ଫୁଲବାଣୀ ଅଫିସ, ୯ା୪: ଫୁଲବାଣୀ ପୌର ପରିଷଦ ନିର୍ବାଚନରେ ଦଳ ବିରୋଧରେ କାମ କରିବା ଅଭିଯୋଗରେ କନ୍ଧମାଳ ଜିଲା ବିଜେଡି ସାଧାରଣ ସମ୍ପାଦକ ପ୍ରଦୀପ ମୁନିଙ୍କୁ ଦଳରୁ ନିଲମ୍ବିତ କରାଯାଇଛି। ରାଜ୍ୟ ବିଜେଡି ସାଧାରଣ ସମ୍ପାଦକ(ଗଣମାଧ୍ୟମ ବ୍ୟାପାର) ମାନସ ମଙ୍ଗରାଜ ଏକ ପ୍ରେସ୍ ବିବୃତିରେ ଏହା ଜଣାଇଛନ୍ତି।
ସୂଚନାଯୋଗ୍ୟ, ମୁନି ପୂର୍ବରୁ ଫୁଲବାଣୀ ପୌର ପରିଷଦର କାଉନସିଲର ଥିବା ବେଳେ ତାଙ୍କ ସ୍ତ୍ରୀ ପୌରାଧ୍ୟକ୍ଷ ଥିଲେ। ଚଳିତ ନିର୍ବାଚନରେ ପୌରାଧ୍ୟକ୍ଷା ପଦବୀରେ ନିଜ ସ୍ତ୍ରୀଙ୍କୁ ଟିକେଟ ଦେବା ଲାଗି ପ୍ରଦୀପ ଉଦ୍ୟମ କରିଥିଲେ। ଶେଷ ପର୍ଯ୍ୟନ୍ତ ଟିକେଟ ତାଙ୍କ ସପକ୍ଷରେ ଥିବା ଆଲୋଚନା ହେଉଥିଲା। ହେଲେ ଅନ୍ତିମ ପର୍ଯ୍ୟାୟରେ ଟିକେଟ ମିଳି ନ ଥିଲା। ଏପରିକି ନିଜ ୱାର୍ଡରେ ଦଳୀୟ କାଉନସିଲର ପ୍ରାର୍ଥୀଙ୍କୁ ସେ ଜିତାଇବାରେ ବି ସକ୍ଷମ ହୋଇ ନ ଥିଲେ।ା
ଅପରପକ୍ଷେ ଏହି ପୌର ପରିଷଦ ନିର୍ବାଚନରେ ଦଳ ବିରୋଧୀ କାର୍ଯ୍ୟ କରିବା ଅଭିଯୋଗରେ ବିଜେଡିର ୩ ନଂ ୱାର୍ଡର ପୂର୍ବତନ କାଉନସିଲର ଭାଗବତ ବେହେରା ଓ ୧୦ ନଂ ୱାର୍ଡର ପୂର୍ବତନ କାଉନସିଲର ଶ୍ରୀବତ୍ସ ବେହେରାଙ୍କୁ ଜିଲା ସଭାପତି ସରୋଜ କର୍ଣ୍ଣ ନିଲମ୍ବିତ କରିଥିଲେ ା
