ମାଦ୍ରିଦ,୧୮।୯ : ସ୍ପେନରେ ଭାରତୀୟ ରାଷ୍ଟ୍ରଦୂତ ଦୀନେଶ ପଟ୍ଟନାୟକ କହିଛନ୍ତି ଦେଶରେ ୪୦ଟି ସି-୨୯୫ ବିମାନ ଉତ୍ପାଦନ ଏକ ଗେମ ଚେଞ୍ଜର ସାବ୍ୟସ୍ତ ହେବ। ଏହା ଭାରତରେ ଏକ ବିଶ୍ୱ ସ୍ତରୀୟ ଏରୋସ୍ପେସ ଇକୋସିଷ୍ଟମ ସୃଷ୍ଟି କରିବ, ଯାହା ଭବିଷ୍ୟତରେ ଦେଶର ଅନ୍ୟ ବିମାନ ଉତ୍ପାଦନ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପ୍ରମାଣିତ ହେବ। ଭାରତୀୟ ବାୟୁସେନା ବୁଧବାର ପ୍ରଥମ ସି-୨୯୫ ଏୟାରବସ ବିମାନ ଗ୍ରହଣ କରିଛି।
ନ୍ୟୁଜ ଏଜେନ୍ସି ଖବର ଅନୁଯାୟୀ ଦୀନେଶ ପଟ୍ଟନାୟକ ଏହି ପ୍ରକଳ୍ପର ଗୁରୁତ୍ୱ ବର୍ଣ୍ଣନା କରିବାବେଳେ କହିଛନ୍ତି ଭାରତରେ କୌଣସି ଘରୋଇ ଏରୋସ୍ପେସ ଇକୋସିଷ୍ଟମ ନାହିଁ, ଯେତେବେଳେ କି ଅନେକ ବଡ ଦେଶରେ ଏରୋସ୍ପେସ ଇକୋସିଷ୍ଟମ ଅଛି। ଏହି ଚୁକ୍ତି ଭାରତରେ ଏହି ଇକୋସିଷ୍ଟମ ସୃଷ୍ଟି କରିବ ଏବଂ ଏହା ଏକ ନୂତନ ବ୍ୟବସ୍ଥାର ଆରମ୍ଭ ହୋଇପାରେ ।
ସୂଚନାଯୋଗ୍ୟ ବୁଧବାର ଦିନ ଭାରତୀୟ ବାୟୁସେନା ପ୍ରଥମ ସି-୨୯୫ଏୟାରବସ ବିମାନ ଗ୍ରହଣ କରିଛି। ଏୟାରବସ ଡିଫେନ୍ସ ଏବଂ ସ୍ପେସ କମ୍ପାନୀ ସହିତ ଭାରତ ୨୧,୯୩୫ କୋଟି ଟଙ୍କାର ଚୁକ୍ତି କରିଥିଲା। ଏହି ଚୁକ୍ତି ଅନୁଯାୟୀ କମ୍ପାନୀ ୧୬ ଟି ବିମାନ ଉତ୍ପାଦନ କରି ଭାରତୀୟ ବାୟୁସେନାକୁ ହସ୍ତାନ୍ତର କରିବ। ଏହି ୧୬ ଟି ବିମାନ ସ୍ପେନର ସେଭିଲରେ ଅବସ୍ଥିତ କମ୍ପାନୀର ଅନ୍ତିମ ଆସେମ୍ବଲି ଲାଇନରେ ନିର୍ମିତ ହେବ ଏବଂ ୨୦୨୫ ସୁଦ୍ଧା ହସ୍ତାନ୍ତର କରାଯିବ ।
ଏହି ଚୁକ୍ତି ଅନୁଯାୟୀ ଟାଟା ଆଡଭାନ୍ସଡ ସିଷ୍ଟମ ଦ୍ୱାରା ଭାରତରେ ଅନ୍ୟ ୪୦ ବିମାନ ଉତ୍ପାଦନ ହେବ। ମେକ ଇନ ଇଣ୍ଡିଆ ଯୋଜନା ଅନୁଯାୟୀ, ସି-୨୯୫ ବିମାନ ଭଡୋଦରାରେ ଉତ୍ପାଦିତ ହେବ ଏବଂ ସେପ୍ଟେମ୍ବର ୨୦୨୬ ରେ ପ୍ରଥମ ବିମାନ ବିତରଣ କରାଯିବ। ଶେଷ ବିମାନ ଅଗଷ୍ଟ ୨୦୩୧ ସୁଦ୍ଧା ଭାରତୀୟ ବାୟୁସେନାକୁ ପ୍ରଦାନ କରାଯିବ।
ଏହା ହେଉଛି ପ୍ରଥମ ସାମରିକ ବିମାନ ଯାହା ଭାରତର ଏକ ଘରୋଇ କମ୍ପାନୀ ଦ୍ୱାରା ଉତ୍ପାଦିତ ହେବ । ଭାରତୀୟ ବାୟୁସେନା ସି-୨୯୫ ବିମାନ କିଣୁଛି ଯାହାକି ଛଅ ଦଶନ୍ଧି ପୂର୍ବରୁ ସେବାରେ ପ୍ରବେଶ କରିଥିବା ପୁରୁଣା ଏଭ୍ରୋ-୭୪୮ ବିମାନର ସ୍ଥାନ ନେବ।
