ଭୁବନେଶ୍ୱର, ୨୭।୨(ବ୍ୟୁରୋ): ଦେଶର ୨୮ ବିଧାନସଭା ଏବଂ ୮ ବିଧାନ ପରିଷଦ କାର୍ଯ୍ୟ ସମ୍ପାଦନରେ କମ୍ପ୍ୟୁଟର ଏବଂ ସୂଚନା ଓ ପ୍ରଯୁକ୍ତି ବିଦ୍ୟାର ଅଧିକରୁ ଅଧିକ ଉପଯୋଗ କରିବାକୁ ନିଷ୍ପତ୍ତି ହୋଇଛି। ଏହି ପରିପ୍ରେକ୍ଷୀରେ ନୂଆଦିଲ୍ଲୀ ପାର୍ଲାମେଣ୍ଟ ହାଉସ ପରିସରରେ ପ୍ରିଜାଇଡିଂ ଅଫିସରଙ୍କୁ ନେଇ ତୃତୀୟ କମିଟି ବୈଠକ ଆସାମ ବିଧାନସଭା ବାଚସ୍ପତି ହିତେନ୍ଦ୍ରନାଥ ଗୋସ୍ବାମୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି। ଓଡ଼ିଶାର ବାଚସ୍ପତି ସୂର୍ଯ୍ୟନାରାୟଣ ପାତ୍ର, ଉତ୍ତରାଖଣ୍ଡର ବାଚସ୍ପତି ପ୍ରେମଚାନ୍ଦ ଅଗ୍ରୱାଲଙ୍କ ସମେତ ତେଲଙ୍ଗାନା, ପୁଡୁଚେରୀ ବିଧାନସଭାର ସଚିବମାନେ ଏଥିରେ ଯୋଗଦେଇଥିଲେ। ଇ-ବିଧାନସଭା କାର୍ଯ୍ୟକାରୀ କରିବାରେ ଓଡ଼ିଶା ବିଧାନସଭାର କାର୍ଯ୍ୟକୁ ବୈଠକରେ ପ୍ରଶଂସା କରାଯାଇଛି। ଏଥିସହ ପ୍ରଦତ୍ତ ଇ-ବିଧାନସଭା ସମ୍ପର୍କିତ ପ୍ରକଳ୍ପକୁ ମଡେଲ ପ୍ରକଳ୍ପ ରୂପେ ସମଗ୍ର ଦେଶରେ ଗ୍ରହଣ କରାଯାଇଛି।
ହିମାଚଳ ପ୍ରଦେଶ ସରକାରଙ୍କ ଉଦ୍ୟମରେ ପ୍ରଥମ ଇ-ବିଧାନସଭା ଆୟୋଜିତ ହୋଇଥିଲା। ଏଥିଲାଗି ଓଡ଼ିଶାରେ ଗ୍ରହଣ କରାଯାଇଥିବା କାର୍ଯ୍ୟ ସମ୍ପର୍କରେ ବାଚସ୍ପତି ପାତ୍ର ଭିଡିଓ କନ୍ଫରେନ୍ସ ମାଧ୍ୟମରେ ତଥ୍ୟ ରଖିଛନ୍ତି। ଇ-ବିଧାନସଭା ସାଧାରଣ ଜନତାଙ୍କୁ ବିଧାନସଭା ସହ ଯୋଡ଼ିପାରିବ। ଏଥିଲାଗି ଓଡ଼ିଶାରେ ୧୨ କୋଟି ୫୨ ଲକ୍ଷ ଟଙ୍କା ଖର୍ଚ୍ଚ ହେବାକୁ ଥିବାବେଳେ ୮ କୋଟି ୫୬ ଲକ୍ଷ ଟଙ୍କା ଅନୁମୋଦିତ ହୋଇଛି। ପ୍ରଥମ କିସ୍ତିରେ ସଂସଦୀୟ ବ୍ୟାପାର ବିଭାଗ ତରଫରୁ ୧ କୋଟି ୨ ଲକ୍ଷ ଟଙ୍କା ପ୍ରଦାନ କରାଯାଇଛି। ଲ୍ୟାନ୍, ୱାଇ-ଫାଇ ଏବଂ ଭିଡିଓ କନଫେରେନ୍ସ ବ୍ୟବସ୍ଥା ଗ୍ରହଣ କରାଯାଇଛି। ବିଧାନସଭା କର୍ମଚାରୀଙ୍କ ପାଇଁ ୧୫୦ ଡେସ୍କଟପ୍ ସିଷ୍ଟମ ଯୋଗାଇ ଦିଆଯାଇଛି। ନେଭା ମୋବାଇଲ ଆପ୍ କାର୍ଯ୍ୟକାରୀ କରିବା ପାଇଁ ୧୦ ପ୍ରୋଗାମର ନିୟୋଜିତ ହୋଇଛନ୍ତି। ବିଧାନସଭାର ଦୈନନ୍ଦିନ କାର୍ଯ୍ୟ ପବ୍ଲିକ ପୋର୍ଟାଲରେ ନିୟମିତ ଅପ୍ଡେଟ୍ ହେଉଛି। ଫେବୃୟାରୀ ୧୮ରେ ବିଧାନସଭା ପ୍ରାରମ୍ଭିକ ଅଧିବେଶନରେ ରାଜ୍ୟପାଳଙ୍କ ପ୍ରଦତ୍ତ ଅଭିଭାଷଣ ନେଭା ଜରିଆରେ ଉପଲବ୍ଧ କରାଯାଇଛି। ଫେବୃୟାରୀ ୨୨ରେ ଅର୍ଥମନ୍ତ୍ରୀ ଆଗତ କରିଥିବା ବଜେଟ୍ ମଧ୍ୟ ବିନା କାଗଜରେ ଆଗତ ହୋଇଥିଲା। ସମସ୍ତ ବିଧାୟକ ଏବଂ ବିଧାନସଭା କର୍ମଚାରୀଙ୍କୁ ଆବଶ୍ୟକ ତାଲିମ ପ୍ରଦାନ ଲାଗି ପଦକ୍ଷେପ ନିଆଯାଇଛି। ବିଧାନସଭା ସଚିବାଳୟ ପାଇଁ ୬୬ ଡେସ୍କଟପ୍ କିଣା ବାବଦରେ ୪୬ ଲକ୍ଷ ୫୭ ହଜାର ୩୧୩ ଟଙ୍କା, ଲାନ୍, ୱାଇ-ଫାଇ ଏବଂ ଭିଡିଓ କନଫରେନ୍ସ ବ୍ୟବସ୍ଥା ପାଇଁ ୧ କୋଟି ୩୬ ଲକ୍ଷ ୬୫ ହଜାର ୨୪୬ ଟଙ୍କା, ବିଧାନସଭା ଗୃହ ମଧ୍ୟରେ ଭିଡିଓ କନ୍ଫରେନ୍ସ ବ୍ୟବସ୍ଥା ଗ୍ରହଣ ବାବଦରେ ୧୦ ଲକ୍ଷ ୫୭ ହଜାର ୫୭୦ ଟଙ୍କା ବ୍ୟୟ କରାଯାଇଥିବା ବାଚସ୍ପତି ସୂର୍ଯ୍ୟନାରାୟଣ ପାତ୍ର ସୂଚନା ଦେଇଛନ୍ତି।
