ନୂଆଦିଲ୍ଲୀ,୧୯।୧୨: ସଂସଦ ପରିସରରେ ଖଣ୍ଡଯୁଦ୍ଧକୁ ନେଇ ରାଜନୀତି ଉଠୁଛି ପଡୁଛି। ଏବେ ଭାଜପା ଲୋକ ସଭା ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କ ବିରୋଧରେ ଏଫଆଇଆର ରୁଜୁ କରିଛି। ଦଳର ଏମପି ପ୍ରତାପ ଚନ୍ଦ୍ର ଷଡଙ୍ଗୀଙ୍କୁ ଠେଲି ଦେଇଥିବା ଅଭିଯୋଗ ଆଣି ଭାଜପା ପୋଲିସ ପାଖରେ ଫେରାଦ ହୋଇଛି। ଅନ୍ୟପଟେ ରାହୁଲ ଦାବି କରିଛନ୍ତି ଯେ, ସଂସଦରେ ପ୍ରବେଶ କରିବାକୁ ଚେଷ୍ଟା କରୁଥିବାବେଳେ ଷଡଙ୍ଗୀ ତାଙ୍କୁ ଠେଲି ଦେଇଛନ୍ତି। ତେବେ ସଂସଦ ପରିସରରେ ହୋଇଥିବା ଘଟଣାରେ ଜଣେ ଏମପିଙ୍କ ବିରୋଧରେ ପୋଲିସରେ ଅଭିଯୋଗ ଆସିଲେ କଣ ତାଙ୍କୁ ଜେଲ ହେବ କି? ସରକାର ତାଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ନେବେ କି।
ନିୟମ ଅନୁଯାୟୀ, ଯଦି ଏହି ମାମଲାର କୌଣସି ଭିଡିଓ ପ୍ରମାଣ ନଥାଏ, ତେବେ ଏହା କେବଳ ଦୁଇ ଏମ୍ପିଙ୍କ ମଧ୍ୟରେ କଥା କଟାକଟି ଭାବରେ ଦେଖାଯିବ। ଲୋକ ସଭାର ପୂର୍ବତନ ସାଧାରଣ ସମ୍ପାଦକ ପିଡିଟି ଆଚାର୍ଯ୍ୟ କହିଛନ୍ତି ଯେ ଏଠାରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଭିଡିଓ ପ୍ରମାଣ। ଯଦି କୌଣସି ଭିଡିଓ ନାହିଁ, ଜଣେ ଏମପିଙ୍କୁ ଅନ୍ୟ ଏମପିଙ୍କ ମିଛ ଅଭିଯୋଗ ବୋଲି ଧରାଯିବ।
ସଂସଦ ନିୟମ ଅନୁଯାୟୀ, ଯଦି କୌଣସି ସଦସ୍ୟ ସଂସଦର କାର୍ଯ୍ୟକାଳ ସମୟରେ କିମ୍ବା ସଂସଦକୁ ଯିବା ସମୟରେ କୌଣସି ଅସୁବିଧା କିମ୍ବା ଆକ୍ରମଣର ସମ୍ମୁଖୀନ ହୁଅନ୍ତି, ତେବେ ଏହା ଏକ ବିଶେଷାଧିକାରର ଉଲ୍ଲଂଘନ ବୋଲି ବିବେଚନା କରାଯିବ।
ଯେହେତୁ ଭାଜପା ପୋଲିସ ପାଖରେ ଅଭିଯୋଗ ଦାଖଲ କରିଛି, ରାହୁଲଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ନେବ ପୋଲିସ ଏବେ ତାହା ସବୁଠାରୁ ବଡ ପ୍ରଶ୍ନ। ନିୟମ ଅନୁସାରେ ମାମଲାର ତଦନ୍ତ କରିପାରିବ ପୋଲିସ। କିନ୍ତୁ ସଂସଦ ପରିସରରେ ଘଟଣା ଘଟିଥିବାରୁ ବାଚସ୍ପତିଙ୍କ ଅନୁମତି ଲୋଡ଼ିପାରେ ପୋଲିସ। ଆଉ ଠେଲାପେଲା ମାମଲାରେ ଯେଉ ଭିଡିଓ ସାମ୍ନାକୁ ଆସୁଛି ତାହା ଏବେ ସବୁଠୁ ବଡ଼ ପ୍ରମାଣ। ଭିଡିଓ ସହ କିଛି ସାକ୍ଷୀଙ୍କ ବୟାନ ମଧ୍ଯ ପୋଲିସ ନେଇପାରେ ଯାହାକୁ ପୋଲିସ ତଦନ୍ତ ପରିସରଭୁକ୍ତ କରିପାରେ।
