ବମ୍ବେ: ଫିଲ୍ମଟିଏ ୧୦୦ କୋଟି କ୍ଲବରେ ସାମିଲ ହେବା କଥା ସମସ୍ତେ ଶୁଣିଥିବେ। ହେଲେ ବାହୁବଳୀ ଷ୍ଟାର ପ୍ରଭାସ ଗୋଟିଏ ଫିଲ୍ମ ପାଇଁ ସମାନ ପାଉଣା ନେଇ ସମସ୍ତଙ୍କୁ ଚମକାଇ ଦେଇଛନ୍ତି। ମେଗା-ବଜେଟ ଫିଲ୍ମ ‘ରାଧା ଶ୍ୟାମ’ ପାଇଁ ସେ ମୋଟା ଅଙ୍କର ପାଉଣା ନେଉଛନ୍ତି ଅଭିନେତା। ପୂର୍ବରୁ ଅନ୍ୟ କୌଣସି ଅଭିନେତାଙ୍କୁ ଏତେ ଟଙ୍କା ମିଳି ନ ଥିବା ବେଳେ ସେ ରେକର୍ଡ କରିଛନ୍ତି। ଫିଲ୍ମରେ ଅନ୍ୟାନ୍ୟ ଭୂମିକାରେ ପୂଜା ହେଗଡେ, ସଚିନ ଖେଡେକର, ମୁରଲୀ ଶର୍ମା,ଭାଗ୍ୟଶ୍ରୀ, କୁଣାଲ ରୟ କପୁର ପ୍ରମୁଖ ନଜର ଆସିବେ। ରାଧାକୃଷ୍ଣ କୁମାର ଏହାର ନିର୍ଦ୍ଦେଶନା ଦେଉଛନ୍ତି। ଫିଲ୍ମଟି ଜୁଲାଇ ୩୦ରେ ପରଦାକୁ ଆସିବାକୁ ଥିବା ବେଳେ ଆଲିଆଙ୍କ ଫିଲ୍ମ ‘ଗଙ୍ଗୁବାଇ କାଠିଆବାଡି’କୁ ଟକ୍କର ଦେଇପାରେ।
ନିଖୁଣ ଅଭିନୟରେ ଦର୍ଶକଙ୍କୁ ବାନ୍ଧି ରଖୁଥିବା ପ୍ରଭାସ ‘ବାହୁବଲୀ’ରେ କରିଥିଲେ ପ୍ରଶଂସନୀୟ କାମ। ଏହାକୁ ନେଇ ମନୋରଞ୍ଜନ ଦୁନିଆରେ ତାଙ୍କର ବାହାବା କରାଯାଇଥିଲା। ସମସ୍ତେ ତାଙ୍କର ପ୍ରଶଂସକ ପାଲଟିଥିଲେ। ଫିଲ୍ମର ଅଦ୍ଭୁତପୂର୍ବ ସଫଳତାକୁ ନେଇ ଏବେ ଆଗଧାଡ଼ିର ନାୟକ ପାଲଟିଛନ୍ତି ସେ। ଫଳରେ ବ୍ୟକ୍ତିଗତ ଭାବେ ନିଜର ପାଉଣା ମଧ୍ୟ ସେ ବଢ଼ାଇଛନ୍ତି। ଏବେ ତାଙ୍କ ପାଖରେ ଗୋଟିଏ ପରେ ଗୋଟିଏ ଭଲ ଫିଲ୍ମ ରହିଛି। ସେଥିରୁ ଆଦିପୁରୁଷ, ସଲାମ ଏବଂ ନାଗ ଅଶ୍ୱିନ ଅନ୍ୟତମ।
