ଟୋକିଓ,୨୪ ।୫: ଜାପାନର ଟୋକିଓରେ ଚାଲିଥିବା କ୍ୱାଡ ସମ୍ମିଳନୀରେ ୪ ଦେଶର ରାଷ୍ଟ୍ରମୁଖ୍ୟଙ୍କ ବୈଠକରେ ୟୁକ୍ରେନ୍-ରୁଷିଆ ପ୍ରସଙ୍ଗ ସମେତ ଅନ୍ୟ କିଛି ବିଷୟକୁ ନେଇ ଆଲୋଚନର ହୋଇଛି । ମଙ୍ଗଳବାର ବୈଠକ ଆରମ୍ଭରେ ପ୍ରଧାନମନ୍ତ୍ରୀ ମୋଦି ପ୍ରଥମେ ଆଷ୍ଟ୍ରେଲିଆର ନୂଆ ପ୍ରଧାନମନ୍ତ୍ରୀ ଏନ୍ଥୋନିଙ୍କୁ ଶୁଭେଚ୍ଛା ଜଣାଇବା ସହ କହିଛନ୍ତି ଶପଥ ନେବାର ୨୪ ଘଣ୍ଟା ମଧ୍ୟରେ ବୈଠକରେ ସାମିଲ ହେବା ବନ୍ଧୁତ୍ୱର ପ୍ରତିଦ୍ଧତାକୁ ସୂଚିତ କରୁଛି । ମୋଦି କହିଛନ୍ତି ଖୁବ କମ୍ ସମୟ ମଧ୍ୟରେ କ୍ୱାଡ ବୈଠକ ବିଶ୍ୱ ସ୍ତରରେ ଏକ ମହତ୍ୱପୂର୍ଣ୍ଣ ସ୍ଥାନ ସୃଷ୍ଟି କରିଛି ।
ମୋଦି କହିଛନ୍ତି କ୍ୱାଡର ସ୍ୱରୂପ ବ୍ୟାପକ ଓ ପ୍ରଭାବି ହୋଇଯାଇଛି । ସଦସ୍ୟ ଦେଶଙ୍କ ମଧ୍ୟରେ ପରସ୍ପର ବିଶ୍ୱାସ ଓ ପ୍ରତିବନ୍ଧତା ଯୋଗୁ କ୍ୱାଡ ଲୋକତାନ୍ତ୍ରିକ ଶକ୍ତିକୁ ନୂଆ ଶକ୍ତି ଓ ଉତ୍ସାହ ଯୋଗାଉଛି । ଯାହାଦ୍ୱାରା ହିନ୍ଦ-ପ୍ରଶାନ୍ତ କ୍ଷେତ୍ରରେ ମୁକ୍ତ ଯାତାୟାତର ସହଯୋଗ ମିଳୁଛି, ଯାହା ଆମ ସମସ୍ତଙ୍କର ଉଦ୍ଦେଶ୍ୟ ଥିଲା । ମୋଦି କ୍ୱାଡ ବୈଠକରେ ଭ୍ୟାକ୍ସିନ ଓ ଆର୍ଥିକ ସହଯୋଗରେ ପରସ୍ପର ସମନ୍ୱୟ ବୃଦ୍ଧି ଉପରେ ଗୁରୁତ୍ୱ ଦେଇଛନ୍ତି ।
ଆମେରିକା ରାଷ୍ଟ୍ରପତି ଜୋ ବାଇଡେନ କ୍ୱାଡ ବୈଠକ ଆରମ୍ଭରେ ସମ୍ବୋଧନ ଦେଇ ୟୁକ୍ରେନ୍-ରୁଷିଆ ଯୁଦ୍ଧର ଚର୍ଚ୍ଚା କରିଛନ୍ତି ଓ ମସ୍କୋକୁ ଟାର୍ଗେଟ କରିଛନ୍ତି । ସେ କହିଛନ୍ତି ୟୁକ୍ରେନ୍ ଉପରେ ରୁଷିଆର ଆକ୍ରମଣ ଯୋଗୁ ସାରା ବିଶ୍ୱରେ ଖାଦ୍ୟ ସଙ୍କଟ ଦେଖାଦେଲାଣି । ଯେବେ ପର୍ଯ୍ୟନ୍ତ ଏହି ଯୁଦ୍ଧ ରହିବ ସେବେ ପର୍ଯ୍ୟନ୍ତ ଖାଦ୍ୟ ସଙ୍କଟ ରହିବ ବୋଲି ବାଇଡେନ କହିଛନ୍ତି । ସେ କହିଛନ୍ତି ୟୁକ୍ରେନ୍ ଯେଉଁ ପ୍ରକାର ଯୁଦ୍ଧର ସାମନା କରୁଛି ଆମ ସମସ୍ତଙ୍କୁ ଏକାଠି ହୋଇ ଏବେ ଠିଆ ହେବା ଜରୁରୀ । ମାନବାଧିକାରର ସବୁବେଳେ ରକ୍ଷା କରିବା ଉଚିତ । ଏହାସହ କ୍ୱାଡ ସ୍ଥିରତା ରକ୍ଷା କରିବାକୁ ଆମକୁ ବହୁତ କାମ କରିବାକୁ ଅଛି ବୋଲି ବାଇଡେନ କହିଛନ୍ତି ।
