ମହାକାଳପଡ଼ା,୧୧ା୪(ଡି.ଏନ.ଏ.): କେନ୍ଦ୍ରାପଡ଼ା ଜିଲାର ପ୍ରମୁଖ ଶକ୍ତି ପୀଠ ଦରିଆ ପାରି ମା’ରାମଚଣ୍ଡୀଙ୍କ ମହାବିଷୁବ ସଂକ୍ରାନ୍ତି ତଥା ଝାମୁ ଯାତ୍ରା ଶୁକ୍ରବାର ଅନୁଷ୍ଠିତ ହେବ। ଏହି ଅବସରରେ ମା’ଙ୍କ ପୀଠରେ ୭ ଦିନ ଧରି ମେଳା ପାଇଁ ପ୍ରସ୍ତୁତି ଚାଲିଛି। ଏହି ମେଳାରେ ୫୦ ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁଙ୍କ ଭିଡ଼ ଜମିଥାଏ। ଏହାକୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ହେଲେ ଝାମୁଯାତ୍ରାକୁ କିପରି ଶାନ୍ତଶୃଙ୍ଖଳାର ସହିତ ଶେଷ କରାଯିବ ସେଥିପାଇଁ ମନ୍ଦିର ପରିଚାଳନା କମିଟି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନାହିଁ ବୋଲି ଅଭିଯୋଗ ହୋଇଛି। ବିଭିନ୍ନ ଅଞ୍ଚଳରୁ ଆସିଥିବା ବ୍ୟବସାୟୀମାନେ ମେଳା ପଡ଼ିଆରେ ଦୋକାନ ଖୋଲିବା ପାଇଁ ଲାଗିଛନ୍ତି । ସେମାନଙ୍କ ପାଇଁ କୌଣସି ସ୍ଥାନରେ ଛାମୁଡ଼ିଆର ବ୍ୟବସ୍ଥା କରାଯାଇନାହିଁ । ମନ୍ଦିର ପୋଖରୀ ଜଳ ପ୍ରଦୂଷିତ ଅବସ୍ଥାରେ ରହିଛି ା ସେଥିରୁ ପଙ୍କ କାଢ଼ିବାର ବ୍ୟବସ୍ଥା କରାଯାଇନାହିଁ । ବ୍ୟବସାୟୀମାନଙ୍କ ପାଇଁ ଶୌଚାଳୟ, ପାନୀୟ ଜଳର ବ୍ୟବସ୍ଥା ହୋଇନାହିଁ । ଅନ୍ୟପକ୍ଷେ ଉକ୍ତ ମେଳାରୁ ଲକ୍ଷାଧିକ ଟଙ୍କା ରାଜସ୍ବ ଆଦାୟ ହେଉଥିବା ବେଳେ ମା’ଙ୍କ ମନ୍ଦିରକୁ ରଙ୍ଗ ସଫେଇତ କରାଯାଉନାହିଁ ବୋଲି ସ୍ଥାନୀୟ ଶ୍ରଦ୍ଧାଳୁମାନେ କହିଛନ୍ତି । ପରିମଳ ବ୍ୟବସ୍ଥା, ପାନୀୟ ଜଳ ଯୋଗାଣ, ଅଗ୍ନି ନିରାପତ୍ତା ବ୍ୟବସ୍ଥା ଜରୁରୀ ବୋଲି ମା’ରାମଚଣ୍ଡୀ ସେନା ପକ୍ଷରୁ ଗୁରୁତ୍ୱାରୋପ କରାଯାଇଛି । ମନ୍ଦିର ବେଢ଼ା ପରିସରରେ ଅଳିଆ ଆବର୍ଜନା ଗଦା ହୋଇଥିଲେ ମଧ୍ୟ ସ୍ବଚ୍ଛତା ପ୍ରତି ଦୃଷ୍ଟି ନାହିଁ। ଅନ୍ୟପକ୍ଷେ ଟ୍ରାଫିକ ନିୟନ୍ତ୍ରଣ ପାଇଁ ପୋଲିସ ଫୋର୍ସ ମୁତୟନ ରହିବେ ବୋଲି ଜମ୍ବୁ ସାମୁଦ୍ରିକ ଥାନା ଅଧିକାରୀ ପରେଶ କୁମାର ମହାନ୍ତି କହିଛନ୍ତି। ତୁରନ୍ତ ମେଳାରେ ଜଳ ଯୋଗାଣ , ପରିମଳ , ଅଗ୍ନି ନିରାପତ୍ତା, ମହିଳାମାନଙ୍କ ପାଇଁ ସ୍ବତନ୍ତ୍ର ଶୌଚାଳୟ ନିର୍ମାଣ ପାଇଁ ଦାବି କରିଛନ୍ତି ମା’ରାମଚଣ୍ଡୀ ଆଞ୍ଚଳିକ ସେନା ଆବାହକ ଲକ୍ଷ୍ମୀକାନ୍ତ ସ୍ବାଇଁ । ବିଭିନ୍ନ ସ୍ଥାନରୁ ଆସିଥିବା ବ୍ୟବସାୟୀ ଦୋକାନ ଖୋଲିବା ପାଇଁ ପ୍ରସ୍ତୁତି ଚଳାଇଛନ୍ତି ।
