ହାଇଦ୍ରାବାଦ,୨ା୧୧: କଂଗ୍ରେସ ନେତା ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ଯାତ୍ରାରେ ବୁଧବାର ନିର୍ଦ୍ଦେଶିକା ତଥା ପ୍ରଯୋଜିକା ପୂଜା ଭଟ୍ଟ ସାମିଲ ହୋଇଛନ୍ତି। ହାଇଦ୍ରାବାଦରେ ରାହୁଲ ପଦଯାତ୍ରା କରୁଥିବାବେଳେ ପୂଜା ତାଙ୍କ ସହ ଚାଲି ଚାଲି ଆଲୋଚନା କରୁଥିବା ଦେଖିବାକୁ ମିଳିଛି। ଏହାର ଭିଡିଓ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହୋଇଛି। ପୂଜା ଭଟ୍ଟ ସୋସିଆଲ ମିଡିଆରେ ବିଭିନ୍ନ ପ୍ରସଙ୍ଗକୁ ନେଇ ମତ ରଖିଥାଆନ୍ତି। ୧୯୮୯ରେ ‘ଡାଡି’ ଚଳଚ୍ଚିତ୍ରରୁ କ୍ୟାରିୟର ଆରମ୍ଭ କରିଥିବା ପୂଜା ହେଉଛନ୍ତି ଭେଟେରାନ୍ ଫିଲ୍ମ ମେକର ମହେଶ ଭଟ୍ଟଙ୍କ ଝିଅ। ପ୍ରଯୋଜନା ପୂର୍ବରୁ ସେ ‘ଦିଲ୍ ହୈ କି ମାନ୍ତା ନେହିଁ’, ‘ସଡ଼କ’, ‘ଫିର୍ ତେରି କାହାନି ୟାଦ୍ ଆୟି’ ଭଳି ଫିଲ୍ମରେ ଅଭିନୟ କରିଥିଲେ।
ହାଇଦ୍ରାବାଦସ୍ଥିତ ବାଲାନଗର ମେନ୍ ରୋଡ୍ର ଏମ୍ଜିବି ବାଜାଜ ଶୋ’ରୁମ୍ରୁ ଆରମ୍ଭ ହୋଇଥିବା ପଦଯାତ୍ରାକୁ ସଫଳ କରିବା ପାଇଁ ତେଲଙ୍ଗାନା କଂଗ୍ରେସ ପକ୍ଷରୁ ୧୦ଟି ସ୍ବତନ୍ତ୍ର କମିଟି ଗଢ଼ାଯାଇଛି। ଏହା ପୂର୍ବରୁ ରାହୁଲ ତାମିଲନାଡ଼ୁ, କେରଳ, କର୍ନାଟକ ଓ ଆନ୍ଧ୍ରପ୍ରଦେଶରେ ପଦଯାତ୍ରା କରିଥିଲେ। କନ୍ୟାକୁମାରୀରୁ ସେପ୍ଟେମ୍ବର ୭ରେ ଆରମ୍ଭ ହୋଇଥିବା ଏହି ମାରାଥନ୍ ଓ୍ବାକ୍ ବୁଧବାର ୫୬ ଦିନରେ ପହଞ୍ଚତ୍ଛି।
