ବ୍ରହ୍ମପୁର ଅଫିସ,୨୨।୪: ପୂଜାରୀଙ୍କ ଉନ୍ମତ୍ତ କାଣ୍ଡ। ମନ୍ଦିରକୁ ପୂଜା କରିବାକୁ ଆସି କଲ୍ୟାଣ ମଣ୍ଡପରେ ପଡ଼ିଥିବା ଦୁଇଟି ସୋଫାରେ ନିଆଁ ଲଗାଇ ଦେଇ ପଳାଇଲେ। ଏଭଳି ଅଭାବନୀୟ ଘଟଣା ଘଟିଛି ଗଞ୍ଜାମ ଜିଲା ବ୍ରହ୍ମପୁରରେ। ଶୁକ୍ରବାର ସକାଳୁ ଗେଟବଜ଼ାର କୁଠାରୀ ମନ୍ଦିରର ପୂଜାରୀ ରାମଚନ୍ଦ୍ର ବେହେରା ମନ୍ଦିର ଭିତରକୁ ପ୍ରବେଶ କରିଥିଲେ।ଏହି ସମୟରେ ମନ୍ଦିର ଭିତର କଲ୍ୟାଣ ମଣ୍ଡପର ଦୁଇଟି ଦିୱାନ ସୋଫା ପଡି ରହିଥିଲା।
ପୂଜାରୀ ରାମଚନ୍ଦ୍ର ଦୁଇଟି ଜଳନ୍ତା ଦୀପ ଆଣି ସେଥିରେ ପକାଇଦେଇଥିଲେ। କିଛି ସମୟ ପରେ ତାହା ହୁତୁହୁତ ହୋଇ ଜଳିଥିଲା। ଏହି ସମୟରେ ଜଣେ ଶ୍ରଦ୍ଧାଳୁ ମନ୍ଦିରକୁ ଆସିବା ବେଳେ ଏହା ଦେଖି ଆଖପାଖ ଦୋକାନୀଙ୍କ ସହାୟତାରେ ନିଆଁ ଲିଭାଇଥିଲେ। ପାଖରେ ବସିଥିବା ଜଣେ ଦୃଷ୍ଟିହୀନ ବ୍ୟକ୍ତି ଏହି ନିଆଁ କବଳରୁ ଅଳ୍ପକେ ବର୍ତ୍ତି ଯାଇଥିଲେ।
ତେବେ ପୂଜାରୀ ଜଣଙ୍କ ନିଜେ ନିଆଁ ଲଗାଇ ଦୀପ ନିଆଁରେ ଭୁଲ ବଶତଃ ଅବା କୌଣସି ଭକ୍ତ ଜଳାଇଦେଲା ଭଳି ରୂପ ଦେବାକୁ ଚେଷ୍ଟା କରିଥିଲେ । କିନ୍ତୁ ସିସିଟିଭି କ୍ୟାମେରା ତାଙ୍କ ସତ ବାହାରକୁ ଆଣିଥିଲା। ପୂର୍ବରୁ ମନ୍ଦିର ହୁଣ୍ଡି ଭାଙ୍ଗି ଘଟଣାରେ ସେଭଳି ମନ୍ଦିରର କିଛି ପୂଜାରୀ ସମ୍ପୃକ୍ତ ଥିଲେ। ମନ୍ଦିର କଲ୍ୟାଣ ମଣ୍ଡପରେ ଭୋଜିଭାତର ଆସର ଜମୁଥିବା ବେଳେ ଏଭଳି କାଣ୍ଡ ସମସ୍ତଙ୍କୁ ଚିନ୍ତାରେ ପକାଇଛି।
