କଟକ ଅଫିସ,୭।୧: ଆସନ୍ତା ୧୦ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦ୍ୱିତୀୟ ଥର ଲାଗି ଓଡ଼ିଶା ଗସ୍ତରେ ଆସୁଛନ୍ତି। ରମାଦେବୀ ମହିଳା ବିଶ୍ୱବିଦ୍ୟାଳୟର ସମାବର୍ତ୍ତନ ଉତ୍ସବରେ ସେ ମୁଖ୍ୟ ଅତିଥି ଭାବେ ଯୋଗ ଦେବାର କାର୍ଯ୍ୟକ୍ରମ ଥିବା ବେଳେ ୧୧ ତାରିଖରେ କଟକ ଯିବେ। ଏହାକୁ ନେଇ କଟକ ଜିଲାପାଳଙ୍କ ପକ୍ଷରୁ ସମସ୍ତ ପ୍ରସ୍ତୁତି କରାଯାଉଛି। ଏସବୁ ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ରାଷ୍ଟ୍ରପତିଙ୍କ କଟକ ଗସ୍ତ ଉପଲକ୍ଷେ ଆବଶ୍ୟକ ଥିବା ଗାଡ଼ିଗୁଡ଼ିକ ମଙ୍ଗଳବାର କାର୍ଯ୍ୟରେ ଯୋଗ ନ ଦେବାରୁ ଜିଲାପାଳ ଗିରଫ ପରଓ୍ବାନା ଜାରି କରିଥିବା ସୂଚନା ମିଳିଛି।
ରାଷ୍ଟ୍ରପତି ମୁର୍ମୁ କଟକରେ ଆଇସିଏଆର୍ରେ ଆୟୋଜିତ କାର୍ଯ୍ୟକ୍ରମରେ ଯୋଗଦେବେ। ଏଥିଲାଗି ଗାଡ଼ି ଆବଶ୍ୟକ ଥିବାରୁ ଜିଲାପାଳ ଓଡି୦୧ଟି-୩୦୩୩, ଓଡ଼ି୦୨ଏଏସ୍-୨୫୬୫, ଓଡି୦୨ବିଇ-୮୮୨୨, ଓଡି୦୨ବିପି-୪୧୬୭ ଏବଂ ଓଡି ୦୨ଏସି-୪୨୫୦ରେ ପଞ୍ଜିକୃତ ଗାଡ଼ିଗୁଡ଼ିକୁ କାର୍ଯ୍ୟାଳୟରେ ଯୋଗଦେବାକୁ କୁହାଯାଇଥିଲା। ମାତ୍ର ସେଗୁଡ଼ିକ ନ ଆସିବାରୁ ଜିଲାପାଳ ଡ. ଭବାନୀ ଶଙ୍କର ଚଇନୀ ମାଲିକଙ୍କ ବିରୋଧରେ ଗିରଫ ପରଓ୍ବାନା ଜାରି କରିଛନ୍ତି। ଏଥିସହ ସେମାନଙ୍କ ବିରୋଧରେ ଆଇନ ଅନୁଯାୟୀ ଦୃଢ଼ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରାଯିବ ବୋଲି କୁହାଯାଇଛି।
