ମୁମ୍ବାଇ,୧୩।୩: ଟି-୨୦ ବିଶ୍ୱକପ୍ ସଫଳତା ପରେ ଏବେ ବିସିସିଆଇର ପରବର୍ତ୍ତୀ ଟାର୍ଗେଟ୍ ହେଉଛି ୨୦୨୭ ଦିନିକିଆ ବିଶ୍ୱକପ୍। ୨୦୧୧ ପରଠାରୁ ଦୀର୍ଘ ପ୍ରତୀକ୍ଷିତ ଏହି ଟ୍ରଫି ହାସଲ ପାଇଁ ରୋହିତ ଶର୍ମା ଓ ବିରାଟ କୋହଲିଙ୍କୁ ନେଇ ଏକ ସ୍ୱତନ୍ତ୍ର ରଣନୀତି ପ୍ରସ୍ତୁତ କରାଯାଇଛି।
ରିପୋର୍ଟ ଅନୁଯାୟୀ, ଆଇପିଏଲ୍ ୨୦୨୬ ଶେଷ ହେବା ପରେ ଟିମ୍ ଇଣ୍ଡିଆର ସମ୍ପୂର୍ଣ୍ଣ ଧ୍ୟାନ ଦିନିକିଆ ଫର୍ମାଟ୍ ଉପରେ ରହିବ। ରୋହିତ ଓ ବିରାଟଙ୍କୁ ଅଧିକରୁ ଅଧିକ ଅଭ୍ୟାସ ସୁଯୋଗ ଦେବା ପାଇଁ BCCI ଆଗାମୀ ବିଦେଶ ଗସ୍ତରେ ଅତିରିକ୍ତ ଦିନିକିଆ ମ୍ୟାଚ୍ ଖେଳିବାକୁ ନିଷ୍ପତ୍ତି ନେଇଛି। ନ୍ୟୁଜିଲ୍ୟାଣ୍ଡ ଭଳି ଅନେକ ବିଦେଶୀ ବୋର୍ଡ ମଧ୍ୟ ଭାରତ ସହ ଅଧିକ ଦିନିକିଆ ଖେଳିବାକୁ ପ୍ରସ୍ତାବ ଦେଇଛନ୍ତି, ଯାହାକୁ BCCI ଗ୍ରହଣ କରିଥିବା ଜଣାପଡ଼ିଛି।
ଆଇପିଏଲ୍ ପରେ ଭାରତ ଗୋଟିଏ ଟେଷ୍ଟ ଏବଂ ୩ଟି ଦିନିକିଆ ପାଇଁ ଆଫଗାନିସ୍ତାନକୁ ଆତିଥ୍ୟ ଦେବ। ଏହାପରେ ଦଳ ଇଂଲଣ୍ଡ ଗସ୍ତରେ ୩ଟି ଦିନିକିଆ ଏବଂ ୫ଟି ଟି-୨୦ ଖେଳିବ। ଏହି ସମୟରେ ଆୟରଲାଣ୍ଡ ବିପକ୍ଷରେ ମଧ୍ୟ ସିରିଜ୍ ହୋଇପାରେ। ଶ୍ରୀଲଙ୍କା, ୱେଷ୍ଟଇଣ୍ଡିଜ୍ ଏବଂ ନ୍ୟୁଜିଲ୍ୟାଣ୍ଡ ବିପକ୍ଷରେ ମଧ୍ୟ ସୀମିତ ଓଭର ବିଶିଷ୍ଟ ସିରିଜ୍ ଖେଳାଯିବ। ନ୍ୟୁଜିଲ୍ୟାଣ୍ଡ ବୋର୍ଡ ଖାସ୍ କରି ଅଧିକ ଦିନିକିଆ ମ୍ୟାଚ୍ ପାଇଁ ଅନୁରୋଧ କରିଛି।
ଅନ୍ୟପଟେ, ଆସନ୍ନ ଆଇପିଏଲ୍ ୨୦୨୬ ପାଇଁ ବିରାଟ କୋହଲି ନିଜର ପ୍ରସ୍ତୁତି ଆରମ୍ଭ କରିଦେଇଛନ୍ତି। ସୋସିଆଲ ମିଡିଆରେ ଭାଇରାଲ୍ ହୋଇଥିବା ଏକ ଭିଡିଓରେ ବିରାଟଙ୍କୁ ନେଟ୍ସରେ ଝାଳ ବୁହାଉଥିବା ଦେଖିବାକୁ ମିଳିଛି। ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ପକ୍ଷରୁ ଖେଳୁଥିବା ବିରାଟଙ୍କ ଏହି ଆକ୍ରମଣାତ୍ମକ ବ୍ୟାଟିଂ ଅଭ୍ୟାସ ଦେଖି ପ୍ରଶଂସକଙ୍କ ମଧ୍ୟରେ ବେଶ୍ ଉତ୍ସାହ ଦେଖାଦେଇଛି।
