ପୁରୀ ଅଫିସ/କଟକ ଅଫିସ୍, ୧୫ା୧୦: ଓଡ଼ିଶା କ୍ରିକେଟ୍ ଆସୋସିଏଶନ୍ (ଓସିଏ) ନିର୍ବାଚନ ନେଇ ଶୁକ୍ରବାର ପୁରୀସ୍ଥିତ ଏକ ଘରୋଇ ହୋଟେଲରେ ଅନୌପଚାରିକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଯାଜପୁର ବିଧାୟକ ତଥା ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ଓସିଏର ସଭାପତି ପଦ ପାଇଁ ପ୍ରାର୍ଥୀ ଭାବେ ସର୍ବସମ୍ମତି କ୍ରମେ ମନୋନୀତ କରାଯାଇଛି। ସେହିପରି ସଞ୍ଜୟ ବେହେରା ସମ୍ପାଦକ ଏବଂ ପଙ୍କଜ ଲୋଚନ ମହାନ୍ତି ଉପସଭାପତି ପ୍ରାର୍ଥୀ ଭାବେ ବୈଠକରେ ମନୋନୀତ ହୋଇଛନ୍ତି। ଯୁଗ୍ମସମ୍ପାଦକ, କୋଷାଧ୍ୟକ୍ଷ ଓ କାଉନସିଲ୍ ପଦ ପାଇଁ ପ୍ରାର୍ଥୀ ଚୂଡ଼ାନ୍ତ କରିବାକୁ ପୂର୍ବତନ ସମ୍ପାଦକ ଆଶୀର୍ବାଦ ବେହେରାଙ୍କ ଉପରେ ଦାୟିତ୍ୱ ନ୍ୟସ୍ତ କରାଯାଇଛି। ବୈଠକରେ ସର୍ବସମ୍ମତି କ୍ରମେ ନିଷ୍ପତ୍ତି ନିଆଯିବା ପରେ ଆସନ୍ତା ୨୧ ତାରିଖରେ ବିଧାୟକ ଦାସ ନାମାଙ୍କନ ପତ୍ର ଦାଖଲ କରିବା ଏକପ୍ରକାର ନିଶ୍ଚିତ ହୋଇଛି।
ପୁରୀ ଜିଲା କ୍ରୀଡ଼ା ସଂସଦର ସଦସ୍ୟ ରବିଶଙ୍କର ପ୍ରତିହାରୀ କହିଛନ୍ତି, ବୈଠକରେ ୪୭ଜଣ ସଦସ୍ୟ ଉପସ୍ଥିତ ଥିବାବେଳେ ୧୩ଜଣ ଯୋଗଦେଇପାରି ନ ଥିଲେ। ତେବେ ଏହି ୧୩ ସଦସ୍ୟ ପୂର୍ବରୁ ପ୍ରାର୍ଥୀମାନଙ୍କୁ ସମର୍ଥନ ଜଣାଇଥିଲେ। ସେହିପରି ଅନ୍ୟ ଦୁଇ ଜିଲାର କ୍ରୀଡ଼ା ସଂସଦ କର୍ମକର୍ତ୍ତାମାନେ ଅସୁସ୍ଥତା କାରଣରୁ ଅନୁପସ୍ଥିତ ରହିଥିଲେ। ତେବେ ସର୍ବସମ୍ମତି କ୍ରମେ ପ୍ରାର୍ଥୀ ଚୟନ କରାଯାଇଥିଲା। ଏହାପରେ ନିର୍ବାଚନ ପାଇଁ ଯୋଜନା ଓ କ୍ଷେତ୍ର ପ୍ରସ୍ତୁତ କରାଯାଇଥିଲା। କିଭଳି ଭାବେ ନିର୍ବାଚନରେ ବିଜୟ ହାସଲ କରାଯିବ ସେନେଇ ବୈଠକରେ ଆଲୋଚନା ହୋଇଥିଲା। ସଦସ୍ୟମାନେ ନିଜ ମତାମତ ରଖିଥିଲେ ଓ ଏହା ଉପରେ ବିଚାରବିମର୍ଷ ହୋଇଥିଲା। ସମର୍ଥନ ଜଣାଇଥିବା କ୍ରୀଡ଼ା ସଂସଦର ସଦସ୍ୟମାନେ ନାମାଙ୍କନପତ୍ର ଦାଖଲ ଦିନ ପ୍ରାର୍ଥୀମାନଙ୍କ ସହ ଶୋଭାଯାତ୍ରାରେ ସାମିଲ ହେବା ନେଇ ମଧ୍ୟ ନିଷ୍ପତ୍ତି ନିଆଯାଇଥିବା ପ୍ରତିହାରୀ କହିଛନ୍ତି। ଓସିଏ ନିର୍ବାଚନ ଲାଗି ୨୧ରେ ନାମାଙ୍କନପତ୍ର ଦାଖଲ, ୨୨ରେ ଯାଞ୍ଚ, ଅଭିଯୋଗ ଗ୍ରହଣ ଓ ବୈଧ ନାମ ତାଲିକା ପ୍ରକାଶ କରାଯିବ। ୨୩ ତାରିଖରେ ପ୍ରାର୍ଥତ୍ପତ୍ର ପ୍ରତ୍ୟାହାର ସହ ସନ୍ଧ୍ୟାରେ ଚୂଡ଼ାନ୍ତ ପ୍ରାର୍ଥତ୍ପତ୍ର ତାଲିକା ପ୍ରକାଶ ପାଇବ। ୨୮ ତାରିଖରେ ନିର୍ବାଚନ ପାଇଁ ମତଦାନ ହେବ। ଉଲ୍ଲେଖଯୋଗ୍ୟ, ପୁରୀସ୍ଥିତ ଘରୋଇ ହୋଟେଲଠାରେ ଆୟୋଜିତ ଏହି ବୈଠକରେ ବିଭିନ୍ନ ଜିଲାର କ୍ରୀଡ଼ା ସଂସଦର ନିର୍ବାଚିତ ପ୍ରତିନିଧି ଓ ସଦସ୍ୟମାନେ ଯୋଗ ଦେଇଥିଲେ।
