ଓ୍ବାଶିଂଟନ,୨୨।୧୧: ମଙ୍ଗଳରେ ଘର କରିବା ପାଇଁ ଯୋଜନା ଜାରି ରହିଛି। ପୃଥିବୀ ସହିତ କେତେକ ସାମ୍ୟତା ରଖୁଥିବା ମଙ୍ଗଳରେ ଜୀବନର ସନ୍ଧାନ ଲାଗି ଦୀର୍ଘ ଦିନ ଧରି ମଣିଷ ନାନା ଗବେଷଣା ଜାରି ରଖିଛି। ଅନ୍ୟ ଗ୍ରହରେ ଜୀବନ ଖୋଜୁଥିବା ଏଲନ ମସ୍କ୍ ଟୁଇଟ୍ କରି କହିଛନ୍ତି ଯେ, ୨୦୫୦ ସୁଦ୍ଧା ମଙ୍ଗଳ ଗ୍ରହରେ ଜନବସତି ସ୍ଥାପନ କରିବା ସମ୍ଭବ ହେବ। ତେବେ ଲୋକଙ୍କୁ କାଚ ଘରେ ରହିବାକୁ ପଡ଼ିବ ବୋଲି ସେ କହିଛନ୍ତି। ମଙ୍ଗଳରେ ସର୍ବାଧିକ ତାପମାତ୍ରା ମାଇନସ୍ ୪୮ ଡିଗ୍ରୀ ସେଲସିୟସ୍ ରହିଥାଏ। ସେହିପରି ସୂର୍ଯ୍ୟର କ୍ଷତିକାରକ ଅଲ୍ଟା ଭାଓଲେଟ୍ ରଶ୍ମୀକୁ ରୋକିବା ପାଇଁ ଏଠାରେ କୌଣସି ସୁରକ୍ଷା କବଚ ନାହିଁ। ପୃଥିବୀରେ ବାୟୁମଣ୍ଡଳର ଉପର ଭାଗରେ ଥିବା ଓଜନସ୍ତର ଏହି କ୍ଷତିକାରକ ରଶ୍ମୀକୁ ଭିତରକୁ ଆସିବାକୁ ଦେଇ ନ ଥାଏ। ମାତ୍ର ମଙ୍ଗଳରେ ଏହା ସମ୍ଭବ ନୁହେଁ। ତେଣୁ ସୁରକ୍ଷା ଦୃଷ୍ଟିରୁ ଲୋକଙ୍କୁ କାଚ ଘରେ ରଖିବା ଶ୍ରେୟସ୍କର ହେବ ବୋଲି ସେ କହିଛନ୍ତି। ମଙ୍ଗଳ ଗ୍ରହର ତାପମାତ୍ରା ବୃଦ୍ଧି ପାଇଁ ଏଠାରେ ଭବିଷ୍ୟତରେ କିଛି ପରମାଣୁ ବୋମା ବିସ୍ଫୋରଣ କରାଯିବାର ଯୋଜନା ରହିଛି। ଏହାଦ୍ୱାରା ଏଠାରେ ଅଙ୍ଗାରକାମ୍ଳ ଗ୍ୟାସର ପରିମାଣ ବଢ଼ିବା ଯୋଗୁ ତାପମାତ୍ରାରେ ବୃଦ୍ଧି ସମ୍ଭବ ହୋଇପାରିବ। ଯାହାକି ମନୁଷ୍ୟର ଜୀବନ ଧାରଣ ଲାଗି ଉପଯୋଗୀ କ୍ଷେତ୍ର ପ୍ରସ୍ତୁତ କରିପାରିବ। ଏଠାରେ ୧୦ ହଜାର ପରମାଣୁ ବୋମା ବିସ୍ଫୋରଣ କରାଗଲେ ସୁଫଳ ମିଳିବା ସହିତ ତାପମାତ୍ରାରେ ଉଲ୍ଲେଖନୀୟ ପରିବର୍ତ୍ତନ ଆସିପାରିବ । ତେବେ ସେଥିପାଇଁ ଆଉ ୩୦ ବର୍ଷ ସମୟ ଲାଗିବ ବୋଲି ସେ କହିଛନ୍ତି।
