ଲକ୍ଷ୍ନୌ,୧୪ ।୧: ଦେଶରେ କରୋନା ସଂକ୍ରମଣ ବଢି ଚାଲିଥିବା ବେଳେ ଉତ୍ତର ପ୍ରଦେଶର ପ୍ରୟାଗରାଜରେ ଆରମ୍ଭ ହୋଇଛି ମାଘ ମେଳା । ଏବେ ଅନୁମାନ କରାଯାଉଛି କି ଆସ୍ଥା ଓ ବିଶ୍ୱାସର ଏହି ମେଳା କରୋନାର ସୁପର ସ୍ପେଡର ହୋଇପାରେ । ଶୁକ୍ରବାର ମକର ସଂକ୍ରାନ୍ତି ଅବସରରେ ଲକ୍ଷ ଲକ୍ଷ ଶ୍ରଦ୍ଧାଳୁ ଗଙ୍ଗାରେ ବୁଡ ପକାଇବେ । ୪୭ ଦିନ ପର୍ଯ୍ୟନ୍ତ ଚାଲିବାକୁ ଥିବା ଏହି ମେଳାରେ ଲକ୍ଷ ଲକ୍ଷ ଲୋକଙ୍କ ସମାଗମ କରୋନା ସଂକ୍ରମଣକୁ ଆହୁରି ବଢାଇଦେବ ବୋଲି କୁହାଯାଉଛି । କରୋନା ମହାମାରୀର ତୃତୀୟ ଲହର ମଧ୍ୟରେ ମାଘ ମେଳାରେ ଏପର୍ଯ୍ୟନ୍ତ ୫୧ ପଜିଟିଭ ଚିହ୍ନଟ ହୋଇଥିଲା ବେଳେ ସମ୍ପୂର୍ଣ୍ଣ ପ୍ରୟାଗରାଜ ଜିଲାରେ ୩୭୯ କରୋନା ସଂକ୍ରମିତ ଚିହ୍ନଟ ହୋଇ ସାରିଛନ୍ତି । ଏଭଳି ପରିସ୍ଥିତିରେ ମାଘ ମେଳା ଆଉ ଏକ ଅସୁବିଧା ସୃଷ୍ଟି କରିବାକୁ ଯାଉଛି ।
ଜାନୁୟାରୀ ୧୭ ପୌଷ ପୂର୍ଣ୍ଣିମା ହୋଇଥିବା ବେଳେ ୧ ଲକ୍ଷରୁ ଊର୍ଦ୍ଧ୍ୱ ସାଧୁ ସନ୍ଥ ମାଘ ମେଳାରେ ଏକାଠି ହେବେ । ତେବେ ମାଘ ମେଳାକୁ ସୁନ୍ଦର କରିବାକୁ ସରକାର ଖୁବ୍ ପ୍ରସ୍ତୁତି କରିଛନ୍ତି । କିନ୍ତୁ ଏହା ଯେ କରୋନାକୁ ନିମନ୍ତ୍ରଣ କରୁଛି ଏଥିରେ ସନ୍ଦେହ ନାହିଁ । ଗୋଟିଏ ପଟେ ସରକାର ବଡ ବଡ ଦାବି କରୁଥିବା ବେଳେ ଅନ୍ୟପଟେ ମାଘ ମେଳାର ଆୟୋଜନ ଅନେକ ପ୍ରଶ୍ନ ଉଠାଇଛି । ଏହାସହ ଅସଲରେ ଯେ କୋଭିଡ ନିୟମର ଖୋଲା ଖୋଲି ଉଲ୍ଲଂଘନ କରାଯାଉଛି ତାହା ସ୍ପଷ୍ଟ ବାରିହୋଇ ପଡୁଛି ।
