ଭୁବନେଶ୍ୱର,୧୨ା୫(ବ୍ୟୁରୋ):ରାଜଧାନୀ ଭୁବନେଶ୍ୱରରେ କରୋନା ସଂକ୍ରମଣ ଅଧିକ ରହିଛି। ସ୍ଥିତି ଏପରି ହୋଇଛି ରୋଗୀଙ୍କୁ ମେଡିକାଲ ନେବା ପାଇଁ ଆମ୍ବୁଲାନ୍ସର ଅଭାବ ପଡୁଛି। ଏହାର ସୁଯୋଗ ନେଇ ଏବେ ଘରୋଇ ଆମ୍ବୁଲାନ୍ସ ସେବା ପ୍ରଦାନକାରୀ ସଂସ୍ଥା ଲୋକଙ୍କୁ ଲୁଟୁଛନ୍ତି। ୧୦ କି.ମି. ପାଇଁ ୧୦ ହଜାର ଟଙ୍କା ଭଡ଼ା ଦାବି କରୁଥିବାବେଳେ ପିପିଇ କିଟ୍ ବାହାନା ଦେଖାଇ ମନଇଚ୍ଛା ଅତିରିକ୍ତ ଚାର୍ଜ ନେଉଛନ୍ତି। କୋଭିଡ୍ ରୋଗୀ ହେଲେ କଥା ସରିଲା। ପାଟିରୁ ଯାହା ବାହାରିଲା। ତେବେ ଆମ୍ବୁଲାନ୍ସ ସଂସ୍ଥା ଲୋକଙ୍କୁ ଏପରି ମନଇଚ୍ଛା ଶୋଷଣ କରୁଥିଲେ ମଧ୍ୟ ପ୍ରଶାସନ ପକ୍ଷରୁ ସେପରି ପଦକ୍ଷେପ ନ ଥିବାରୁ ତୀବ୍ର ଅସନ୍ତୋଷ ପ୍ରକାଶ ପାଇଛି।
ମଙ୍ଗଳବାର ଜିଜିପି କଲୋନୀର ଜଣେ ବ୍ୟକ୍ତି ସମ୍ ହସ୍ପିଟାଲ ଯିବା ପାଇଁ ଏକ ଘରୋଇ ଆମ୍ବୁଲାନ୍ସ ସଂସ୍ଥାକୁ ଫୋନ୍ କରିଥିଲେ। ହେଲେ ଏଥିପାଇଁ ୧୨ ହଜାର ଟଙ୍କା ଭଡ଼ା ପଡ଼ିବ ବୋଲି କୁହାଯାଇଥିଲା। ସେହିପରି ଆଉଜଣେ ବ୍ୟକ୍ତି ବାଣୀବିହାରରୁ କିଟ୍ ଛକ ଯିବା ପାଇଁ ୮ ହଜାର ଟଙ୍କା ଭଡ଼ା ଦେଇଥିଲେ। ଏତେ ଟଙ୍କା କାହିଁକି ନେଉଛନ୍ତି ବୋଲି ପଚାରିବାରୁ ସଂସ୍ଥା ପକ୍ଷରୁ ପିପିଇ କିଟ୍ ଦିଆଯାଉଥିବା କୁହାଯାଇଥିଲା। କିନ୍ତୁ ବାସ୍ତବରେ ଗୋଟିଏ ପିପିଇ କିଟ୍ ଦାମ ୫୦୦ ରୁ ୬୦୦ଟଙ୍କା ମଧ୍ୟରେ ବଜାରରେ ମିଳୁଛି। ହେଲେ ସେମାନେ ପିପିଇ କିଟ୍ ବାବଦକୁ ହଜାରରୁ ଅଧିକ ଟଙ୍କା ହିସାବ କରୁଛନ୍ତି। ତେଣୁ ସରକାରଙ୍କ ପକ୍ଷରୁ ଆମ୍ବୁଲାନ୍ସର ଦର ନେଇ ନିର୍ଦ୍ଦିଷ୍ଟ ନିୟମ ଧାର୍ଯ୍ୟ କରାଯିବାକୁ ସାଧାରଣରେ ଦାବି ହୋଇଛି।
