତୀକରଣ ବୃଦ୍ଧି କରିବା, ଅନଲାଇନରେ ସେମାନଙ୍କ ଆତ୍ମବିଶ୍ୱାସ ବୃଦ୍ଧି କରିବା ପାଇଁ ଡିଜିଟାଲ ସୁରକ୍ଷା କର୍ମଶାଳା ଏହି ପ୍ରୋଜେକ୍ଟର ପ୍ରଥମ ପଦକ୍ଷେପ। କାର୍ଯ୍ୟକ୍ରମକୁ ହେଲ୍ପଏଜ ଇଣ୍ଡିଆର ଦେବଶ୍ରୀ ବ୍ରହ୍ମା ପରିଚାଳନା କରିଥିଲେ। ନୟାପଲ୍ଲୀ ବ୍ରିଟ କଲୋନୀର ସଭାପତି ଇଂ. ଅନାଦି ସାହୁ ଓ ସାଧାରଣ ସମ୍ପାଦକ ସତ୍ୟବ୍ରତ ସାହୁ ପ୍ରମୁଖ ଉପସ୍ଥିତ ଥିଲେ।
